N-NDUMWA TƐKAPƐSHƐNGA 1 - UTAKADA TIJILO

¹ N-ndumwa tɛkapɛshɛnga mi Jisus Krast, mu na Agwatana peni bu maa mbisono miaụŋ-mu-ugondu ubwa iyi nɛ i shɛ tilɛɛ maa i zhɛ ya nda kakayɛ. Ga Krast njɛ maa e mepi iŋ aka na tu baa tumwanɛ butumwa bwa ba azuba no ofwo Jon na shɛ yɛu-ugondu ubwa,

² na le n-ndumwa ma Agwatana, keeni n-ndumwa mi Jisus Krast tiseyida, keeni iwɛ iyi elele nɛ baa kwụbɛ.

³ Bụtụ na ba rɛta, na atwa na a hwuga iwɛ tigesere ti ga, a na kaa a untangana iyi nɛ ee 'nyeci na amɛ utakada ga, gwoje. Iwɛnɛ ta aka na ti ijɛ zhɛ ya nda gwumwongonu ya.

Ba 'Walụ Tụ'ụlwatagwụ-tụ-ụhiɛŋshɛ-Agwangwama ti Cenje

⁴ Ga Jon 'nyeteni Tụ'ụlwatagwụ-tụ-ụhiɛŋshɛ-Agwangwama ti cenje tu na tu namɛ na cɛnjɛ te Esia utakada, bɛɛ hiɛŋ, Go tulubo-ti-biye tu nama ne hiŋ, keeni amɛ-olom a na banɛ no olugwo Agwatana ata na namba hwuwayɛ, na namba la cala, na kaa te ci. Tu na kaa tu banɛ nu Mpiala mi cenje mu na mu namɛ nu umbe idwɛtwɛ ibwɛ;

⁵ tu na tu banɛ no olugwo Jisus Krast, na shɛ useyida u tɛcara. Ubwa shɛ tumata ti hiiŋ na banɛ no olugwo atwa na 'wi. Ubwa shɛ uhiu shɛgwuma shi unyizo. No ofwo bụtụ ata utu lubi, na utu tufwurinji tedure ne mehieŋ mu bwa, iwɛ maa ta banɛ ni iwɛwɛ tu.

⁶ Nazhɛ bee tu suji baa njɛ cɛnjɛ-ta-tugwama, maa ta sha onongbo maa tu na ndana Agwatana na shɛ Bishi bwa iyi. Ga ụjɛrụma, keeni ukpahiŋ ụ shɛ una ubwa tutu unyizo-nom Ami!

⁷ Hioko ma, be ci ba no odomu! Eshe kpaaŋ zhɛ a kwụba bụ, ta atwa na sepeji bu la iyi; ta atwa unyizo ga kpaaŋ zhɛ o zwono nu u'wo gboo iwɛ ubwa. Iiŋ! Ga i shɛ Gana ata Ami!

⁸ Gamba n shɛ Alfa keeni Omɛga, Umozhigo keeni Ukwunanga, Agwangwama na shɛ Agwatana hiɛŋ; bụtụ na namba hwuwayɛ, na kaa namba la, na kaa te ci, ubwa shɛ Bụtụ ata na Hwuri Kpaaŋ.

Bụtụ na Shɛ Gana Yɛu Bụtụ

⁹ Gamba ga Jon, na shɛ yɛu-bino hiŋ, na shɛ bụtụ na kaa ba twa-ikpɛngwu ne hiŋ nu ụbaụta keeni isɛbwɛ-ti'ima iwɛ cɛnjɛ-ta-tugwama keeni iwɛ Jisus Krast. N namɛ nu ụdakwụ na itekwu rugwutwonu na ɛɛ hiɛŋ, Patmos, iwɛ n-ndumwa ma Agwatana keeni iwɛ tiseyida ti Jisus.

¹⁰ N namɛ na amɛ Mpiala nu Ụjita wa Agwangwama, Ngaa hwụjɛ rụhwụŋ rụ 'wụtụ ne ekwunyi mi, rɛ shɛ gana rụhwụŋ ru ukakacɛ,

¹¹ rɛɛ hiɛŋ, Na 'nyata iyi nɛ aba kwụba nu utakada, maa tumwananɛ Tụ'ụlwatagwụ-tụ-ụhiɛŋshɛ-Agwangwama ti cenje tu na tu namɛ na amɛ Esia: nɛ Ɛfɛsɛs, nu Smuna, nu Pɛgamum, nu Tayatayɛra, nu Sadis, ni Filadɛlfia, keeni Laodisia.

¹² Ngaa mbiyanɛ maa ma kwụba bụtụ na ba njɛ ne mi. Aka na tu Ngaa mbiyanɛ, Ngaa kwụbɛ eteburu-asụtụla ecenje a na aa njɛ na azhɛnarɛya.

¹³ Ngaa kwụbɛ bụtụ bu ko na sụbɛ Yɛu Bụtụ na ashashɛ eteburu-asụtụla ata. Utogwo na bee urigeni zwe tutu ɛvwɛvwɛjɛ ubwa, bee umpi umazhɛya na agba ubwa.

¹⁴ Uhiuhiu ubwa keeni tihiŋzhe tu bwa tɛ shɛ tɛ cɛnjɛ paawụụ; eshe ubwa a shɛ gana bụratụ bu ulwa.

¹⁵ Ɛvwɛvwɛjɛ ubwa a ta tebiye gana utumburɛ na aa nyashɛnjɛ nu ulwa ụ'wụtụ; rụhwụŋ ru bwa rɛ shɛ gana rụhwụŋ ru uwururu meni mu ufwugwo.

¹⁶ Baa untanganɛ mkpasu mi cenje nu u'ala ubwa ubiye. Utokwobi na lacɛmɛ apada hweehwe wa banɛ nu unu ubwa; ụpɛshɛka ubwa wa ta gana uwaŋna na u hwuwi ukpahiŋ ubwa no tuvwo.

¹⁷ Aka na tu Ngaa kwụbɛ bụ, Ngee leyi nɛ ɛvwɛvwɛjɛ ubwa, Ngaa shɛ gana ru'wo. Bee m peteni u'ala ubwa ubiye, bɛɛ n hiɛŋ, Ta nda inyɛsɛ o. Gamba n shɛ bụtụ bi hiiŋ, na bụtụ bu umɛwɛɛ.

¹⁸ N shɛ buumwa, N uwo la, hioko, Gamba na n 'yajɛ uraiŋ tutu unyizo-nom. Gamba kaa n 'yajɛ a'inla-isɛhwɛ tu'wo, keeni inɛ ye e'uye.

¹⁹ Ibɛ po na 'nyata iyi nɛ abu kwụbwa, ti iyi nɛ namba hwuwayɛ go, keeni iyi nɛ tɛ zhɛ ya nda na aba inɛ gɛ.

²⁰ Iwɛ iyi tusweci mkpasu mi cenje mu na abụ kwụbɛ nu u'ala mu ubiye, keeni iwɛ eteburu-asụtụla ata ecenje aa njɛ na azhɛnarɛya. Mkpasu ma ata mi cenje mɛ shɛ atumwa tụ'ụlwatagwụ-tụ-ụhiɛŋshɛ-Agwangwama ti cenje; eteburu-asụtụla ata ecenje a shɛ tụ'ụlwatagwụ-tụ-ụhiɛŋshɛ-Agwangwama ti cenje.