UTAKADA NA GO POUL 'NYETENI ATWA ROM 1 - UTAKADA TIJILO

A'walụ na go Poul 'Walụ Aŋ

¹ Go Poul yɛu-ugondu Jisus Krast, na aa suyanɛ maa sha butumwa, na ee shiri swooŋ iwɛ Anabarɛ Ebiye Agwatana tu'ananga,

² anaa na bee shiri la unu wa aba tedure nu unu we egesere ubwa na amɛ Utakada N-ndumwa ma Agwatana mi tijilo.

³ Ibɛ shɛ iwɛ Yɛu ibwɛ nɛ banɛ nụ ụlamụ Devid nu uhwaŋna butugwumwa.

⁴ Ama e mbiseni caakwụ maa bɛ shɛ Yɛu ya Agwatana tedure nu ukpahiŋ Mpiala mi Tijilo, na aka na ti bɛɛ hiɛ no tu'wo, ubwa shɛ ge Jisus Krast Agwangwama tu.

⁵ Ti leshiji tulubo-ti-biye keeni ugondu tutumwa tedure nu bwa, iwɛ maa tɛ zɛrijɛ edenji elele maa a hwụjɛ-unu rishe-tɛtɛtana, iwɛ izeci ibwɛ.

⁶ Hi namɛ du na ashashɛ aba, ahiɛba na hiɛ hwụjɛ ụhiɛŋshɛ Jisus Krast.

⁷ No ofwo atwa elele na namɛ nu Rom, ahiɛba na Agwatana o lubo, a na baa suyanɛ maa hiɛ shɛ atwa tijilo. Ga Agwatana na shɛ Bishi tu, keeni Agwangwama tu ge Jisus Krast ihi peni tulubo-ti-biye keeni amɛ-olom.

Go Poul Njɛ Ugwoje wa Agwatana iwɛ Atwa Rom

⁸ N njɛ Ugwoje wa Agwatana mi hiiŋ iwe hiŋ kpaaŋ tedure Jisus Krast, iwɛnɛ ta a duma iwɛ rishe ri hiŋ tɛtɛtana nu unyizo kpaaŋ.

⁹ Agwatana na Ama ndana iyi na Anabarɛ Ebiye Yɛu ibwɛ na amɛ mi hwɛɛ, ubwa shɛ useyida mu, gana na Ngee hi genji shi titeyinje na adua mi.

¹⁰ Ma lụpa Agwatana aka elele, maa yaa shɛ yaa kwụlanɛ bụ, maa Mo gwushigo ohwolu maa ma zhajɛ pi hiŋ na aba inɛ gɛ.

¹¹ Iwɛnɛ po i ma n kwulana tebiye maa Ma zhajɛ pi hiŋ maa Ma hi muna upwaŋ iyi mpiala iwɛ maa Ma hi kaana ikɛnyi maa hi shikono dimi.

¹² Ecilo ibɛ i shɛ iwɛ maa ta kaana ikɛnyi hwɛɛ tu, ta aka na Ngaa namɛ na ashashɛ hiŋ, tedure ne rishe-tɛtɛtana ru na ru namɛ na shɛmɛ shi hiŋ, te ri mi, te ri hiŋ du.

¹³ Ama a-miaụŋ-mo-bino mi na amɛ Krast, Ma jala maa hi mepi maa Ma haŋsa na amɛ mi aka elele maa Ma zhajɛ pi hiŋ, iwɛ maa Ma 'yaga du tụ'walụ na ashashɛ hiŋ gana na tu Ngaa 'yajɛ na ashashɛ atwa na shɛ shɛ Eju, (ama a ta ma n lakana taa hwayɛ.)

¹⁴ N yɛ atwa elele utashɛ, te Egrik, ta atwa na shɛ shɛ Egrik, ta atwa ti'inta keeni shɛlagwụ.

¹⁵ Ibɛ po Ngaa mama 'imɛ maa Ma hi anangana du Anabarɛ Ebiye ahiɛba na hi namɛ nu Rom.

Ukpahiŋ Anabarɛ Ebiye

¹⁶ N njɛ shɛ ezuye iwɛ Anabarɛ Ebiye tu'ananga o, iwɛnɛ taa shɛ ukpahiŋ wa Agwatana na wo bicingo bụtụ be elele na tɛtanɛ-rishe, te Eju hiiŋ, keeni Egrik du.

¹⁷ Tedure na Anabarɛ Ebiye ata ibɛ Agwatana a lashɛga bụtụ be elele na tɛtanɛ-rishe tutu uce, gana na te e 'nyeci, ɛɛ hiɛŋ, Bụtụ bi tiririri zhɛ ba 'yaga uraiŋ tedure ne rishe-tɛtɛtana.

