Ayan 19 - Muxaddes Kitap

Haliluya

¹ Bunnan soń, men aspanda kóp sanlı alamannıń dawısına uqsaǵan bálent dawıslardı esittim. Olar bılay dedi: «Haliluya! Qutqarıw, dańq hám qúdiret, Qudayımızǵa tiyisli.

² Sebebi Onıń húkimleri tuwrı hám ádil. Ol jer júzin buzıqshılıǵı menen haramlaǵan, Ullı buzıq hayaldı húkim etip, Óz xızmetshileriniń qanı ushın onnan ósh aldı».

³ Olar jáne dawıslap bılay dedi: «Haliluya! Buzıq hayaldıń janǵan otınıń tútini, Máńgi-baqıy burqırap turadı».

⁴ Sonda jigirma tórt aqsaqal hám tórt maqluq jerge jıǵılıp: «Awmiyin! Haliluya!» – dep, taxt ústinde otırǵan Qudayǵa tabındı.

Qozınıń neke toyı

⁵ Sońınan taxttan shıqqan bir dawıs bılay dedi: «Háy, Qudayımızdıń barlıq xızmetshileri! Onnan qorqıwshı úlken-kishi hámmeńiz, Onı alǵıslańlar!»

⁶ Soń men úlken alamannıń dawısına, sarqırap aqqan suwlardıń shuwıldısına hám kúshli gúldirmamanıń gúrkiregenine uqsaǵan dawıstı esittim. Sol dawıs bılay dedi: «Haliluya! Qúdireti kúshli Qudayımız Jaratqan Iye patshalıq etedi.

⁷ Shadlanıp, kewil kótereyik! Onı dańqqa bóleyik! Sebebi Qozınıń neke toyı baslanajaq, Onıń qalıńlıǵı ózin tayarladı.

⁸ Kelinge kiyiw ushın, Taza, jarqıraǵan appaq zıǵır kóylek berildi». Taza, appaq kóylek – muxaddeslerdiń haq islerin bildiredi.

⁹ Sonda perishte maǵan: – Bılay dep jaz: «Qozınıń neke toyına shaqırılǵanlar qanday baxıtlı!» – dedi. Ol jáne: – Bul sózler – Qudaydıń haqıyqat sózleri, – dedi.

¹⁰ Men oǵan tabınıw ushın, ayaqlarına jıǵıldım. Biraq ol maǵan bılay dedi: – Bunday qıla górme! Men de sen hám Iysanıń gúwalıǵına iye tuwısqanlarıń sıyaqlı, Qudaydıń xızmetshisimen. Qudayǵa tabın! Óytkeni Iysa haqqında gúwalıq beriwshiler – payǵambarshılıq ruwxına iye bolǵanlar.

Aq Atlı

¹¹ Bunnan soń, men aspannıń ashılǵanın kórdim. Ol jerde bir aq at turǵan bolıp, atqa Mingenniń atı Sadıq hám Haqıyqat edi. Ol ádillik penen húkim shıǵarıp, sawash júrgizedi.

¹² Onıń kózleri lawlap janǵan otqa uqsaǵan bolıp, al basında bolsa kóp sanlı taj bar edi. Onda Ózinen basqa hesh kim bilmeytuǵın bir at jazılǵan edi.

¹³ Ol qanǵa boyalǵan kiyim kiygen bolıp, Onıń atı – Qudaydıń Sózi edi.

¹⁴ Taza hám appaq zıǵır kiyim kiygen aspan láshkerleri aq atlarǵa minip, Onıń izinen kiyatır edi.

¹⁵ Onıń awzınan ótkir qılısh shıǵıp turǵan bolıp, Ol sol qılısh penen milletlerdi óltiredi. Olardı temir tayaq penen basqaradı hám Qúdireti kúshli Qudaydıń qáhárli ǵázebiniń sharabın sıǵıp shıǵaratuǵın iskenjeni Ózi basadı.

¹⁶ Onıń kiyiminde hám sanında: «Patshalar Patshası hám húkimdarlar Húkimdarı», degen at jazılǵan edi.

^17-18 Sońınan men quyashta turǵan bir perishteni kórdim. Ol bálent dawıs penen baqırıp, aspanda ushıp júrgen barlıq quslarǵa bılay dedi: «Patshalardıń, áskerbasılardıń hám kúshli adamlardıń, atlardıń hám atqa mingenlerdiń, azat adamlardıń, qullardıń, úlken-kishi hámmeniń óliginiń etin jew ushın bir jerge jıynalıp, Qudaydıń ullı zıyapatına kelińler».

¹⁹ Sonda men jırtqısh haywandı, dúnya patshaların hám olardıń láshkerlerin kórdim. Olar atta Otırǵan menen hám Onıń láshkerleri menen urısıw ushın bir jerge jıynalǵan edi.

²⁰ Jırtqısh haywan hám onıń atınan káramatlar kórsetken jalǵan payǵambar qolǵa alındı. Jırtqısh haywannıń tamǵasın qabıl etip, onıń músinine tabınǵanlardı óz káramatları menen azǵırǵan – usı jalǵan payǵambar edi. Olardıń ekewi de kúkirt janǵan ot kóline tiriley ılaqtırıldı.

²¹ Al qalǵanlar atta Otırǵannıń awzınan shıqqan qılısh penen óltirildi. Barlıq quslar olardıń óli denesin jep toydı.