KIIRO 23 - Qullaawa Maxaafa

BELEAAMIHA UMI HIMANA

¹ Beleaami Baalaaqi, «Konniicho 7 kakkalote darga seekkite, 7 woraammanna 7 ge'reewu gocca abbi» yiisi.

² Baalaaqino Beleaami kulinosi gede assi. Lamunku umu umunni mitto mittonka darga mitto mitto woraamonna mitto mitto ge'rechu goco kakkaltu.

³ Hakkunni gedensaanni Beleaami Baalaaqira, «Kaaliiqi anewa daannotanna hoogannota mare afe higammo geeshsha, ati konniicho shilqote kakkalokkiwa agari; leellishinoere baala daye kuleemmohena» yiisi. Hakkunni gedensaanni Beleaami callichisi mittu gaari iimira fuli.

⁴ Maganuno isiwa dayenna Beleaami, «Kune 7 kakkalote darga seekkoommo; mittu mittunku dargira mitto woraamonna mitto ge'rechu goco kakkaloommo» yii.

⁵ Kaaliiqino Beleaamira coyi'rannore kulisihu gedensaanni galagale Baalaaqiwa maranno gede assisi.

⁶ Galagale higanno woyite Baalaaqi Moaabi gashshaano baalunku ledo shilqote kakkalosi mule uurre no.

⁷ Hakkunni gedensaanni Beleaami himana coyi'ranni, «Baalaaqi Sooriyunni soojjaati ilaallawiinni woshshe abbe"e, ‹Amo Israeelete manna rumie› yiino.

⁸ Maganu ruminokkire, ani hiitto asse rumeemmo? Kaaliiqi xiiwinokkire, ani hiitto asse xiiweemmo?

⁹ Insa ilaallate birxera uurre, gaarrate aana hee're laeemmo. Wolu manniwiinni baxxite, insanaa maganiweelo gosa gede assite kiirtukkinni, heedhannore afeemmo.

¹⁰ Israeelete manni bukote gede, kiirre anfannikkiho. Keeraanote reyo ani reyo; gawalo'yano insate gedeeta ikkito!» yii.

¹¹ Baalaaqino Beleaamira, «Togo mayira assattoe? Ate woshshi'roommohu diina'ya rumattoraati. Ati kayinni insa maassi'roottota ikkinnina wolere mittoreno diassootto!» yiisi.

¹² Isi qole, «Kaaliiqi kulinoere coyi'ra dihasiissannoe?» yii.

LAYINKIHA BELEAAMI HIMANA

¹³ Baalaaqi Beleaamira, «Kai, shiimu manni callu leellanno widoonni sa'neenna hakkiicho heedhe rumattona» yiisi.

¹⁴ Hakkunni gedensaanni Fisiga Ilaali umira noo xawo Tsofiimi yinanniwa haa're massisi. Hakkiichono 7 kakkalote darga seekke mitto mittonka darga 1 woraamonna 1 ge'rechu goco kakkali.

¹⁵ Beleaamino Baalaaqi, «Ani Maganunni xaade higeemmona, ati konniicho shilqote kakkalokkiwa agari» yiisi.

¹⁶ Kaaliiqi Beleaami ledo xaade yaannore kulisihu gedensaanni galagale Baalaaqiwa maranno gede assisi.

¹⁷ Isi galagale higanno woyite Baalaaqi Moaabi gashshaano ledo shilqote kakkalosi mule uurre no. Baalaaqino, «Kaaliiqi mayihe?» yee xa'misi.

¹⁸ Beleaamino himana coyi'ranni, «Sefoori beetto Baalaaqi! Shiqqi yite kuleemmohere macciishshi.

¹⁹ Maganu mannu gede dikaphanno; mannu gede coyi're digaabbanno. Uyino hexxono wonshanno; coyi'rinore baala assanno.

²⁰ Maassi'reemmo gede hajajo uyinoe; isi maassi'rinoha ani soorrammora didandeemmo.

²¹ Israeelete manni aana, bunshenna qarra diafoommo. Kaaliiqi Maganinsa ledonsa no; isi mootensaati.

²² Maganu Gibitsetenni fushshinonsa; gaarraanchu gede ikke gaaraminonsa.

²³ Israeele bita diamaddanno; gojuno di"iillannonsa. Wole gosano Israeelete mannire coyidhanni, ‹Kune Maganu assinonsare la'e› yitanno.

²⁴ Israeelete manni, wolqaataamu doobbiichi gedeeho. Togoo doobbiichi shee mundee agikkinninna, bibbide itikkinni dihiganno» yii.

²⁵ Hakkunni gedensaanni Baalaaqi Beleaamira, «Maahoyyena ruma giwitto woyite, maassidhootixa!» yiisi.

²⁶ Beleaamino, «Kaaliiqi yiinoere calla assa hasiissannoeta dikuloommohe?» yee dawarisi.

BELEAAMIHA SAYIKKI HIMANA

²⁷ Hakkunni gedensaanni Baalaaqi Beleaamira, «Kai hanni wolewa ha'nona; miteekke Kaaliiqi hakkiicho rumattora fajjannoha ikkannona» yiisi.

²⁸ Baalaaqi yiinonte gede Beleaami halallitte gobba eela qolle la'nanniwa Fegoori Ilaali birxe haa're massisi.

²⁹ Beleaamino, «7 kakkalote darga seekkite, 7 woraammanna 7 ge'reewu gocca qixxeessi» yiisi.

³⁰ Baalaaqino Beleaami yiino gede assi. Mitto mittonka kakkalote darga mitto woraamonna mitto ge'rechu goco abbe kakkali.