Елшилер 27 - Muxaddes Kitap

Paveldiń Rimge qaray jolǵa shıǵıwı

¹ Italiyaǵa keme menen ketiwge qarar etkenimizde, Pavel menen basqa ayırım tutqınlar imperator Avgust atındaǵı áskeriy bóliminen bolǵan Yuliy atlı bir júzbasıǵa tapsırıldı.

² Aziya úlkesiniń jaǵalarındaǵı jaǵıslarǵa baratuǵın Adramittiń kemesine minip, bizler jolǵa shıqtıq. Janımızda Salonikadan kelgen makedoniyalı Aristarx ta bar edi.

³ Erteńine Sidonǵa jetip keldik. Yuliy Pavelge adamgershilik islep, onıń óz mútájliklerine járdem alıwı ushın, doslarına barıp keliwine ruxsat etti.

⁴ Ol jerden keme menen jáne jolǵa shıqtıq. Samal qarsı aldımızdan esip turǵanlıqtan, Kipr atawınıń ıq jaǵı menen júrdik.

⁵ Kilikiya hám Pamfiliya úlkeleriniń qarsı aldındaǵı ashıq teńizden ótip, Likiyanıń Mira qalasına keldik.

⁶ Júzbası sol jerde Italiyaǵa baratuǵın Iskenderiyadan kelgen kemeni tawıp, bizlerdi oǵan mingizdi.

⁷ Kóp kún boyı áste-aqırın júzip, zorǵa degende Knidosqa jetip bardıq. Samalǵa qarsı júziw qıyın bolǵanlıqtan, Krit atawınıń ıq jaǵı menen Salmon qalasınıń qasınan óttik.

⁸ Jaǵa boylap zordan júzip, Laseya qalasınıń qasındaǵı «Gózzal jaǵıs» degen jerge keldik.

⁹ Bizler kóp waqıttı sarp etip aldıq. Hátte, yahudiylerdiń oraza kúni de ótip ketkenlikten, endi júziw qáwipli edi. Sonlıqtan Pavel olarǵa eskertip:

¹⁰ – Adamlar! Bul jolımız tek júk hám keme ushın emes, al janlarımız ushın da júdá qáwipli hám zıyanlı bolatuǵının kórip turman, – dedi.

¹¹ Biraq júzbası Paveldiń sózlerinen góre, keme aydawshısı menen kemeniń xojayınınıń sózine qulaq astı.

¹² Jaǵıs qıslawǵa qolaylı bolmaǵanlıqtan, kemedegilerdiń kóbisi jolǵa shıǵıwdı hám ilajı bolsa Fenikske jetip, qıstı sol jerde ótkiziwdi sheshti. Feniks – qubla-batıs hám arqa-batıs táreplerge qaraǵan, Kritte jaylasqan bir jaǵıs edi.

Teńizdegi dawıl

¹³ Qubladan jumsaq samal ese baslaǵanda, olar óz maqsetimizge jettik dep oylap, kóshkini kóterdi de, Krittiń jaǵası menen júzip ketti.

¹⁴ Biraq kóp ótpey, ataw tárepten «Arqa-shıǵıs» dep atalatuǵın dawıl bastırıp keldi.

¹⁵ Keme dawıl tárepinen iskenjege alınıp, samalǵa qarsı tura alatuǵın kúshimiz bolmaǵanlıqtan, bizler táslim bolıp kete berdik.

¹⁶ Kavda dep atalatuǵın bir kishi atawdıń ıq jaǵına jetkenimizde, kemeniń qayıǵın zorǵa degende saqlap úlgerdik.

¹⁷ Kemeshiler qayıqtı joqarıǵa tartıp shıǵarıp, kemeni aylandırıp arqan menen bekkem etip baylap qoydı. Liviya jaǵasınıń qayır jerlerine tiyiwden qorqıp, tezlikti qaytaratuǵın úskeneni túsirdi de, ıǵıp kete berdi.

¹⁸ Dawıl bizlerdi qattı qıynaǵanlıqtan, olar erteńine kemeden júk ılaqtıra basladı.

¹⁹ Úshinshi kúni kemeniń qural-saymanların da óz qolları menen teńizge ılaqtırdı.

²⁰ Kóp kún boyı quyash ta, juldızlar da kórinbedi. Dawıl ele qáhárli bolǵanlıqtan, aqırında aman qalıwdan úmitimizdi pútkilley úzdik.

