Марк 12 - Muxaddes Kitap

Jawız diyxanlar haqqında tımsal

¹ Iysa olarǵa tımsallar menen sóyley basladı: – Bir adam júzim baǵın otırǵızıp, onı diywal menen qorshaptı hám sharap iskenjesin qazıp, gúzet minarasın ornatıptı. Sońınan baǵın diyxanlarǵa ijaraǵa berip, ózi uzaq jerge ketip qalıptı.

² Terim máwsimi kelgende, ol baǵdıń jemisinen tiyisli úlesin alıw ushın, diyxanlarǵa óziniń bir xızmetshisin jiberipti.

³ Biraq olar xızmetshini uslap alıp sabap, qurı qol qaytarıptı.

⁴ Ol jáne olarǵa basqa xızmetshisin jibergende, onıń basın jarıp, biyabıray qılıptı.

⁵ Sonda ol jáne basqa bir xızmetshisin jibergende, olar onı óltiripti. Ol jáne de kóp basqa xızmetshilerin jibergende, geybirewlerin sabap, geybirewlerin óltiripti.

⁶ Endi bir ǵana adam, onıń súyikli ulı qalıptı. Eń aqırında ol: «Ulımdı húrmet eter» dep, olarǵa óz ulın jiberipti.

⁷ Biraq diyxanlar bir-birine: «Bul – miyrasxor-ǵo. Júrińler, onı óltireyik, sonda miyras múlki bizlerge qaladı», – desipti.

⁸ Solay etip, onı uslap alıp óltirip, júzim baǵınan sırtqa shıǵarıp taslaptı.

⁹ Endi júzim baǵınıń iyesi ne isleydi? Ol kelip, diyxanlardı joq qıladı da, júzim baǵın basqalarǵa beredi.

¹⁰ Sizler Muxaddes Jazıwdaǵı mına sózlerdi oqımaǵansızlar ma: «Qurılısshılardıń kereksiz dep taslaǵan tası, Úydiń múyeshiniń tiykarǵı tası boldı.

¹¹ Jaratqan Iye qılǵan bul is, Kózimizge ájayıp kórindi!»

¹² Olar bul tımsaldıń ózlerine qarsı aytılǵanın bilip, Iysanı qolǵa alıwǵa tırıstı. Biraq xalıqtan qorqqanlıqtan Onı qaldırıp, ketip qaldı.

Salıq tólew tuwralı

¹³ Sońınan olar Iysanı sózinen tutıw ushın, pariseylerdiń hám Hirodtıń tárepdarlarınıń geybirewlerin Oǵan jiberdi.

¹⁴ Olar Iysaǵa kelip: – Ustaz! Bizler Seniń durıs adam ekenińdi hám jaǵımpazlıq etpeytuǵınıńdı bilemiz. Óytkeni Sen adamlardıń bet-júzine qaramay, Qudaydıń jolın durıs úyretip otırsań. Rim imperatorına salıq tólew durıs pa yamasa nadurıs pa? Tólewimiz kerek pe yamasa kerek emes pe? – dep soradı.

¹⁵ Biraq Iysa olardıń eki júzliligin bilip: – Meni nege sınap atırsızlar? Maǵan bir dinar ákelińler, kóreyin, – dedi.

¹⁶ Olar alıp kelgende, Ol: – Bunda kimniń súwreti bar hám kimniń atı jazılǵan? – dep soradı. Olar: – Rim imperatorınıń, – dedi.

¹⁷ Sonda Iysa olarǵa juwap berip: – Imperatordıń haqın imperatorǵa, Qudaydıń haqın Qudayǵa berińler, – dedi. Olar Oǵan tań qalıstı.

Qayta tiriliw haqqında soraw

¹⁸ Sońınan qayta tiriliw joq dewshi saddukeylerdiń bir neshesi Iysaǵa kelip Onnan:

¹⁹ – Ustaz! Muwsa bizlerge: «Eger birewdiń aǵası balasız ólip, hayalın qaldırsa, inisi onıń hayalın alıp, óz aǵasınıń urpaǵın dawam ettirsin», – dep jazıp qaldırǵan.

²⁰ Aǵayinli jeti jigit bar edi. Olardıń birinshisi úylenip, izinde bala qaldırmay ólip ketti.

²¹ Sol hayaldı ekinshisi alıp, ol da izinde bala qaldırmay ólip ketti. Úshinshisine de solay boldı.

²² Jeti aǵayinliniń hesh qaysısı da izinde bala qaldırmastan ólip ketti. Eń sońında hayaldıń ózi de qaytıs boldı.

²³ Olar qayta tirilgende, hayal qaysısınıń hayalı boladı? Sebebi ol jetewine de hayal bolǵan edi-ǵo, – dep soradı.

