Tito 2 - Dios Tatanchispaq Musuq Rimayninkuna

Sumaq yachachiy

¹ Tito, imachus chiqan kachkan chaytam yachachinayki.

² Iglesia pusaqkunaqa tukuy imatapas allin apaykachaqkuna, tukuywan allinmanta qhawasqa jinataq allin yuwayniyuqkunam kananku. Allin iyaw niyuq, munakuyniyuq jinataq ima ñak'ariykunapipas kallpacharisqam kananku.

³ Awichakunapas imaynatachus Diosman munakuq wawankuna puriykachananku kachkan ajinallatataq kawsakuchunku. Manam simi apaykachaqkuna kanankuchu, manallataqmi machaykukuqpas kanankuchu, astawampas sipas warmikunapaqqa uj rikuchiyjinam paykunaqa kananku.

⁴ Sipas warmikunamanqa imaynatachus qharinkuman jinataq wawankunaman munakunanku chaytam awichakunaqa yachachinanku,

⁵ allin yuwayniyuq kanankupaq, ch'uwa sunquyuq, wasinkutapas allin rikukuq, munakuyniyuq jinataq qharinkuman uyariqkunatam yachachinanku, ajinamanta ama pipas Diospaq willayninta juch'uychanampaq.

⁶ Ajinallataq waynakunamanqa tukuy imapipas allin yuwayniyuq kanankupaq yachachiy,

⁷ chaypaqtaq qan kikin imaynatachus allin puriykachana kachkan chayta rikuchiy. Yachachispataq tukuy ch'uwa sunquykiwan jinataq chiqampi kaywan yacharichiy.

⁸ Ama pipas juch'uychanasunkipaqqa, imachus allin kachkan chayllata rimay. Ajinamantam pichus qanjawapi jatarikunqa chayqa p'inqaypi qhiparapunqa, imaraykuchus manañam ima mana allintapas nuqanchismanta rimayta atipunqachu.

⁹ Jaywaqkunamanqa, wasiyuqninkunaman tukuy imantimpi uyarinankupaq kunariy; paykunaqa munakuyniyuq kachunku, manataq kutkatakuqkuna kachunkuchu.

¹⁰ Jaywaqkunaqa ama suwakuchunkuchu, manachayqa chiqan runakuna kachunku, ajinamanta tukuy imapi jayk'a munaytaq Qhispichiq Diosninchispaq willaynin kachkan chayta rikuchinapaq.

¹¹ Tukuy runakunapaq qhispichiyta apamuspaqa, munakuynintam Diosqa rikuchiwanchis.

¹² Chay Diospaq munakuyninmi mana allin ruwaykunata jinataq kaypacha munapayaykunata mana ruwananchispaq yachachiwanchis, chay munakuyninllataqmi kunampachapi yuwaywan, chiqan kaywan jinataq khuyapayakuywan kawsakunanchispaq yachachiwanchis.

¹³ Ajinatam chay kusikuy jinataq musphachkay p'unchay chayamunankama kawsakunanchisqa, chay p'unchaytaq jayk'aqchus athunkaq Diosninchis jinataq Qhispichiqninchis Jesucristo kutimuchkanqa chhikam junt'akunqa.

¹⁴ Paymi nuqanchisrayku wañurqan, ajinamanta tukuy saqra kaymanta qhispichinawanchispaq jinataq junt'asqata picharapunawanchispaq, ajinata ruwaspam nuqanchismantaqa pay kikimpaq allin ruwanapaq tukuy sunqu qatiq llaqtanman tukuchipuwanchis.

¹⁵ Kaymi tukuy imatachus yachachinayki kachkan chayqa, kallpacharispa jinataq tukuy atiywan k'amiykuspa. Ama piwampas juch'uychachikuychu.