Марк 16 - Muxaddes Kitap

Iysanıń qayta tiriliwi

¹ Shabbat kúni ótkennen soń, magdalalı Máriyam, Yaqıptıń anası Máriyam hám Salomiya Iysanıń denesine jaǵıw ushın xosh iyisli may satıp aldı.

² Olar ekshembi kúni quyash shıǵıwdan tań azanda qábirge keldi.

³ Óz ara: – Qábirdiń awzındaǵı tastı bizlerge kim domalatıp berer eken? – dep sóylesti.

⁴ Biraq basların kóterip qarap, tastıń domalatıp taslanǵanın kórdi. Tas júdá úlken edi.

⁵ Qábirdiń ishine kirgen olar oń tárepte otırǵan aq kiyimli bir jas jigitti kórip, qorqıp ketti.

⁶ Jigit olarǵa: – Qorqpańlar! Sizler atanaq aǵashqa shegelengen nasıralı Iysanı izlep júrsizler-ǵo. Ol qayta tirildi, Ol bul jerde joq. Mine, Onıń qoyılǵan jeri.

⁷ Endi barıp, Onıń shákirtlerine hám Petrge: «Ol sizlerden burın Galilaǵa baradı. Óziniń aytqanınday, Onı sol jerde kóresizler», – dep aytıńlar, – dedi.

⁸ Hayallar qattı qorqısıp hám qaltırasıp, qábirden shıǵıp qashıp ketti. Qorqqanlıqtan, hesh kimge hesh nárse aytpadı.

Iysanıń magdalalı Máriyamǵa kóriniwi

⁹ Iysa ekshembi kúni erte tańda qayta tirilip, birinshi bolıp magdalalı Máriyamǵa kórindi. Iysa burın onnan jeti jindi quwıp shıǵarǵan edi.

¹⁰ Máriyam barıp, bunı Iysa menen birge bolǵanlarǵa xabarladı. Olar jılap, qayǵırıp otırǵan edi.

¹¹ Biraq olar Iysanıń tiri ekenin hám Máriyamnıń Onı kórgenin esitse de, isenbedi.

Iysanıń eki shákirtine kóriniwi

¹² Sońınan Iysa awılǵa baratırǵan olardıń ekewine basqasha túrde kórindi.

¹³ Olar qaytıp kelip, basqa shákirtlerge xabarlaǵanda, olarǵa da isenbedi.

Iysanıń shákirtlerine tapsırması

¹⁴ Sońınan Iysa awqatlanıp otırǵan on bir shákirtine kórinip, olardı isenbewshilikte hám qaysarlıqta ayıpladı. Óytkeni olar Onıń tirilgenin kórgenlerge isenbegen edi.

¹⁵ Iysa olarǵa bılay dedi: – Pútkil dúnya boylap júrińler hám barlıq adamlarǵa Xosh Xabardı járiyalańlar.

¹⁶ Kim de kim isenip shomıldırılsa, qutqarıladı, al kim de kim isenbese, húkim etiledi.

¹⁷ Isengenler menen mınaday káramatlı belgiler birge boladı: Meniń atım menen jinlerdi quwıp shıǵarıp, jańa tillerde sóyleydi.

¹⁸ Qolları menen jılanlardı uslap alsa da hám uwlı zat ishse de, olarǵa zıyan kelmeydi. Awırıwlardıń ústilerine qolların qoyǵanda, olar shıpa tabadı.

Iysanıń aspanǵa alınıwı

¹⁹ Iyemiz Iysa olarǵa usılardı aytıp bolǵannan soń, aspanǵa alındı hám Qudaydıń oń tárepine otırdı.

²⁰ Al shákirtleri barıp, hámme jerde Xosh Xabardı járiyalap júrdi. Iyemiz olar menen birge islep, Óz sózin káramatlı belgiler arqalı tastıyıqlaytuǵın edi.