²⁴ Iysa olarǵa juwap berip: – Sizler Muxaddes Jazıwlardı da, Qudaydıń qúdiretin de bilmegenlikten aljasıp tursızlar.

²⁵ Óytkeni adamlar ólimnen qayta tirilgende úylenbeydi de, turmısqa da shıqpaydı, al aspandaǵı perishteler sıyaqlı boladı.

²⁶ Ólgenlerdiń qayta tiriliwi tuwralı Muwsanıń kitabında, janıp turǵan puta haqqında aytılǵan waqıyada Qudaydıń ne aytqanın oqımaǵansızlar ma? Quday Muwsaǵa: «Men – Ibrayımnıń Qudayıman, Ísaqtıń Qudayıman, Yaqıptıń Qudayıman», – degen.

²⁷ Quday ólilerdiń emes, al tirilerdiń Qudayı. Sizler qattı aljasıp tursızlar, – dedi.

Eń baslı buyrıq

²⁸ Diniy muǵallimlerdiń biri olardıń tartısların esitti. Iysanıń olarǵa jaqsı juwap bergenin kórip, Onnan: – Buyrıqlardıń ishinde eń baslısı qaysı? – dep soradı.

²⁹ Iysa oǵan: – Eń baslı buyrıq bul: «Qulaq sal, Izrail! Qudayımız Jaratqan Iye – jalǵız Iye.

³⁰ Qudayıń Jaratqan Iyeni shın júregiń, jan-tániń, pútkil aqıl-oyıń hám bar kúshiń menen súy».

³¹ Ekinshisi mınaday: «Ózińdi súygeniń sıyaqlı, janıńdaǵı adamdı da súy». Bulardan ullı buyrıq joq, – dedi.

³² Diniy muǵallim Oǵan: – Awa, Ustaz! «Quday – jalǵız, Onnan basqa quday joq», – dep durıs ayttıń.

³³ Qudaydı pútkil júregiń, pútkil aqılıń, pútkil kúshiń menen súyiw hám ózińdi súygeniń sıyaqlı, janıńdaǵı adamdı da súyiw – hámme jandırılatuǵın qurbanlıqlardan hám Quday jolına berilgen sadaqalardan artıq, – dedi.

³⁴ Iysa onıń aqılǵa say juwap bergenin kórip: – Sen Qudaydıń Patshalıǵınan alıs emesseń, – dedi. Sonnan soń, Oǵan soraw beriwge hesh kimniń batılı barmadı.

Masiyx kimniń Urpaǵı?

³⁵ Iysa Ibadatxanada adamlarǵa tálim berip atırıp: – Qalayınsha diniy muǵallimler Masiyxtı Dawıttıń Urpaǵı deydi?

³⁶ Dawıttıń ózi Muxaddes Ruwxtan ilhamlanıp, bılay degen: «Jaratqan Iye Iyeme ayttı: „Dushpanlarıńdı ayaǵıńnıń astına bastırmaǵanımsha, Meniń oń jaǵımda otır!“»

³⁷ Dawıttıń ózi Onı «Iyem» dep ataǵan bolsa, Ol qalayınsha onıń urpaǵı boladı? – dep soradı. Kóp xalıq Onı quwanısh penen tıńladı.

Diniy muǵallimler haqqında

³⁸ Iysa tálim berip: – Diniy muǵallimlerden saq bolıńlar! Olar uzın kiyim kiyip júrgendi, bazar maydanlarında ózlerine sıylap sálem bergendi,

³⁹ májilisxanalarda sıylı orında, zıyapatlarda tórde otırǵandı jaqsı kóredi.

⁴⁰ Olar jesir hayallardıń úylerin jalmap jutıp, kózge kóriniw ushın uzaq duwa etedi. Bunday adamlar eń awır jaza aladı, – dedi.

Jesir hayaldıń sadaqası

⁴¹ Iysa Ibadatxanadaǵı sadaqa qutısınıń qarsısında xalıqtıń qutıǵa aqsha salıwına qarap otırdı. Baylardıń kóbisi kóp aqsha saldı.

⁴² Sonda bir jarlı jesir hayal kelip, eki tiyin saldı.

⁴³ Iysa shákirtlerin qasına shaqırıp alıp: – Sizlerge shının aytıp turman: bul jarlı jesir hayal qutıǵa aqsha salǵanlardıń hámmesinen kóp saldı.

⁴⁴ Sebebi olardıń hámmesi óz baylıqlarınan awısqanın saldı. Al bul hayal jarlı bolsa da, kún kórisine kerekli barlıq aqshasın saldı, – dedi.