²¹ Adamlar kóp waqıttan beri hesh nárse jemegen edi. Sonda Pavel ortaǵa shıǵıp bılay dedi: – Adamlar! Maǵan qulaq asıp, Kritten shıqpaǵanıńızda, bunday qáwip-qáter menen shıǵınǵa ushıramaǵan bolar edik.

²² Biraq endi sizlerdi márt bolıwǵa shaqıraman. Tek keme ǵana apatqa ushırap, arańızda hesh bir jan nabıt bolmaydı.

²³ Sebebi men tiyisli bolıp, xızmet etip júrgen Qudaydıń bir perishtesi ótken túni janıma kelip,

²⁴ bılay dedi: «Qorqpa Pavel! Sen Rim imperatorınıń aldına barıwıń tiyis. Jáne Quday seniń menen saparlas bolǵanlardıń hámmesin saǵan baǵıshladı».

²⁵ Sonlıqtan, adamlar, márt bolıńlar! Men Qudayǵa isenemen: maǵan ne aytılsa, sol boladı.

²⁶ Bizler bir atawǵa ıǵızılıp aparılıwımız tiyis.

²⁷ Dawıldıń baslanǵanına on tórt kún bolǵanda, bizler Adriya teńizinde ıǵıp júr edik. Shama menen túnniń yarımında kemeshiler qanday da bir qurǵaqlıqqa jaqınlasqanın shamaladı.

²⁸ Sonda olar teńizdiń tereńligin ólshep, jigirma qulash ekenin bildi. Az-maz waqıttan soń jáne ólshep kórgende, on bes qulash ekenin kórdi.

²⁹ Suwdıń astındaǵı jartasqa urılıwımızdan qorqıp, olar kemeniń art betinen tórt kóshki ılaqtırdı da, tańnıń tezirek atıwın tilep, duwa etti.

³⁰ Kemeshiler kemeden qashpaqshı bolıp, aldınǵı tárepten kóshki taslawdı sıltawladı da, qayıqtı teńizge túsire basladı.

³¹ Biraq Pavel júzbası menen áskerlerge: – Bular kemede qalmasa, sizlerge aman qalıw joq, – dedi.

³² Sonda áskerler qayıqtıń arqanların kesip, onı teńizge túsirip jiberdi.

³³ Tań atayın dep turǵanda, Pavel hámmeni awqat jewge úgitlep: – Hesh nárse jemey awqatsız qalıp kútkenińizge búgin on tórt kún boldı.

³⁴ Sonlıqtan awqat jep alıwıńızdı ótinish etemen. Bul aman qalıwıńız ushın zárúr. Hesh qaysısıńızdıń bir tal shashıńız da nabıt bolmaydı, – dedi.

³⁵ Pavel usılardı aytıp bolıp nandı aldı da, hámmeniń aldında Qudayǵa shúkirlik bildirip, nandı bólip jey basladı.

³⁶ Sonda hámme jigerlenip, awqat jedi.

³⁷ Kemede barlıǵımız bolıp eki júz jetpis altı jan edik.

³⁸ Awqatqa toyıp bolǵannan soń, olar biydaydı teńizge tógip, kemeni jeńilletti.

Kemeniń apatqa ushırawı

³⁹ Tań atqanda, kemeshiler ózleri kelgen jerdi tanımadı. Biraq jaǵası qumlıq bolǵan bir qoltıqtı kórip qalıp, múmkin bolsa, kemeni sol jerge aparıp toqtatıwdı uyǵardı.

⁴⁰ Kóshkilerdiń arqanların kesip, teńizge tasladı da, baǵıtlawshı eki eskekti baylaǵan arqanlardı sheshti. Aldınǵı jelqomdı samal tárepke kóterip, jaǵaǵa qaray júzip ketti.

⁴¹ Biraq keme bir qumlı sayız jerge tap bolıp, tumsıǵı qumǵa battı da, qıymıldamay qaldı. Al artqı jaǵı kúshli tolqınlar tárepinen soqqılanıp, sınıp ketti.

⁴² Tutqınlar júzip qashıp ketedi dep oylap, áskerler olardı óltirmekshi boldı.

⁴³ Biraq júzbası Paveldi qutqarǵısı kelip, áskerlerge bul niyetin iske asırıwǵa tıyım saldı. Sońınan júzip biletuǵınlarǵa birinshi bolıp ózlerin teńizge atıp, jaǵaǵa shıǵıwların buyırdı.

⁴⁴ Al qalǵanları bolsa, kimisi taxtay, kimisi kemeniń sınıq bóleklerinen uslap, olardıń izlerinen jetip bardı. Solay etip, hámmesi aman-esen jaǵaǵa shıqtı.