Galatia 1 - Dankit Athar Le SAM (BSI)

¹ Paul akoma, miring kuina na ruaisi achang ni mak miring atam ni mak, ten Isua Krista le Pa Pathian athi ata ama anthui han.

² Hivana kuibing ngai doran ka bila Galatia kuibingin kut anan sur pui u.

³ Pathian koini na Pa le Puma Isua Kristan lungkhamna le phukdaina na pe u rase.

⁴ Atun taka hun asiata koini anan zok ranga, Kristan koini siat sika anpek, Pa Pathian hetela.

⁵ Pathian kom anlianna umor umora om rase! Amen.

Thangahui angkhat

⁶ Na chung u na ka boi adong! Chomokhata Krista lungkhama anakui u havan ata atei, thanghuia nei va kai ret u.

⁷ Ataka thangahui hi “atei om lai mak,” tenchu hiva kei tina asik chu mi senkhat a om anan chai u na Krista thangahui athulna aval.

⁸ Tenchu koini mo, vanpalai ngalin, vanram ata honga thangahui aril rang ni rase thangahui koinin nei ril le antei ten khomak tung rase, moisumpuia se rase.

⁹ Hava man na ril zei hanum nei ril ret; thangahui nei pom sua u le antei ahong ril ten khomak tung rase, moisumpuia se rase!

¹⁰ Miring riatpui mo kei put? Ole Pathian riatpuina mo! Mi koma anthang mo kei val? Hantin han kei val aniten Krista suak ni no ning.

Hontinmo Paul Kuitir Eini

¹¹ Ka lom ngai na ril u ka ti, thangahui kei ril hi miring ata ni mak ei hong suak.

¹² Miring ata ni mak kei man tute ananchum om mak. Tenchu Isua Krista hake ka koma anlang.

¹³ Ka na ril u zeia hontinmo kei om Juda ngai ei iam ka zi lai han, hontinmo lungkham abui thaka Pathian kuibing ngai kei sinsak chachak, hatuka ansiat rang kei val.

¹⁴ Koi hi akal khit ka lom Juda ngai ranga Juda tho ngai anchu ruia chu, hatuka achalaka anpek sabak na chipui ngai tho dan ruia.

¹⁵ Tenchu Pathian alungkhama kan zir mana ana leia thang, hatuka ana pai ama sin atho ranga, hatuka a Naipasal anlanga amasata.

¹⁶ Jentail ngai kom thangahui kei ril theina ranga tute kom ankel ranga se makung.

¹⁷ Hanuk Jerusalemam se makung kuitir ka mana aleia chang ngai kom a en ranga. Tenchu Arabia tiang ka se lena hatuka Damaska tiang ka kir.

¹⁸ Kum anthum suale Jerusalem tiang ka se Pitor kom ruitang ariat ranga hatuka ni somleimanli abila ka om.

¹⁹ Zolai atei kei mu om mak Jakob Puma anaipa rong nok chu.

²⁰ Kei maziak hi adik. Pathianin ariat milak ni mak kei tho.

²¹ Hava suale mun ateia ka se Suria le Kilikia na.

²² Hava lai tak han Judai kuibing mi ngaiin na la re u mak.

²³ Min ei ril ngai rong ha a riat u. “Ha miring mi ansinsak chachak ha atun chu hava ansiat ranga ei val iamna rui aril zei!”

²⁴ Hatuka ka sika Pathian amanpak u.