ỤBANỤ 1 - UTAKADA TIJILO

A njɛ atwa Isrɛl a na Namɛ ni Ijipti Umungwuta

¹ Nzeci mu miaụŋ-me-eyi mi Jekob, ata (ɛɛ hiɛŋ ge Isrɛl) mu na mu 'wa bụ mi zhe Ijipti na, bụtụ bụtụ 'waŋnɛ atwa ihwɛ ibwɛ.

² Gɛ Rubɛn, ne Simion, ne Livai keeni Juda,

³ Ge Isaka, nɛ Zɛbulon, keeni Bɛnjamin,

⁴ Ga Dan, na Naftali, na Gad keeni Ashɛ.

⁵ Kpakpakpaaŋ atwa na ge Jekob meci, a shɛ atwa dupu-nu-woshi (70), Yɛu ibwɛ go Josɛf namwawaŋ ni Ijipti na aka ata.

⁶ Na aba inɛ gɛ, na aka fwalaa go Josɛf 'wi keeni miaụŋ-mo-ono mu bwa hwɛɛ keeni atwa uwaŋnɛ ata du.

⁷ Miaụŋ mi Isrɛl mi 'yebi tumata, ibɛ po ee gembi ufwugwo duwa; aa kaana ufwugwo tugombo, ibɛ po ukpahiŋ wa aba ishijɛ tebiye; ee shini cɛnjɛ ta ata.

⁸ Nazhɛ agwuma ufwo Ijipti, na mepi shi iwɛ Josɛf, yɛ tugwama.

⁹ Bɛɛ hiɛŋ atwa ubwa, Hioko ma, miaụŋ mi Isrɛl mu tu hwuri nu ufwugwo, ee tu hwuleneni nu ukpahiŋ.

¹⁰ Hwure ma tɛ njɛ aŋ ma ti'inta, iwɛ aka na ɛɛ zhɛ na kaana ufwugwo, aka oko ci hwuŋ, ɛ zhɛ o togwu na atwa i'ime tu maa a tu sukakanɛ nu ujasa, nazhɛ a bana na cɛnjɛ tu tu.

¹¹ Ee jeri ga ehiu na zhɛ na mangangana aŋ ugondu ụbaụta iwɛ maa a njɛ aŋ umungwuta. Atwa Isrɛl meni Faro ashɛpwụ Paitom keeni Rameses ofwo na maa bu no tulono i'wɛŋnɛ uduciya ubwa.

¹² Ama gana na ta a nda aŋ umungwuta, gobwonu du kaa aa kaana ufwugwo tugombo, oo mburusonu na cɛnjɛ ta ata duwa. Nazhɛ ohwulu kwuni atwa Ijipti tuhoroko iwɛ miaụŋ mi Isrɛl.

¹³ Nazhɛ Ejipti eni miaụŋ mi Isrɛl ugondu umungwuta tɛnda.

¹⁴ Ugondu cɛnjɛ keeni etemberi na ee eni aŋ, heshigeni aŋ shɛmɛ, ee peneneni aŋ iyi elele nɛ namɛ nu ntuma ma aba tɛnda sasana. Ugondu we elele na ee eni aŋ tɛnda ụ shɛ ugondu umungwuta.

Unu na Ga Faro Peni Eyikwo na o Mbiyono Eyikwo Tumata

¹⁵ Nazhɛ agwuma Ijipti mbishi eyikwo Ehibru a na o mbiyono eyikwo tumata. Ɛ hiɛŋ izeci bu na bu ko ge Sifra, ɛɛ hiɛŋ izeci bu na bi yebi go Pua,

¹⁶ Bɛɛ hiɛŋ aŋ, Aka elele na ohio mbiyono eyikwo Ehibru tumata, ahiɛ kwụbɛ te e kwuzhi maa e meci, yaa shɛ yɛu ɛtɛ shɛ yɛu-ye-eyi kwụna iŋ ma, ama yaa shɛ yɛu-yo-o, ga i nama.

¹⁷ Ama eyikwo ata o mbiyono eyikwo Ehibru na tumata a sụma Agwatana inyɛsɛ, a njɛ shɛ gana na ta agwuma Ijipti mbishi aŋ o, ama o bicingo ta miaụŋ-me-eyi.

¹⁸ Nazhɛ agwuma Ijipti suyanɛ eyikwo ebe o mbiyono Ehibru tumata, bɛɛ hiɛŋ aŋ, Iwembe po kwuŋ ahia nda gana gaa? Ohio bicingo miaụŋ-me-eyii?

¹⁹ Eyikwo ata o mbiyono eyikwo tumata hiɛŋ Faro, Iwɛnɛ te eyikwo Ehibru shɛ shɛ gana eyikwo Ejipti. A 'yajɛ ikɛnyi, maa waa eyikwo na o mbiyono eyikwo tumata ci, asha o motwo.

²⁰ Ibɛ po Agwatana peni eyikwo ata o mbiyono eyikwo tumata uwebiye. Atwa ata kaa a kaana ufwugwo tugombo keeni ukpahiŋ ti'yaga duwa.

²¹ Na aba ibɛ Agwatana peni eyikwo ata o mbiyono eyikwo tumata amwamwa ɛkɛnyi aba, iwɛnɛ ta a sụmɛ Agwatana inyɛsɛ.

²² Nazhɛ ga Faro peni atwa elele unu, bɛɛ hiɛŋ, Yɛu-ye-eyi-ye elele nɛ Ehibru meci, ge keri iŋ nu Urefu Nayɛl, ama gɛ yɛu-yo-o elele nama.