LUKIN 1 - Dankit Athar Le SAM (BSI)

¹ Koini na kara rui atung min anziak rang aval u na.

² Amu ngaiin ei na ril u anga aphut len ata amu le a thang aril ngai.

³ Hasik han aphut len ata aveng koini sika antang thiara maziak ila santi ka ti, O Theophil.

⁴ Hiva hi nei anchu ngai dora nei anthiang theina ranga.

Johon Baptispu Anzir Rui

⁵ Judai rama Herod reng achang lai han, chaizung khat a raming Zakaria ama ha chaizung angkhat Abija tianga mi. A nungak Elizabet ham chaizung insungko mi.

⁶ Anin u Pathian mita asa le Puma dan ankhip ani u.

⁷ Nai nei u maka Elizabet ha aching hanuk atar ani rit u na.

⁸ Nikhat chu Zakaria a don a chuka Puma Biakina chaizung sin a thona.

⁹ Ei tho u dan anga ama don achuka marim ahui ahal ranga Puma Biakin sunga ava lut.

¹⁰ Marim ahui anhal lai tak han mipuiin tualpanga bor azong u na.

¹¹ Pathian vanpalai maicham changtiang andinga ahong anlang, marim ahui ei anhalna han.

¹² Zakarian amuna achi.

¹³ Tenchu vanpalai han, “Zakaria achi no ro, Pathianin na borzong alei riat, na nungak Elizabetin naipasal mazir inti a raming nei phua rang chu Johon.

¹⁴ Na raisanna lani inti mitampa arai lasan unti anzir tik.

¹⁵ Pathian riata milian ni inti, zu anri anhaina ton thei mak anzir len ata Ratha Anthiang bit inti.

¹⁶ Israel mi tampa a Puma a Pathian kom hong tuang ret inti.

¹⁷ Pathian matona Eliza anga arat le aliana se inti, pa le nai ngai munkhata hong ruai ret inti.”

¹⁸ Zakarian vanpalai kom ei ti, “Hintin hin anin hontin kei riat rang? Atar ka ni zeia ka nungak um atar zeia.”

¹⁹ “Koi hi Gabriel,” vanpalai han a masanga, “Pathian matona anding ana hongtir, hiva thangahui aril rang.

²⁰ Ten ka thang iam mak chena ahun taka ani rang. Nei iam nok sika chong thei no ta ni, chong kuluia nei om rang ka chong tin adik maseng.”

²¹ Havalai tak han mipuiin Zakaria amaruang u na: Ichangamo Biakin sunga ei sot sabak, ati u na.

²² Ahonga suaka chongthei maka anralna ei mu ranga a iam u na chong thei lai lui ei ni sika a kut le a chonga.

²³ Biakina a hun ahek le a ina ase.

²⁴ Nukhon uala a nungak Elizabet anraia tha ranga in mamaka.

²⁵ Nukkhita, “Puman anasan Aman mi matona ka maimokna a khai zei,” ati.

Isua Anzir Rui

²⁶ Elizabet ei anrai tharuk changa Pathianin Gabriel a tir Galili khopui Nazaret a.

²⁷ Ama han reng David akhuka mi Josephin ei lak rang nungak Mari kom thang ahong bang.

²⁸ Ha vanpalai ahonga atina, “Na kom, phukdaina om rase, Puma na bila a om borsang ana mantung.”

²⁹ Mari achan anpona vanpalai koma thang ariata, itinamo ati.

³⁰ “Achi no ro, Vanpalaiin atia, Pathianin lungkham anamu,

³¹ Von choi na tia naipasal mazir na ti, Isua atia raming phua na ti.

³² Ama chu lian inti, Ansangkhit Naipasal atia anpai inti, akhuk David anga amam reng lani inti.

³³ Hatuka Jakob akhuka umor reng changa, a rengchangna nikhua hek no ni!”

³⁴ Marin vanpalai kom a tina, “Anthiang ka ni pasal le ngal lan remakung hontinmo nini?”

³⁵ Vanpalaiin a masanga, “Na kom Ratha Anthiang hong inti, Pathian ranak na chunga chum inti, hasik han ha naite anthiang ha Pathian nai anti inti.

³⁶ Na unai nu Elizabet ha re ro, nai nei lai no ni atina tenchu atun hin tharuk ani zei ei anraina.

³⁷ Asik chu Pathianin ei tho thei nok ngal om mak.”

³⁸ Marin ei ti, “Koi hi Pathian suak ka ni nei ti anga ka kom tung rase.” Hatuka vanpalaiin a mak.

