Isaías 1 - Quechua Ayacucho Bible 1987

Juda nacionpi runakuna ancha huchallikuq kasqankumanta

¹ Juda nacionpim qatinasninpi gobiernarqa Rey Uzias, Rey Jotam, Rey Acaz hinaspa Rey Ezequias. Paykunapa gobiernasqan tiempopim Amozpa churin Isaiasman revelacionninpi Tayta Dios rimapayarqa Juda nacionpa chaynataq Jerusalen llaqtapa contranpi:

² Cielokuna, uyariychik Tayta Diospa nisqanta. Kay pacha, qampas uyariy paypa kayna nisqanta: Uywarqanim hatunyanankama churiykunataqa, ichaqa contraypim hatarirunku paykunaqa.

³ Bueyespas reqsinmi dueñontaqa. Asnopas reqsinmi mikunan artesantaqa. Reqsinmá dueñonpa churasqan artesataqa. Israelpa castan runaykunaqa manam reqsiwankuchu. Israelpa castan runaykunaqa manam entiendewankuchu.

⁴ Ay ¡imaynaraq kankichik, kay nacionpi huchasapa runakuna! Ay ¡imaynaraq kankichik, mana allin ruraykunawan intusqa runakuna! Yaw, mana allinlla ruraq miraykuna. Yaw, huchalla ruraq churikuna. Tayta Diosmantam karunchakurunkichik. Israelpa yupaychasqan Chuya Diosmantam rakikurunkichik. Israelpa yupaychasqan Chuya Diostam qepancharunkichik.

⁵ ¿Imanasqataq castigachikuytaraq munankichik? ¿Imanasqataq manaña kasukuq rikurirunkichik? Heridayoqmi kachkankichik enteron umaykichikpi. Llapallaykichikmi llakisqa kachkankichik sonqoykichikpi.

⁶ Chaki pampaykichikmanta umaykichikkamam qamkunapiqa mana imaykichikpas kanchu sanoqa aswanqa toqyasqa heridakunallam kachkan. Punkisqa, kichasqa heridakunallam kachkan. Manam pipas chaykunataqa hampirqachu. Manam pipas chaykunataqa watarqachu. Manam pipas aceitellawanpas llusiykurqachu.

⁷ Nacionnikichikmi chunnichkan. Llaqtaykichikkunam rupachkan. Chakraykichikpi tarpusqaykichiktam forasterokunaña qayllaykichikpi mikuchkan. Forasterokunapa purmachisqanku hinam chakraykichik chunnichisqa kachkan.

⁸ Sion Moqopi llaqtam sapallanña qeparun. Uvas huertapi chuklla hinam sapallanña qeparun. Pepino tarpusqapa chawpinpi hatus hinam sapallanña qeparun. Enemigopa muyurirusqan llaqta hinam sapallanña rikurirun.

⁹ Sichu Llapallan Kamachiq Tayta Dios mana saqeykuwaptinchikqa, otaq ñoqanchikmanta as runallatapas mana puchuykachiptinqa kunallanmi Sodoma llaqta hina kachkachwanchik karqa. Chaynallataqmi Gomorra llaqtamanña rikchakuchwanchik karqa.

Tayta Diostaqa imaynam adoranamanta

¹⁰ Sodoma llaqtapi hina kamachikuqkuna, uyariychik Tayta Diospa palabranta. Gomorra llaqtapi hina runakuna, entiendeychik Diosninchikpa yachachikuyninta.

¹¹ Tayta Diosmi nin: ¿Imapaqtaq valen achkallaña animalkuna wañuchipuwasqaykichikpas? Amiruniñam carnerokunata wañuchipuwaspa wiran kañapuwasqaykichiktapas. Malta torokunapa yawarnin chaqchusqaykichiktaqa millakuruniñam. Carnerokunapa chaynataq chivatokunapa yawarnin chaqchusqaykichiktaqa millakuruniñam.

¹² Qamkunam hamuwankichik ñoqawan tupanaykichikpaq, ichaqa ¿pitaq kamachisurqankichik temploypa pationta sarutyanaykichikpaq?

¹³ Kawsaykunamanta yanqapaq ofrendataqa amaña apamuwaychikñachu. Chay ofrendakunapa qosnintaqa manañam aguantaniñachu. Mosoq killakunapi fiestakunapaqmi runakunata huñunkichik. Samana punchawkunapi fiestakunapaqmi runakunata qayankichik. Chaywanpas manañam aguantanichu chay fiestakunataqa. Manañam aguantanichu huchallikuq runapa fiestankunataqa.

