Елшилер 6 - Muxaddes Kitap

Jeti xızmetshi

¹ Masiyxtıń shákirtleriniń sanı ósip atırǵan sol kúnlerde grekshe sóyleytuǵın iseniwshi yahudiyler tárepinen evreyshe sóyleytuǵın iseniwshi yahudiylerge qarsı narazılıq payda boldı. Sebebi kúndelikli járdem bólistirilgende, olardıń jesirlerine kewil awdarılmaytuǵın edi.

² Sonda on eki elshi hámme shákirtlerdi bir jerge jıynap: – Qudaydıń sózin járiyalaw isin taslap, dasturxan basında xızmet etkenimiz durıs bolmas.

³ Tuwısqanlarım! Arańızda jaqsı atı shıqqan, Muxaddes Ruwx penen danalıqqa tolǵan jeti adamdı tańlańlar. Olarǵa usı isti tapsırayıq.

⁴ Al bizler ózlerimizdi duwa etiwge hám Qudaydıń sózin járiyalawǵa baǵıshlayıq, – dedi.

⁵ Bul sóz pútkil jámáátke unadı. Olar isenimi kúshli hám Muxaddes Ruwxqa tolı bolǵan Stepandı, jáne de Filipti, Proxordı, Nikanordı, Timondı, Parmendi hám yahudiy dinine ótken antioxiyalı Nikolastı saylap,

⁶ elshilerdiń aldında turǵızdı. Elshiler olardıń ústilerine qolların qoyıp, duwa etti.

⁷ Solay etip, Qudaydıń sózi jayılıp, Erusalimdegi shákirtlerdiń sanı kóbeye berdi. Ruwxaniylerdiń kóbisi de elshilerdiń tálimin qabıl alıp, isene basladı.

Stepannıń qolǵa alınıwı

⁸ Qudaydıń miyrimi menen qúdiretine tolı bolǵan Stepan xalıq arasında ullı tań qalarlıq nárseler hám káramatlı belgiler kórsetetuǵın edi.

⁹ Degen menen, «Qullıqtan azat etilgenler» degen májilisxananıń kireneli hám iskenderiyalı ayırım aǵzaları, sonday-aq Kilikiya menen Aziyadan bolǵan adamlar Stepanǵa qarsı shıǵıp, onıń menen tartısa basladı.

¹⁰ Biraq ol danalıq hám Muxaddes Ruwx penen sóylegenlikten, olar qarsı tura almadı.

¹¹ Sonda olar bir neshe adamdı úgitlep: «Onıń Muwsaǵa hám Qudayǵa til tiygizgenin esittik», – dep aytqızdı.

¹² Solay etip, olar xalıqtı, aqsaqallardı hám diniy muǵallimlerdi óshegistirip, bas salıp Stepandı usladı da, onı joqarǵı keńestiń aldına alıp keldi.

¹³ Olar ákelgen jalǵan gúwalar: – Mına adam Ibadatxanaǵa hám Muwsanıń Nızamına úzliksiz qarsı sóylep júr.

¹⁴ Bizler onıń: «Nasıralı Iysa Ibadatxananı joq qıladı, Muwsanıń bizlerge bergen úrp-ádetlerin ózgertedi», – degenin esittik, – dedi.

¹⁵ Joqarǵı keńeste otırǵanlardıń hámmesi Stepannıń júzine tigilip qarap, onıń júziniń perishteniń júzine uqsas ekenin kórdi.