Kolosa 1 - Dankit Athar Le SAM (BSI)

¹ Paul, Pathian ei zota Krista Isua zolai le koini na parual Timothi akoma,

² Kolossana Pathian mi ngai koini na lom aiamrua Kristana munkhat ngai rang. Pathian koini na Pan lungkham le phukdaina na pe u rase.

Borzonga Raisanna Aril

³ Nangni na rang bor na zong le Pathian, Puma Isua Krista a Pa kom raisanna na ril chachak.

⁴ Krista Isua nei iam u na na lei riat hatuka Pathian mi ngai lungkham nei mu.

⁵ Pathian chong adik ha thangahui nangni na kom ahong mansa lai han sabeina ei pek rui na riat u na. Hasik han nei iamna le lungkhamna ha nei sabeia hanke ei anbetok, hava ha na rang vanrama ana siak pe.

⁶ Thangahuiin borsang ahong choi tira hatuka hava ha ramuala anthek tira, nangni na kara anga Pathian lungkhamna na riat mansa u nikhua hatuka nei hong riat u imo atak taka ei ni.

⁷ Pathian lungkhamna rui nei hong riat u koini nei madit Pathian suak Epaphra kom ata, ama hi a iamrua, Krista sin atho koini na rathula.

⁸ Ama han ana ril Rathan lungkhamna ei na pek u.

⁹ Hivasika hin nei riat len ata nangni na rang bor nei zong, Pathian ei zot na manthei u rase nei ti aloma hianna le riatrua Rathan ei pek.

¹⁰ Hanke Puma ei zot anga nei om thei rang hatuka a malung do anga nei tho rang. Asa tin hong tho thei na ti, hatuka Pathian tianga riatna anson inti.

^11-12 Ei lianna ranak ata le arata om thei u ro, phukanchuala aloma nei diar thei u na rang. Hatuka raisana Pa kom raisan chong ril u ro arua ananni Pathianin ei hoi changai ei man ranga ha ra-ang reng rama.

¹³ Azing thotheina ata ana mazok hatuka adama anai madit reng rama ana hong ruai.

¹⁴ Azara zokna nei man, hava ha, nei masial ngai ei madual.

Isua Minina le Asin

¹⁵ Krista amu sa ha, amu salui Pathian aphua. Ama hi Naipasal anzir mansa, ansin ngai bila alian khit.

¹⁶ Asik chu ama lehan Pathianin aloma ei sin anvana phila, amu sa amu salui, ratha sintho theina doram, puma ngai, a op ngai, racham anei ngai, Pathianin aloma ama le ei sin ama rang.

¹⁷ Krista ke mankhita a om atei a om man ama le anlopa alompeia dora amuna ei om.

¹⁸ Ama hi taksana alu, kuibing ha; ama hi taksana nuk ei hong suakna. Ama hi Naipasal mansa athi ata ahong anthui ha, ama rong ha mun mankhita achang ranga aloma alompeia ata.

¹⁹ Asik chu Pathian ruisat ata ke Naipasalin akom Pathian nina ei don.

²⁰ A Naipasal, Pathianin ramual pumpui akom ahonga koi ret ha a rui masat. Pathianin a Naipasal thisena Krosa anngoina asin hasik han akom aloma ei hong koi ret phila le anvana.

²¹ Voikhat chu Pathian ata alapana nei om a raldui nei ni asik chu asia nei tho le nei mandon.

²² Tenchu atun, a Naipasal taksa thinan, Pathianin a mala ei na sin nang ha akom, anthinga, asana masial abuia ei na ruai theina rang.

²³ Anngoina deta le iamrua ni tit ro, singansa theia om no ro ha sabeirua thangahui nei riat ata. Hiva thangahui hi ani koi Paul asuak kei hongni, hiva thangahui mi tin kom anril ramuala.

Paul Kuibing Suak anga Sinatho

²⁴ Na sik u na kei teng hin ka rai asan, ka taksana duk kei teng hin Kristan ei teng rang alan sua nok ka sana kan riat a taksa ngai rathula ha kuibing ha.

²⁵ Hatuka koi hi Pathianin kuibing suaka ei na sin, hiva sin nangni satna ranga ei na pek. Hiva sin hi ama chong aril sin,

²⁶ hava ha tianlai ata ei hong thup miring riat rang ata ten atun chu ami ngai kom a manlang zei.

²⁷ Pathian mansuk chu a chong maruk ami ngai anriat, hiva a chong maruk alian le alu sabak hi mi dora ranga. Ha maruk ha Isua na koma ei om ha. Hava tina chu Pathian lianna nangin nei mang rang.

²⁸ Hasik han mi dora kom Krista rui nei ril, hatuka thotheina dora le nei rakok nei manchu Pathian matona puiating anga Isua len lopa.

²⁹ Hiva ei ni na ranga kei chei kei put, Kristan ei na zon ha ranak alian amanga hava ha ka sunga sin atho.