Marin Elizabet ava En

³⁹ Hava suale han anrapa Mari ansina tang ram khopui Judai rama asena.

⁴⁰ Zakaria in ava luta Marin Elizabet apham.

⁴¹ Marin ei pham Elizabetin ariata a von sunga naite singansa, Elizabet ha Ratha Anthianga abita.

⁴² Anring pana ankheka, “Nang hi nupang kara chanasa na ni na rila mara ham ani.

⁴³ Ichangamo hintin aliantak ka chunga ei tung rang, ka Puma nu ana en ahong.

⁴⁴ Nei na pham kei riat le ka von sunga naite antom.

⁴⁵ Nang a iam nu van asa na ni asik chu Puma chong ei kip rang ei ni sika.”

Marin Anpakna La Tho

⁴⁶ Marin ei ti, “Ka rathan Puma a manpak;

⁴⁷ Ka ratham a raiasan Pathian anan dampu sika,

⁴⁸ Asik chu asuak annuai mangil mak! Atun ata chu mi doran van asa na ti inti,

⁴⁹ Asik chu Pathian ranak anei han Ka chunga sin alianpa ei tho sika a raming chu anthiang.

⁵⁰ Ama lalchi tho ngai chu akhuk kipa lungkham amu.

⁵¹ Aban alian le sin alianpa a thona milian ngai chu ei mandon le amasiat.

⁵² Reng alian ngai chu a sutmun ata amasula, annuai ngai a mansang.

⁵³ Ancham ngai sak asapa ngai le aman khop a nei ngai kut koronga a man se.

⁵⁴ Na chipui ngai kara achongtin ha ariattita asuak Israel ahongsan.

⁵⁵ Abraham lungkham ei mu rang ariat tita, a nai ngai um umor tenpei.”

⁵⁶ Mari ha Elizabet le thanthum a oma a ina a kir ret.

Johon Baptispu ei Anzir

⁵⁷ Elizabet nai ei nei hun asuak le chu naipasal a mazira.

⁵⁸ Puma ei satzia azil akiang ngaiin ariata, Elizabet a bila amanin arai a mansan u.

⁵⁹ Hapta khat suale vun at ranga ati u na a raming um a pa raming anputa Zakaria ati rang ati u na.

⁶⁰ Tenchu a nun, “Johon ke nei ti rang,” atina.

⁶¹ “Hava raming le nei anphana ngal ommak do,” ati pe u na.

⁶² Ankhina le a pa a rakel u na, “Imo raming nei phua zot,” ati u na.

⁶³ Zakarian anziakna a zonga a maziaka, “A raming chu Johon.” Hatuka mipui anlai huak.

⁶⁴ Havalai tak han Zakaria achong ret theia, Pathian a manpak.

⁶⁵ A kho mi ngaiin achi u na, hava rui ha tang ram tiang Judana avan thek.

⁶⁶ Ariat doran andonna a neia hatuka a rakel u, “Hiva naite hi imo ei ni rang?” Anthiang vang Puma ranak a bila om.

Zakarian alei Ril

⁶⁷ Johon a pa Zakaria Ratha Anthiang abita, Pathian chong arila:

⁶⁸ “Tho Puma manpak u rei, Israel Pathian ha! A mi ngai asan ranga a honga a mazok zei.

⁶⁹ Koini narang Sandampu lian tak ana pek, a suak David akhuk ata.

⁷⁰ Tiana ami a deari anthiang le a khomak ansamna,

⁷¹ Anadui ngai ata anan zok ranga, anan mumak ngai ata anan zok ranga.

⁷² Na chipui ngai lungkham mu ka ting atina hatuka a chongtin anthiang ha mangil maka.

⁷³ Na chipui Abraham koma chongtin ha.

⁷⁴ Anadui ngai ata na mazok inti, achi thak luia a sin anan tho ranga.

⁷⁵ A makunga na damsung anthianga asa dima a oma.

⁷⁶ “Ka nai nang hi Pathian Ansangkhit a deari lanti na ti. Puma matona a lampui asin ranga lei se na ti.

⁷⁷ Nei siatna u ngai anduala zok un na ti atina a mi ngai ava ril.

⁷⁸ Koini na Pathian chu lungkhamna abit. Aman sandamna ra-ang le na el inti,

⁷⁹ hatuka thina ralima om ngai vanram ata el inti, Phukdaina tiang nei phet theina rang, na ke phet rung inti.”

⁸⁰ Ha naite ha taksa le rathana ansona. Israel mipui matona anlang man pei chu philchar rama a om.