MARKIN 1 - Dankit Athar Le SAM (BSI)

Baptispu Johon Manchuna

¹ Pathian Sapa Isua Krista thangahui ei hong tung anphutna chu.

² Deari Isai a lekhana, “Enta, ‘Ka palai na matona ka tira aman na lam sin inti.’

³ Philchar rama min khek he han, ‘Puma lamlian sin u tan alam ngai manzik u ro,’ ” atina anziak ang han.

⁴ Johon Philchara Baptispu han asia andualna rang anrimna Baptisma rui rila a honga suak.

⁵ Hatuka Judai ram le Jerusalem khuana mi ngai dora asuak u na, a kom ase na ei siat u ngai andualna zonga Jordon dunga han a kom Baptisma achang u.

⁶ Hatuka Johon ha makingkang mul puan le anthuama, a kong me vun le akhita, a bu chu khairakuak le ram khuaining ei sak.

⁷ Hatuka ei ti, “Ka nuka koi ka neka alian bet a hong lai tak keng, anbu lapa a kekok ri sutrua ngal ni makung.

⁸ Koi chu ti le baptisma ka na pek u chachaka aman chu Ratha Anthiang le baptisma na pe unti,” tina arila.

Isua Themna le Baptisma

⁹ Hatuka hava nikhua ngai han hintin hin ei ni. Isua ha Galili ram Nazaret khua ata a honga Jordon dunga han Johona kom baptisma a honga chang.

¹⁰ Havalai tak han ti ata asuak phing le anvan anphela, Ratha vasu anga ama chunga ahonga chum amu.

¹¹ Hatuka, “Nang ka naipasal madit khit nanga hin ka rai ei san,” atina anvan ata he a honga suak.

¹² Hatuka Ratha han ama chu philchara atir lena.

¹³ Hatuka chu Soitan anthem chunga philchara han ni sommanli ramsa ngai bila a oma, vanpalai ngaiin a haso adom u.

Puma Isua Sin Phut

¹⁴ Hatuka Johon ansur suana Isuan Pathian thangahui rila Galili rama a hong, Pathian thangahui rila ei ti,

¹⁵ “Ahun akip zei Pathian ram um a honga nai zei anrim u tan thangahui hi iam u ro,” ati tira.

¹⁶ Hatuka Galili tindil kola ase tira, Simon le Simon a parual Andria chu tindila han len a denga amu na nga sur mi ei ni u.

¹⁷ Hatuka Isuan akom u na, “Na zi u ro, mi sura na sin u ka ti,” ati.

¹⁸ Hatuka len amaka azi len u.

¹⁹ Hatuka la rei luia ase u le Jebedi a naipasal Jakob le a parual Johon chu amu na, hangai ha len asin thei ngai rakuang dena ei om u.

²⁰ Hatuka aman hangai ha a kui lena, hantin han a pa u Jebedi chu anlo ei ruai ngai koma han rakuanga amak u na azi u.

Mi Rathasia Don

²¹ Hatuka Kapernaum khuana ava lut u na, hanke pongansani han ankhomna ina aluta a manchu.

²² Achong manchu ngai chu achang a mandong tham u na, Lekhanziakpu ngai ang ni lui ariat athei khit anga hangai ha ei manchu sika han.

²³ Hatuka ei ankhom u na ina han kachai ratha annim avong mi angkhat aleia om.

²⁴ Ama han “Nazaret Isua, koini le nang imo nei anzomna anan siat ranga hongmo na ni? Nang hi ka na riat Pathian mi Anthiang na ni,” tia ankheka asuak len.

²⁵ Hatuka Isuan angona, “Dairek ro, a sung ata hong suak ro,” ati.

²⁶ Hatuka kachai annim han ama asuisaka, anring sabaka ankheka a sung ata a honga suak.

²⁷ Hatuka alom u na amu ngai doran achang a mandong sabak u hantin han, “Hiva hi imo ei ni hi? Anchuna thar ke hi le, kachai ratha animin um arang sabaka chong apeka a chong a tel kiar hile,” tia ankhal u na.

²⁸ Hatuka Galili ram kola ramtina arui anthang len.

Isuan Mitampa Amandam

²⁹ Hatuka ankhomna in ata asuak u na, Jakob le Johon abila Simon le Andria ina ava lut u.

³⁰ Hatuka Simon a nungak a nu raitun atong ana aleia zala, hava len han arui ha Isua kom aril len u.

³¹ Hatuka aman a kut ava sura a mathuia, hantin han ei tun chu a mathana a dorbo adom len.

³² Hatuka khului tiang ani alut suana, dam lui dora le ramhuai ei sur ngai a kom ei hong ruai u.

³³ Khomi dora makot kola han a hong anchun lup u.

³⁴ Hatuka mi tampa ana tina ana ngai ha a mandam. Kachai atampa anota, kachai ngaiin ama he ei riat u sika chong ngam u mak.

Galilia Isua Chong Ril

³⁵ Hatuka zing khua var man anthuia a suaka, philchar muna asena hava muna bor ava zong.

³⁶ Hatuka Simon le a lom ngaiin um anuk azi u.

³⁷ Hatuka ama ava mu u lehan a kom, “Mi doran ana rok sole,” ati u na.

³⁸ Hatuka aman a kom u na, “Mun ateia khua naia han se u rei, sovan um chong kei ril theina rang hava ha kei hong suakna sik ei ni,” ati.

³⁹ Hantin han chong arila kachai ngai a not tira, Galili ram dora ei anchun u na in tin a lut tira.

Isuan Mi Mandam

⁴⁰ Hatuka a kom aphar khat a honga, “Na zot ten nana manthiang thei,” atia a makunga anboka a zong chian.

⁴¹ Hatuka ama han lungkham alei mu sabaka a ban a sura, “Ka zot anthiang ta ro,” ati pe.

⁴² Hantin han anlaiseka ei phar ha ahek lena anthiang len.

⁴³ Hatuka Isuan tute kom ite ril lui ranga anreng ro, ati.

⁴⁴ “Tenchu chaizung kom van en tan la, anthiangna ranga Mosi chongpek anga van dar ro ei riat thei u na ranga, ati pena aman se len.”

⁴⁵ Hanum nisela ama chu asuaka hava rui ha achalaka ankheka tang ahaia, a sintho hantin han anlanga. Isua ha khua lut thei lai maka Philchar rama ke ei om ani zei muntina mi a kom ke ei hong u.