RUTU 1 - UTAKADA TIJILO

Ge Ilimɛlɛk keeni Atwa Ubwa Zhe Moab

¹ Na aka na ta Ajɛmɛ-ụshɛrɛya untanganɛ la cɛnjɛ, ibɛ imunɛ layɛ na cɛnjɛ ta ata. Ibɛ po butubwenyi bu ko na namɛ ni Bɛtlɛhɛm Juda sụmɛ bee zhe na cɛnjɛ tu Moab, abana ne biyikwo bwa medenji esemberi bwa eyebi.

² Ɛ hiɛŋ izeci bụtụ ata gɛ Ilimɛlɛk, ɛɛ hiɛŋ izeci biyikwo bwa ga Naomi, ɛɛ hiɛŋ nzeci me esemberi ata ubwa eyebi ga Malon keeni Cilion. A shɛ atwa Ɛfrata una Bɛtlɛhɛm Juda. Aa sụmɛ na cɛnjɛ tu Moab aa namɛ apata te ilegeji.

³ Ama gɛ Ilimɛlɛk bwolo Naomi 'wi, ga Naomi vwɛ ya na miaụŋ mu bwa mi yebi.

⁴ Ibɛ ee zeni miaụŋ ma Amoab; ɛ hiɛŋ izeci bu na bu ko go Opa, ɛ hiɛŋ izeci bu na bi yebi go Rutu. Aa jɛjɛ ya apata gana ta shiywa umpwa,

⁵ Ga Malon na Cilion e 'wi hwɛɛ aba ebeyebi du. Ga Naomi namɛ ya uzawa miaụŋ mu bwa me eyi mi yebi keeni uzawa bwolo bwa.

Ga Naomi Jiye ni Bɛtlɛhɛm abana Rutu

⁶ Tu ga Naomi ta namɛ na cɛnjɛ tu Moab, baa hwụjɛ maa Agwatana hikeni ba atwa ubwa, bee peni aŋ iyimɛyɛ, ibɛ po baa mama imanjɛ maa bana na cɛnjɛ ta ata tu Moab na atashɛ ubwa eyebi maa gwulo.

⁷ Bee beni ga no olugwo ata baa ga namɛ na atashɛ ubwa eyebi. Ee kwuni tahaŋnụ ta aba maa e gwuri na cɛnjɛ tu Juda.

⁸ Ama ga Naomi hiɛŋ atashɛ ata ubwa eyebi, Gwulo ma, bụtụ bụtụ go gwulo ni ihwɛ bino bwa. Ga Agwatana ihi mepeni iwɛ, gana na ahiɛ ndanɛ atwa ata 'wi, hwɛɛ tu Gamba.

⁹ Ga Agwatana ihi ndanɛ maa bụtụ bụtụ hiŋ 'yaganana bwolo maa hi 'yaga nhwaŋ! Nazhɛ baa ruwanɛ aŋ, baa njɛ aŋ ongbo. Ee tileni nu u'wo gboo,

¹⁰ Ɛɛ hiɛŋ bụ, Awo: Ti zhɛ ta bụ 'wa to gwulo no ofwo atwa bụ.

¹¹ Ga Naomi hiɛŋ aŋ, A-miaụŋ mi mi, gwulo ma. Iwembe kwuŋ po ɛhi tɛ zhɛ hi ma 'waa? N tɛ zhɛ suu ma mata miaụŋ maa mi hi zeni?

¹² A-miaụŋ mi mi, gwulo ma nu nhwaŋ mi hiŋ, N injɛ ya Ngee hwuleji tụmbụla. Okwo yaa shɛ Ngɛɛ ngɛ tɛ zhɛ ma tuna nụ ụjita go maa ma mata miaụŋ-me-eyi,

¹³ Hi zhɛ hia 'yaka mụ hŋ uuwa i ci aka na maa waŋnanjɛ? Iwɛ inɛ ɛtɛ hŋ ɛhi zhɛ hia ganga olwo anya tutuna? Awo, A-miaụŋ mi mi, amɛ mi kaa hashɛganụ iwɛ hi tebiye. Iwɛnɛ po AGWANGWAMA bocingwo u'ala ubwa boo m po.

¹⁴ Ee tileni sasana nu u'wo. Go Opa njɛ bino-bwolo bwa ongbo, ama go Rutu tuba ndepileni bu.

Go Rutu Lacɛ maa Ganga Naomi

¹⁵ Ga Naomi hiɛŋ Rutu, Hioko, biyikwo bi yɛu-bino bwolo bu hwulwo ugwulwo no ofwo atwa ubwa keeni ofwo tuwa tu bwa, zhaga gwulo du nu bwa.

¹⁶ Ama go Rutu hiɛŋ bụ, Ta ma uranga ya tụlụpa maa ma bụ ganga mo gwulo. Iwɛnɛ po ofwo elele na ɛbi zhɛ, apata Ngɛɛ zhɛ, ofwo elele na abụ namɛ, apata Ngɛɛ zhɛ ma nama. Atwa bụ aba zhɛ a sha atwa mi, Agwatana bụ kaa zhɛ a sha Agwatana mi.

¹⁷ Ofwo na ɛbi zhɛ bo 'wo, apata du Ngɛɛ zhɛ mo 'wo, apata kaa du ɛɛ zhɛ mo n no. Yaa shɛ inyɛwɛŋ ta namba namɛ swooŋ no tu'wo, nɛ tɛ zhɛ mo n bogwu na bụ, asha ga Agwatana njɛ iŋ ne mi.

¹⁸ Aka na tu ga Naomi kwụbɛ maa go Rutu njɛ ahaŋsa ubwa oko maa 'wa bụ, bee genji bu ya tu'uranga.

¹⁹ Gana eyikwo ata zhagajɛ ebeyebi tutu ee teni Bɛtlɛhɛm ta. Aka na te e ci Bɛtlɛhɛm, atwa ụshɛpwụ ata kpaaŋ a dumanga iwɛ aba. Eyikwo hiɛŋ, Ga Naomi na hŋ?

²⁰ Ga Naomi jishijɛ aŋ, bɛɛ hiɛŋ, Tɛ mɛ hiɛŋ ma ya ga Naomi o, n hiɛŋ ma ya ga Mara, iwɛnɛ ta Agwatana na Hwuri kpaaŋ nduwa maa ga uraiŋ mu tiya gagwụmɛ kparɛ.

²¹ Iyi i m balanɛ la nazhɛ Ngee beni epe, ama Agwatana n jicinje ni i'ɛlɛ yo ohondo. Iwembe po ɛhi tɛ mɛ hiɛŋ ga Naomii? Na aka na ta AGWANGWAMA na Hwuri kpaaŋ m po aba na cɛnjɛ, bee m peni kaa ụbaụta.

²² Gana ga Naomi banɛ na cɛnjɛ tu Moab abana Rutu utashɛ ubwa na shɛ Bumoab ee jiye ta. E ci Bɛtlɛhɛm na aka na te e kwuni iyimɛyɛ ya aba nɛ ɛɛ hiɛŋ bali tugwubo.