2 PITOR 1 - Dankit Athar Le SAM (BSI)

¹ Simon Pitor Isua Krista a suak le a zolai akoma Koini na Pathian le Isua Krista sandampu dikna sika iamna alu koini nei man anga aman ngai kom.

² Lungkhamna le phukdaina Pathian le Puma Isua Krista nei riatna na abita nangni ranga ni rase.

Pathianin ei Kui le Eiathang

³ Pathiana chunglam ranak han aloma ei na pek nei nang dora adika Pathian mi ni theina ranga ana paipu riatna na ama lianna amang pui ranga le ei satna amang pui rang.

⁴ Hivantin hin a chongtin alu sabak le alian chu ei na pek, hankeng hava pek ngai lehan anansiat thei ningol ata nei zok thei hi ramuala, hatuka chunglam kanun nei chang thei.

⁵ Hivasik piala hin nei phari dorpei satna sap ranga nei iamna tak chunga, tho u ro; satna chunga riatna sap u ro;

⁶ riatna chunga anrung theina sap u ro; anrung theina tak chunga adiarna sap u ro; adiar theina chunga Pathian mi nina sap u ro,

⁷ na Pathian mi nina tak chunga Kristian lungkham sap u ro; hatuka Kristian lungkham chunga anditna sap u ro.

⁸ Hiva nina ngai hi nei nang; hatuka atama na don ten, Puma Isua Krista riatna ruia na manrat unti na mantho thei unti.

⁹ Tenchu hava ngai ha na don nok ten mit acho ang ni u na tia muthei lai lui anngil machina ei masial ngai ata anthiang sua ei ni ha.

¹⁰ Hasik han ka unai ngai put sa u rei Pathian kui le ei athang nei ni hi adeta ariatna; hintin na tho ten nei iam u na siat no ni.

¹¹ Hivan tin hin ke koini na Puma le sandampu Isua Krista umor Rengrama alut theina ei na pek u rang.

¹² Hasik han hiva rui hi na man re bang u ka ti, na riat kiar sua unam hanuk adeta anding sua dikna nei man u na han aninam.

¹³ Ka rang asa kei ti chu ka dam kar hin hava ngai rui nei riat u na ha man har tit rong.

¹⁴ Kan riat hiva athi thei taksa hi anrapa ankhai inti, Koini na Puma Isua Kristan anthiang vanga ei na manthei anga.

¹⁵ Kei phari dorpei tho ka ti hiva rui nei riat tit thei u naranga lampui khat na zon u rong ka thi suanam nei riat tit u na ranga.

Krista Lianna Amu

¹⁶ Sim anphua papeia anboia nangni anriat ranga anliana Puma Isua Krista hong rang rui hi nei ril nimak. Koini na mit nget le ei lianna nei mu.

¹⁷ Pa Pathianin anlianna apek lai han koinim na om, a kom he ahong lai han Anlianna Ansangkhit kom ata, ei ti chu, “Hiva hi ka Naipasal madit, ama hin ka raiasan!”

¹⁸ Koini ngaiin ha he ha na riat vanram ata ei hong ha mual anthianga abila na om lai han.

¹⁹ Hasik han deari ngai chong rila nan ngam sa. Asa tho sa u ro hiva atel ranga, asik chu lem anga azinga el, ansal maseng hatuka na malung sung u na zing sikhovar a el.

²⁰ Atei atang neka re u ro Pathian chonga maton rui riltheina tuten manthiang thei mak me.

²¹ Asik chu deari chong dora hi miring racham ata hong nimak, tenchu mi ngai ha Ratha Anthiang maruaia a oma Pathian chong aril u le Pathian kom ata hong ha.