Ayan 15 - Muxaddes Kitap

Jeti perishte hám jeti bále

¹ Men aspanda jáne ullı hám tań qalarlıq basqa bir belgi kórdim. Bul – qolına sońǵı jeti báleni uslaǵan jeti perishte edi. Óytkeni usı báleler menen Qudaydıń ǵázebi juwmaqlanatuǵın edi.

² Sonda ot aralas shiyshe teńiz sıyaqlı bir nárseni kórdim. Haywannıń, onıń músininiń hám atınıń sanı ústinen jeńiske eriskenler qollarına Qudaydıń bergen arfaların alıp, shiyshe teńizdiń ústinde turǵan edi.

³ Olar Qudaydıń xızmetshisi Muwsanıń hám Qozınıń qosıǵın aytıp turǵan edi: «Qúdireti kúshli Quday Jaratqan Iye, Seniń isleriń ullı hám ájayıp, O, milletler Patshası! Seniń jollarıń haqıyqat hám ádil.

⁴ Jaratqan Iye, Sennen qorqpaytuǵın, Atıńdı alǵıslamaytuǵın kim bar? Sebebi tek jalǵız Sen ǵana muxaddesseń. Pútkil milletler kelip, Seniń aldıńda tabınadı. Óytkeni Seniń ádil isleriń ayan boldı».

⁵ Bunnan soń aspandaǵı Ibadatxananıń, yaǵnıy Kelisim shatırınıń ashılǵanın kórdim.

⁶ Qolında jeti bále bar jeti perishte jarqıraǵan appaq zıǵır kiyim kiyip, kókireklerine altın óńirshe baylap, Ibadatxanadan shıqtı.

⁷ Tórt maqluqtıń biri jeti perishtege máńgi-baqıy jasaytuǵın Qudaydıń qáhárli ǵázebine tolı jeti altın kese berdi.

⁸ Ibadatxana Qudaydıń ullılıǵınıń hám qúdiretiniń tútini menen tolıp ketti. Jeti perishteniń jeti bálesi tamamlanbaǵansha, hesh kim Ibadatxanaǵa kire almadı.