Iwɛwɛ nɛ Atwa Kpaaŋ Njɛ na Agba Agwatana

¹⁸ E kepishinji isɛbwɛ ya Agwatana maa i banɛ na azuba maa i sukakanɛ iwɛwɛ keeni iyi iwɛ nɛ atwa elele a nda. Ibɛ shɛ iyi iwɛ nɛ atwa a nda, nɛ ya kapana iwɛ-tɛkana ya Agwatana uhwaŋna.

¹⁹ E shileni atwa iyi nɛ ee eri a mapa Agwatana tedure ni ibɛ caakwụ; iwɛnɛ ta Agwatana mbiswonuo aŋ ijɛ ɛtɛ caakwụ ni ikɛnyi ibwɛ.

²⁰ Iyi ya Agwatana nɛ ee eri shi a kwụba la taa na aka na ta a njɛ unyizo, e eri a kwụba iŋ ya caakwụ tedure ni iyi nɛ Agwatana njɛ, tu ukpahiŋ ubwa unyizo-nom keeni Agwatana na baa shɛ, iwɛ maa kede e gwushiji ajɛshɛgwa na maa e peni o.

²¹ Okwo te e mepi Agwatana, ee peni shi bu ụjɛrụma na lanɛ nu bwa o, a njɛ shɛ kaa ugwoje nu bwa o. Ama shihaŋsa shɛ na aa haŋsa shɛ shɛ iyi tɛgadaga, tuhaŋsa ta aba tu na ti eshiciji shi iwɛ, tɛ shɛ ya tishi.

²² Gana na te e heŋshi maa a incɛ, nazhɛ kaa aa shɛ ya shɛlagwụ.

²³ E shepi ụjɛrụma wa Agwatana na fwoshi shi, ee peni uŋ itɛtɛnuwɛŋ nɛ i shɛ gana bụtụ nɛ yo fwoso, keeni una shanụnụ, keeni una isundɛ nɛ 'yajɛ ivwunɛ ineshi, keeni una iyi nɛ yo hombilo.

²⁴ Iwɛbɛ po Agwatana jinekeeni aŋ tiri keeni ukwedeyi ụwɛ na aa 'yajɛ na shɛmɛ sha aba, iwɛ maa a na mama ndanụ ụpụrụsa abaaba.

²⁵ E sheyinji iwɛ-tɛkana ya Agwatana nụ ụzagwụ, aa zhɛba iyi nɛ Agwatana karɛ, aa ndana iŋ iyi uhwuri Agwatana na karɛ iŋ. Agwatana kaa ubwa shɛ bụtụ na oo zhemonjino tutu unyizo-nom! Ami.

²⁶ Iwɛbɛ po Agwatana jinekeni aŋ ekwedeyi awɛ a na sugeni aŋ ezuye. Eyikwo aba suji iyi nɛ ga shɛ maa a njɛ gana na ta butugwumwa namɛ, ee sheyinji iŋ ya ni iyi nɛ shɛ shɛ gana na ta butugwumwa ga shɛ ba sha.

²⁷ Gobwonu du etwenyi genji iyi nɛ ga shɛ maa a na nda no ofwo eyikwo, ama ukwedeyi wa aba ụwɛ na wo hwoŋno na shɛmɛ sha aba shishingeni aŋ maa a na mama ndanụ ezuye abaaba etwenyi, ibɛ po ee peni aŋ ulwapɛ na teni cɛŋ na ti'ina tu na aa 'inɛ.

²⁸ Gana na ti iyi ya aba tumapa leneni shi aŋ maa a 'yaga iyi-tumapa ya Agwatana na shɛmɛ sha aba, ibɛ po Agwatana jinekeni aŋ ahaŋsa na ee eri shi a ya tumanga, maa tuba a na nda ya iyi nɛ teni shi cɛŋ.

²⁹ Iyi iwɛ shini na shɛmɛ sha aba, na amiaụŋ, ne eshe-iyi, no ogbo, na alaacɛ, isɛbwɛngwɛ shini na shɛmɛ sha aba pusuluu, na atwa tụkwụna, na ashamanjɛ, no tugworozwo, na tuzwamɛ,

³⁰ a shɛ anjɛ anya aba ufwu nu unu, o imo Agwatana, a shɛ atwa tugbom, a shɛ anjɛ unyangana, na atwa na a busa, na atwa na a nda iyi iwɛ ifwo, na atwa na hwụjɛ shɛ unu wa atwa na meci aŋ,

³¹ a shɛ atwa na eshiciji shi iyi elele, atwa na a bwada unu na ee ge shiri, na atwa na zasa tulubo na atwa vwɛ aba, na atwa na kwụbɛ shɛ inyɛmɛnyɛmɛ ya atwa.

³² Atwa ga kaa mepi undwa ga Agwatana sweji hwɛɛ, maa atwa na a ndangana iyi gɛnɛ ɛtɛ, e teni cɛŋ maa e 'wi, ama shɛ ga atwa na a nda iŋ kiri o, ama ta atwa na o lonono aŋ maa ga a na ndangana iŋ du.