Ayan 20 - Muxaddes Kitap

Mıń jıllıq patshalıq

¹ Soń men qolında tereń tuńǵıyıqtıń gilti hám úlken shınjırı bar bir perishteniń aspannan túskenin kórdim.

² Perishte aydarhanı, yaǵnıy ázázúl hám shaytan dep atalǵan sol eski jılandı tutıp, mıń jılǵa baylap tasladı.

³ Mıń jıl tamam bolmaǵansha, milletlerdi endi azǵırmasın dep, onı tereń tuńǵıyıqqa ılaqtırıp jiberdi. Ol jerdi jawıp, awzın mórlep tasladı. Mıń jıl ótkennen soń, ol qısqa múddetke bosatılıwı tiyis.

⁴ Sońınan men taxtlardı hám olarda otırǵanlardı kórdim. Olarǵa húkim etiw biyligi berilgen edi. Iysanıń gúwalıǵı hám Qudaydıń sózi ushın bası kesilgenlerdiń janların da kórdim. Bular jırtqısh haywanǵa hám onıń músinine tabınbaǵan, mańlaylarına hám qollarına jırtqısh haywannıń tamǵasın bastırmaǵan edi. Olar tirilip, Masiyx penen birge mıń jıl patshalıq etti.

⁵ Bul – birinshi qayta tiriliw. Qalǵan óliler mıń jıl tamam bolmaǵansha tirilmedi.

⁶ Birinshi qayta tiriliwde qatnasqanlar baxıtlı hám muxaddes. Ekinshi ólimniń bular ústinen hesh qanday biyligi joq. Olar Qudaydıń hám Masiyxtıń ruwxaniyleri bolıp, Onıń menen birge mıń jıl patshalıq etedi.

Shaytannıń jazalanıwı

⁷ Mıń jıl ótkennen soń, shaytan qamalǵan jerinen azat etiledi.

⁸ Jer júziniń tórt múyeshindegi milletlerdi, yaǵnıy Gog hám Magogtı azǵırıp, olardı sawashqa jıynaw ushın, ol qamaqtan shıǵadı. Olardıń sanı teńizdiń qumı sıyaqlı san-sanaqsız boladı.

⁹ Olar jer júzin basıp ótip, muxaddeslerdiń mákanı bolǵan Qudaydıń súyikli qalasın qorshap aldı. Biraq aspannan ot jawıp, olardı kúydirip, joq qılıp jiberdi.

¹⁰ Al olardı azǵırǵan shaytan ot hám kúkirt kóline ılaqtırıldı. Burın sol jerge jırtqısh haywan hám jalǵan payǵambar da ılaqtırılǵan edi. Olar kúni-túni, máńgi-baqıy azap shegedi.

Ólilerdiń húkim etiliwi

¹¹ Sonda men bir ullı aq taxttı hám taxtta Otırǵandı kórdim. Jer hám aspan Onıń júzinen qashıp, joq bolıp ketti.

¹² Taxttıń aldında turǵan úlken-kishi ólilerdi de kórdim. Sońınan kitaplar ashıldı. Basqa bir kitap ta ashıldı, bul – Ómir kitabı edi. Óliler kitaplarda jazılǵanlar boyınsha, óz islerine qaray húkim etildi.

¹³ Teńiz ózinde bolǵan ólilerdi, ólim hám óliler mákanı da ózlerinde bolǵan ólilerdi shıǵarıp berdi. Hár biri óz islerine qaray húkim etildi.

¹⁴ Ólim hám óliler mákanı ot kóline ılaqtırıldı. Bul ot kóli – ekinshi ólim.

¹⁵ Atları Ómir kitabında jazılmaǵanlardıń hámmesi ot kóline ılaqtırıldı.