Tito 3 - Dios Tatanchispaq Musuq Rimayninkuna

Iyaw niqkunapaq ruwanankuna

¹ Llaqtajawapi kurajkaqkunaman jinataq atiyniyuqkunaman uyart'anankupaq tukuy wawqipanakunaman yuwatatarichiy, paykunaqa uyart'akuq jinataq allin ruwaykuna ruwanapaqqa usqhayllapuni kachunku.

² Ama pimantapas mana allinkunata rimachunkuchu, llamp'u sunquyuqkuna jinataq munakuyniyuqkuna kachunku, llamp'u sunquyuq kasqankutaqa tukuyman rikuchichunku.

³ Imaraykuchus nuqanchisqa pisi sunqu jinataq mana uyart'akuq runakunallataqmi ñawpaqpachakunapi karqanchis. Chinkasqam puriykacharqanchis jinataq kaypachapi imaymana munapayaykunapaq jaywaqninmi karqanchis. Saqra kaypi jinataq qhawanakuypim puriykacharqanchis, tukuypaq chhiqnisqa jinataq nuqanchispura ujmanta uj chhiqninjakuspam kawsarqanchis.

⁴ Chaywampas Qhispichiqninchis Dios Tatanchismi munakuyninta riqsichirqawanchis, jinataq tukuy runakunaman munakusqantapas riqsichirqallantaqmi,

⁵ nuqanchismampas qhispichispa. Chaywampas manam ima allinkuna ruwasqanchisraykuchu qhispichirqawanchis, manachayqa munakusqawanchisrayku jinataq yanapariyta munasqanraykum qhispichirqawanchis. Ch'uwa Ajayuniqtam qhispichiwanchis, tukuy juchanchiskunamantapas pampachapuwanchismi, jinaspam wiñay kawsayta qupuwanchis. Tukuy chaykunataq wajmantapas paqarichuwan karqan ajinam.

⁶ Imaraykuchus Qhispichiqninchis Jesucristoniqtam kurajyachkaqtaraq Ch'uwa Ajayuta quwanchis,

⁷ ajinamanta munakuyninrayku chiqan runakunaman tukuchispa wiñay kawsaypi mana tukukuq kaqkunata jap'iqanapaq suyay sunquyuq kananchispaq.

⁸ Tukuy kayqa chiqan rimaykunam, tukuy kaykunatataq mat'iykuspajina yachachinaykitam munani, ajinamanta pikunachus Diospi iyaw ninku chaykunaqa allin ruwaykunata ruwanaman churakunankupaq. Kaykunaqa tukuyninkupaq sumaq kawsanankupaq allinmi.

⁹ Chaywampas mana wakikuq qallanakuykunamanqa ama pituykukuychu, manallataq ñawpaq machulakunapaq puriynin willayninkunatapas uyart'allaytaqchu. Moisespaq kamachiyninjawa rimaqkunawanqa ama phiñakuychu, manallataq ch'aqwaypaschu. Imaraykuchus chay ch'aqwaykunaqa qasipaq jinataq mana maymampas pusaq rimaykunam.

¹⁰ Iglesia chawpipichus mayqimpas t'ipinjachiyta munachkan chaymanqa, uj kuti jinataq iskay kutitawan ninrinchariy; chaywampas manachus uyart'akunqa chhikaqa, chay ukhumanta qatirqumpuy,

¹¹ imaraykuchus chay runapaq mana allinniqman puriwachapusqanmanta jinataq chay kikin juchan payman juchanchapusqanmantaqa yachapunaykiñam.

Titoman ninrinchariykuna

¹² Artemasta manachayqa Tiquicota kachamusqayki chhikaqa, Nicópolis llaqtaman nuqa rikuq jamuriypuni, imaraykuchus qasapachapiqa chaypi qhiparaytam yuwachkani.

¹³ Sayqatakuq Zenasta jinataq Apolo wawqitawan imantin atisqaykipi yanapariy, puriyninkupi imachus munasqankuta quriy, ajinamanta ama imatapas pist'achikunankupaq.

¹⁴ Wawqipananchiskunaqa allin ruwayta jinataq pist'achikuqkunaman yanapariytaqa yachaqallachunkutaq, ajinamanta kawsayninkuqa wakinkunapaq allin kanampaq.

Tukuchay rimaykuna

¹⁵ Tukuy pikunachus nuqawan kaypi kachkanku chaykunam napaykumusunkichis. Iyaw niypi munasqa wawqimasiykunaman napaykuripuway. Diosqa khuyapayakuyninta qankunajawaman t'akaykumuchun.