Елшилер 24 - Muxaddes Kitap

Pavel hákim Feliks aldında

¹ Aradan bes kún ótkennen soń, bas ruwxaniy Xananiya ayırım aqsaqallar hám Tertulus atlı sheshen bir nızam qániygesi menen Kesariyaǵa kelip, hákimge Paveldiń ústinen shaǵım jasadı.

² Pavel shaqırılǵanda, Tertulus onı ayıplay basladı: – Ullı mártebeli Feliks! Siziń arqańızda uzaq waqıtlardan beri tınıshlıqta jasap atırmız. Siziń keleshekti kóre biletuǵınıńız arqalı bul millettiń abadanshılıǵı rawajlanıp barmaqta.

³ Bizler bunı hámme waqıtta, hámme jerde úlken minnetdarshılıq penen moyınlaymız.

⁴ Biraq siziń waqtıńızdı almaw ushın, bizlerdiń aytajaq bir awız sózimizdi dıqqat penen tıńlawıńızdı ótinish etemen.

⁵ Bizler bul adamdı dúnya júzindegi pútkil yahudiyler arasında qozǵalań kótergen illettey qáwipli bir adam dep taptıq. Ol «Nasıralılar» dep atalǵan topardıń jetekshileriniń biri.

⁶ Hátte, ol Ibadatxanamızdı da haramlamaqshı bolǵanda, bizler onı qolǵa aldıq. [

⁷ ]

⁸ Siz de onı tergegenińizde, bizlerdiń onı ne ushın ayıplap atırǵanımızdıń hámmesin ózinen bilip alasız.

⁹ Yahudiyler de Paveldi ayıplap, aytılǵanlardıń durıs ekenin maqulladı.

¹⁰ Hákim Paveldiń sóylewi ushın isharat etkende, Pavel bılay dep juwap berdi: – Siziń kóp jıllardan beri bul milletke qazılıq etip kiyatırǵanıńızdı bilip, ózimdi siziń aldıńızda aqlaytuǵınıma quwanıshlıman.

¹¹ Meniń Erusalimge sıyınıw ushın kelgenime on eki kúnnen kóp bolmaǵanın ózińiz bilip alıwıńızǵa boladı.

¹² Olar meniń ya Ibadatxanada, ya májilisxanalarda, ya qalanıń basqa bir jerinde birew menen tartısıp turǵanımdı yamasa xalıqqa qozǵalań salıp júrgenimdi kórmedi.

¹³ Házir de maǵan taǵıp atırǵan ayıpların sizge dálillep bere almaydı.

¹⁴ Biraq, sizge mınanı moyınlayman: olar «azǵın topar» dep ataytuǵın jol boyınsha men ata-babalarımnıń Qudayına sıyınıp, Muxaddes Nızamda hám payǵambarlardıń Jazıwlarında aytılǵan hár bir nársege isenemen.

¹⁵ Bul adamlar sıyaqlı men de haq adamlardıń da, gúnakarlardıń da qayta tiriliwine Qudaydan úmit etemen.

¹⁶ Sonlıqtan da, men Qudaydıń hám adamlardıń aldında pák hújdanlı bolıwǵa hámme waqıt tırısaman.

¹⁷ Milletime qayır-sadaqa, Qudayǵa qurbanlıqlar beriw ushın, kóp jıldan soń Erusalimge qaytıp keldim.

¹⁸ Men tazalanıw rásiminen ótip, usılardı islep atırǵanımda, olar meni Ibadatxanada kórdi. Sonda meniń qasımda kóp adam da, shawqım da bolǵan joq.

¹⁹ Biraq ol jerde Aziya úlkesinen kelgen ayırım yahudiyler bar edi. Siziń aldıńızda áne solar turıp, maǵan taǵatuǵın ayıpları bar bolsa, aytıwları kerek.

²⁰ Ya bolmasa, joqarǵı keńestiń aldında turǵanımda, mennen qanday ayıp tapqanın bul jerdegi adamlar aytsın.

²¹ Men tek olardıń aldında turǵanımda: «Ólilerdiń qayta tiriletuǵınına isengenim ushın, búgin men húkim etilip atırman», – dep baqırǵan edim.

²² Sonda Feliks Iysanıń jolı tuwralı jaqsı bilgenlikten: – Dawıńızdı mıńbası Lisyas kelgende sheshemen, – dedi de, istiń qaralıwın keyinge qaldırdı.

²³ Sońınan ol júzbasıǵa Paveldi qarawıllawdı, biraq erkinlik berip, doslarınıń oǵan járdemlesiwine tıyım salmawdı buyırdı.

Paveldiń Kesariyada tutqın bolıwı

²⁴ Bir qansha kúnnen soń, Feliks óziniń Druzilla atlı yahudiy hayalı menen birge keldi. Ol Paveldi shaqırtıp alıp, onıń Masiyx Iysaǵa iseniw haqqında aytqanların tıńladı.

²⁵ Pavel haqlıq, ózin tıyıw hám keleshektegi húkim haqqında aytqanda Feliks qorqıp ketip: – Házirshe bara ber. Waqıt tapsam, seni jáne shaqırtıp alaman, – dedi.

²⁶ Sonıń menen birge, bosatılıwı ushın Paveldiń ózine para beriwinen úmit etetuǵın edi. Sonlıqtan onı tez-tez shaqırtıp, onıń menen gúrrińlesetuǵın edi.

²⁷ Biraq aradan eki jıl ótkende, Felikstiń ornına Porkiy Fest keldi. Feliks yahudiylerge jaǵınǵısı kelgenlikten, Paveldi qamaqta qaldırıp ketti.