Ayan 4 - Muxaddes Kitap

Aspandaǵı taxt

¹ Bunnan soń, aspanda ashıq turǵan bir qapını kórdim. Men burın esitken dawıs, yaǵnıy kárnay sestine uqsaǵan ses maǵan bılay dedi: «Bul jerge kóteril! Men saǵan bunnan soń bolıwı tiyis waqıyalardı kórsetemen».

² Sonda men dárhal Muxaddes Ruwxqa tolıp, aspanda bir taxttı hám onda Otırǵandı kórdim.

³ Taxtta Otırǵannıń kórinisi yaspis, serdolik sıyaqlı hasıl taslarday jarqırap, al taxttıń átirapın jarqıraǵan hasıl zúmret tası sıyaqlı ayqulaq qorshap turǵan edi.

⁴ Taxttıń dógereginde basqa jigirma tórt taxt bolıp, bul taxtlarda aq kiyimli, baslarına altın taj kiygen jigirma tórt aqsaqal otırǵan edi.

⁵ Taxttan shaqmaq shaǵıp, gúrsildegen dawıs shıǵıp, gúldirmamanıń gúrkiregeni esitilip turǵan edi. Al taxttıń aldında jeti shıra janıp turǵan edi. Bul – Qudaydıń jeti ruwxı.

⁶ Jáne taxttıń aldında kristall sıyaqlı shiyshe teńiz bar edi. Taxttıń tórt tárepinde, yaǵnıy dógereginde aldı-artı kózge tolǵan tórt maqluq turǵan edi.

⁷ Olardıń birinshisi arıslanǵa, ekinshisi tanaǵa uqsaǵan edi. Al úshinshisiniń júzi adamnıń túrindey, tórtinshisi ushıp baratırǵan búrkit sıyaqlı edi.

⁸ Hár biriniń altı qanatı bolıp, qanatlarınıń ishi-sırtı tolǵan kóz edi. Olar kúni-túni toqtamastan: «Bar bolǵan, házir bar, Keleshekte keletuǵın, Qúdireti kúshli Quday Iye, Muxaddes, muxaddes, muxaddes!» – deydi.

⁹ Tórt maqluq máńgi-baqıy jasaytuǵın taxtta Otırǵandı ullılap, Oǵan húrmet kórsetip shúkirlik bildirgen sayın,

¹⁰ jigirma tórt aqsaqal taxtta otırǵan máńgi-baqıy Jasaytuǵınnıń aldına jıǵılıp, Oǵan tabındı. Olar tajların taxttıń aldına qoyıp bılay dedi:

¹¹ «Iyemiz hám Qudayımız! Sen dańq, húrmet hám qúdiretti alıwǵa ılayıqlısań. Sebebi hámme nárseni Sen jaratqansań. Hámmesi Seniń erkiń menen jaratıldı hám bar boldı».