2 TIMOTHI 1 - Dankit Athar Le SAM (BSI)

¹ Paul Krista Isua ruia damna chongtin anga Pathian zota Krista Isua kuitirin kei adit ka naipasal Timothi ranga.

² Pa Pathian le na Puma Krista Isua ata lungkhamna andualna le anngoina om rase.

Raisanchong le Malungharna

³ Pathian kei biakna ka pa khuk ata sia le sa riata kei om ama kom raisanna kei ril hi kei mathemna na keina mandon babang.

⁴ Na mit rathi ka mandona sun zan ana mu rang kei zot ka raisan ei kipna ranga.

⁵ Na malunga nei iam tatak chong ka mandona, man ata na pi Loisi le na nu Euniki a malunga a om ha, hanuk ka malunga achui na komam a om ni inti.

⁶ Hiva sika keina man riat sir ani zei, ka kut keina dap lehan Pathian lungkham pek na koma a om hava ha mathok ro.

⁷ Asik chu Pathianin koini hi chithaiandok Ratha na pe mak tenchu arat, andit le ahian Ratha ke ei na pek.

⁸ Hantin han koini na Puma arui anril hanuk aman ei khit ha koi ka ruia anzak no ro, tenchu Pathian aranak anga han thangahui lehan antak atong ranga nuam ro.

⁹ Ama hin koini hi ei na mazok hanuk kuina anthiang le ei na kui; koini na sin tho ang taka han ni mak, tenchu ei mansuk le a lungkham anga han ei tho, ha lungkham ha anphut man ata Krista Isuana koini hi ei na pek.

¹⁰ Hanuk atun koini anan zokpu Krista Isua ei hong anlangna lehan ei anlang ani zei, ha athi ranak abuia hanuk thangahui lehan damna le siat luina ra-anga ei hong koi.

¹¹ Hava thangahui aruia koi hi kuitira antir le minchupu atia anphun kei ni.

¹² Hava sika hidor pei antak um kei tiar. Hanum kei anzak nok asik chu ha kei iampu ha ka riat, hanuk angir phita kei mandeta, akoma kei siak tak ha ama han hava nikhua ranga han hava ha asiak thei ti hi kei anngam ani.

¹³ Ka koma nei riat ha, adeta sur ro, om lak rua Krista Isua ruia iama le andita anvo ro.

¹⁴ Na koma han nei asa ansiaka om, hava ha koini na malunga aleng ha hava Ratha Anthiang lehan rung ro.

¹⁵ Na riat hale Asiana a om ngai ha alom u na ka kom ata anheng zit u zei, amani bila Phugella le Hormagen a om.

¹⁶ Puman Onesiphor a in kua lungkham mu rase. Asik chu ka ning aman bui babang, hanuk kei ankhit sika lei anzak mak.

¹⁷ Haneka aman ke Roma ava suak le asadima ana roka anan tong pui.

¹⁸ Puman ama ha hiva bor hi pe rase ha Nikhua tik le! Ama ha Puma kom lungkham man rase hatuka Ephesina ama han itukmo haso ei adom hava ha nangin na riat kiar u.