¹⁴ Mosoq killakunapi fiestaykichikkunataqa pasaypaqtam cheqnipakuruniña. Hatun fiestaykichikkunapaq huñunakuynikichiktapas llumpa-llupaytam amiruniña. Llasaq carga hinam ñoqapaq chaykunaqa. Amiruniñam chaykuna apaytaqa.

¹⁵ Makikichikta hoqarispa mañakamuwaptikichikpas qamkunamantam asurichini ñawiykunatapas. Achka kutita mañakamuwaptikichikpas manam uyarikichikchu qamkunataqa. Yawarwan qachachasqam kachkan makikichikqa.

¹⁶ Mayllakuspa limpiakuychik. Mana allin ruraynikichikta qayllaymanta asurichiychik. Mana allin rurayta saqeychik.

¹⁷ Allin rurayta yachaychik. Allin arreglo rurayta maskaychik. Ñakarichiqtapas allintaña rurananpaqyá yachachiychik. Mana tayta-mamayoqta defiendeychik. Viudakunapa asuntonman sayapakuychik.

¹⁸ Ñoqa Tayta Diosmi nini: Kunanyá ñoqaman hamuychik. Kunanyá ñoqawan tanteanakusunchik. Cochinilla hina guindoña huchaykichik kaptinpas ritita hinam yuraqyachisaq. Morado colorniyoqña huchaykichik kaptinpas yuraq millwata hinam yuraqyachisaq.

¹⁹ Sichum kasuwayta munaspaykichikqa allpapa allin ruruntam mikunkichik.

²⁰ Sichu mana kasuwanaykichikpaq hikutakuspaykichikqa guerrawanmi tukusqa kankichik, chaynatam ñoqa Tayta Dios nikichik.

Jerusalen llaqtapi runakunata Tayta Dios limpiananmanta

²¹ ¿Imaynanpimá chuchumikayarunkiqa confiakunay llaqta kachkaspaqa? Ñawpaqtaqa runaykikunam allin arreglota ruraqku. Allin kaqkunallata ruraspankum paykunaqa kawsaqku. Kunanqa runamasinku wañuchiqllañam runaykikunaqa kachkanku.

²² Qollqekipas chulluchisqa qollqepa puchuqnin qacha hinañam rikurirun. Sumaqllaña vinoykipas yaku hinañam rikurirun.

²³ Kamachiqnikikunam pasaypaq mana kasukuqkuna. Kamachiqnikikunam suwakunapa amigonkuna. Llapallankum qollqewan rantichikunku. Regalokunallatam paykunaqa maskanku. Mana piyniyoqkunatapas manam allintaqa arreglankuchu. Viudakunapa asuntontapas manam nanachikunkuchu.

²⁴ Chayraykum Llapallan Kamachiq ñoqa Tayta Dios nini. Chayraykum Israelpa yupaychasqan kallpasapa Diosnin nini: Kunanmi ichaqa cuentata mañasaq contraparteykunamanta. Kunanmi ichaqa vengakusaq chay enemigoykunamanta.

²⁵ Yapamantam atiyniywan qamkunata castigasqaykichik. Chulluchisqa qollqepa puchuqnin qachata hinam limpiasqaykichik. Chulluchisqa metalpa mana valeqninta hinam rakisqaykichik.

²⁶ Ñawpaq tiempopi hinam churasaq qamkunapaq juezkunata. Qallariyninpi hinam churasaq qamkunapaq consejaqnikichikkunata. Chaykunata qanwan ruraptiymi kaqllamanta runakuna: “Allinkuna ruraq runakunapa *f**yachanan llaqta” nispa sutichasunki. Chaykunata qanwan ruraptiymi kaqllamanta runakuna: “Tayta Diospa confiakunan llaqta nispa” sutichasunki.

²⁷ Sion Moqopi *f**yachaqkunatam allin arreglokunata ruraspay librasaq. Sion Moqopi *f**yachaq wanakuqkunatam allinkunata ruraspay librasaq.

²⁸ Mana kasukuqkunawan huchasapakunaqa ñutusqam kanqaku. Ñoqamanta karunchakuqkunaqa chinkachisqam kanqaku.

²⁹ Penqarikunqakum kuyasqanku encina sachakunamanta. Uyankupas pukayanqam diosninkuta adoranankupaq akllasqanku huertakunamanta.

³⁰ Rapinkuna wichirachisqa encina sacha hinam kankichik. Manaña yakuyoq huerta hinam kankichik.

³¹ Kallpasapa runapas qopa hinañam karunqa. Rurasqankunam nina chispa hinaña rikurirunqa. Manaña pipas amachaqnin kaptinmi kuskankuña ruparunqa.