Zuda 1 - Dankit Athar Le SAM (BSI)

¹ Juda akoma, Isua Krista asuak Jakob aparual: Pathianin ei pai ngai rang, Pa Pathian lungkhama a om ngai le Isua Kristan ei rung ngai.

² Lungkhamna, phukdaina, Anditna nangni rang bit rase.

Anchuna Diklui

³ Ka lom andit ngai, kei thei anga ka puta sandamna lokona nei mang rui anziak ranga, lungngam ansak voikhat dak loko rang Pathianin ami ngai rang ei pek.

⁴ Maruka alut mi a oma, hangai ha Pathian poisak lui mi ani u na Pathian lungkhamna ha hurnana anmang pui u na hava ngai ha tian ata asiana anbetok hatuka Isua Krista ningneina pom lui.

⁵ Hiva ngai na riat kiaram, Puman Aigupta ata Israel ngai ei mazoka tenchu nuka aiam nok ngai ei masiat he kei na manriat ret u.

⁶ Hatuka vanpalai ei ni u na maka ase ngai chu nikhua lian ruirilna tika ranga ahoi azing kara ankhita umora ranga ahoi.

⁷ Sodom le Gomora akola khopui mi ngai ha vanpalai ngai anga a om u na hurnana anmang u na hasik han taituan moia antak ei tiar u ha mitin ranga riatna ei hong manlang ani na.

⁸ Havan titin han hava mi ngaiin ramang aphan u na ataksa a mannim u na; Pathian racham tel umaka chunga alian ngai siat aril u.

⁹ Vanpalai ulian khit Mikael ngalin tho mak; Diabol le Mosi ruak sika ankhal ulai han ango ngam maka tenchu “Puman ango rase!” ati.

¹⁰ Tenchu hiva mi ngai chu ei riat unok ti ariata aril u chachaka; hatuka rama me anga mandon abui piangpui riatna ei don u na ngai han siatnana a manse.

¹¹ Itukmo apuak ei rik u! Kaina alampui athang u na, sum sika Balaam masial tiang anpek u na, Kora anga ei sel u na, ama anga siata ei va om u.

¹² Hava mi ngai ha lungkhamna khalai azara nukakhel ngai; atheia rong an en u na, ansum thinthin ei sema azuang ang ani u tenchu rua masul lui, thing mara bui ang kholumam ni rase thing anphoi anga athi diai.

¹³ Tipui zuar ansok ang ani u, ei masial u anzak luia aphuan anga ei manlang. Hava ngai ha arasi anvai ang Pathianin azing anthukkhit umora ranga mun ei hoi.

¹⁴ Enok, Adam ata khuk sari han hava rui arila; “Vanpalai anthiang asang atampa le Puma hong inti,

¹⁵ mitin chunga ruiril inti Pathian poisak lui ngai sintho ansiat ranga chong sanok Pathian abui salui ngai in ei dui u ngai!”

¹⁶ Hiva mi ngai hi umora anuar le mi non; atheia mandon asiat azi ngai, atheia anlian u na, amur le chongalian aril ei lok u narang.

Anchuna le Anrengna

¹⁷ Tenchu ka lom ngai re u ro, hava mana Puma Isua Krista a zolai ngaiin ei na ril u ha.

¹⁸ Na kom ei ti u, “Nikhua hek tik chu mi senkhatin na ero inti. Pathian abui tia ei mandon ni inti.”

¹⁹ Hava miring ngai ha ansenna asin ngai, apiangpui mandonin ei ruai ngai, ratha bui ngai.

²⁰ Tenchu, nangni ka lom andit ngai nangni chu nei iam u na anthiang ha anson pat u ro, Ratha thotheina le borzong u ro.

²¹ Hatuka Pathian lungkhama om u tan la, Isua Krista lungkhamna zara umor damna na pek ranga nei ngak u anga.

²² Iam thei lui ngai lungkham mu u ro;

²³ senkhat moi ata chom u tan mazok u ro; Senkhat lungkham mu u ro anchi chunga, tenchu apuan u asiat ningolna sip matir u ro.

Borzong Anpakna

²⁴ Achulna ata anarung thei le masial abui raisan zapa ei lianna matona ana siak thei.

²⁵ Sandampu Pathian rong Isua Krista koini na Puma kom anlianna, thotheina, chongneina, machin ata, atun le umor umor tenpei om rase! Amen.