Ayan 10 - Muxaddes Kitap

Perishte hám orama qaǵaz

¹ Sońınan men aspannan túsip kiyatırǵan basqa bir kúshli perishteni kórdim. Ol bultqa oranǵan bolıp, basınıń ústinde ayqulaq bar edi. Júzi quyashqa, ayaqları otlı sútinge uqsaǵan edi.

² Onıń qolında ashılǵan bir orama qaǵaz bar edi. Ol oń ayaǵın teńizge, al sol ayaǵın jerge qoyıp,

³ arıslannıń aqırǵanına uqsaǵan bálent dawıs penen baqırdı. Ol baqırǵanda, jeti gúldirmama sesti gúrkirep, tilge kirdi.

⁴ Jeti gúldirmama tilge kirgende, men jazbaqshı bolıp edim, biraq aspannan bir dawıstıń: «Jeti gúldirmamanıń aytqanların jazba, olardı qupıya saqla», – degenin esittim.

⁵ Sonnan keyin, bir ayaǵı menen teńizde, bir ayaǵı menen jerde turǵanın ózim kórgen sol perishte oń qolın aspanǵa kóterdi.

⁶ Ol aspandı hám aspandaǵılardıń hámmesin, jerdi hám jerdegilerdiń hámmesin, teńizdi hám teńizdegilerdiń hámmesin jaratqan máńgi-baqıy jasaytuǵın Qudaydıń atı menen ant iship: «Endi waqıt qalmadı.

⁷ Biraq, jetinshi perishte kárnayın shertetuǵın kúnlerde Qudaydıń Óz xızmetshileri – payǵambarlarǵa xabarlaǵan sırlı jobası ámelge asadı», – dedi.

⁸ Ózim aspannan esitken dawıs meniń menen jáne sóylese baslap: «Barıp, teńizde hám jerde turǵan perishteniń qolındaǵı ashıwlı orama qaǵazdı al», – dedi.

⁹ Men perishteniń janına barıp, orama qaǵazdı maǵan beriwin soradım. Perishte maǵan: «Bunı al da, jep qoy. Ol qarnıńa barǵanda ashshı, al awzıńda pal sıyaqlı tatlı boladı», – dedi.

¹⁰ Sonda men orama qaǵazdı perishteniń qolınan alıp, jep qoydım. Ol awzımda pal sıyaqlı tatlı boldı, al jutqanımnan keyin qarnımdı ashıttı.

¹¹ Sońınan maǵan bılay delindi: «Sen jáne kóp xalıqlar, milletler, tiller hám patshalar tuwralı payǵambarshılıq aytıwıń tiyis».