Filemon 1 - Dankit Athar Le SAM (BSI)

¹ Paul Krista Isua sika ankhum le na parual Timothi akoma. Na mal le na sinthopui Philimon arang,

² hatuka na ina kuibing ankhom ngai le na sarnu Aphia hatuka na lom sipai Arkipa koma:

³ Pathian koini na Pa le Puma Isua Krista lungkham le phukdaina na pe u rase.

Philimon Alungkham le Iamna

⁴ Ka parual Philimon, bor ka zong kip pei, nang ka na riat Pathian kom raisanna ka mantung.

⁵ Pathian mi ngai nei aditna le iamna nei don Puma Isua tak chunga.

⁶ Ka borzong chu kuibing anga nei anchunna han anthuka anriatna aborsangtin na dam sunga nei don Krista le anlopa.

⁷ Na lungkham han ka parual madit, raisanna lian sabak ana mantung hatuka ka ak a mathui! Pathian mi ngai malung rai na mansan.

Onesima rang Amathem

⁸ Hiva sika hin kei anngam Kristana na parual anga, nang tho ro keina ti imo atho rang ha.

⁹ Tenchu keina dit sika ke keina mathem hiva kei tho koi Paul Krista Isua palai atuna ama sika lungina ankhum.

¹⁰ Hasik han Onesima a rathula keina mathem, Kristana ka nai; lungina ka om lai han rathana a pa kei ni.

¹¹ Voikhat chu na rang a mangrua nilui atun chu nang le ka rang a mangrua ani zei.

¹² Na kom atun ka hong manhong ret hatuka abila ka malung um ahong.

¹³ Hivan lungina kan khum lai ka bila ka don zot thangahui sika, nang nei omna na ei na san theina ranga.

¹⁴ Hanum ni rase anasan ranga therkhaka na ti sa ret makung, ten nang nei zotna le atho ni tan la. Hasik han ite tho no ning na zot nok ten.

¹⁵ Onesima ha ei ankhai tot ni inti na kom ata tenchu nei manchian na ranga ke.

¹⁶ Atun chu suakamin duai nilai mak tenchu suakamin neka ansang; ama hi Kristana na parual madit, koi kei madit ei ni! Nang na rang chu itukmo andit rua ei ni sa rang Pumana.

¹⁷ Hasik han na lom anga nana betok ten lei pham ret ro koi nei na pham rang anga.

¹⁸ Ei masial a oma ei antang a om ten koi kei thuan ranga ni rase.

¹⁹ Hivan ka kut le maziak ka ti: Koi, Paulin, na thuan ka ti, ka kom nang antanga nei anriat ana ril chu ni makung.

²⁰ Hasik han parual lungkhama hiva hi na tho pe ro, Puma sika; Kristana parual anga ka rai na man san ro!

²¹ Ka iam nget hiva kei maziaka hin lei tho na ti, ka riat hava neka tho na ti.

²² Hava bibila, ka rang tadan lei manliang ro, asik chu Pathianin na borzong amasang ranga ka iam nangni na koma ana pek ret ranga.

Chibai Hekna

²³ Epaphra ka bila ankhum Krista Isua sika aman chibai ana tho u,

²⁴ hanuk ka sin thopui Mark, Aristarka Dema le Luk ngaiin chibai ana tho u.

²⁵ Puma Isua Krista lungkhamna nangni kom om rase.