MATEO 8 - Dios Tatanchispaq Musuq Rimayninkuna

Jesusqa uj lliqi unquyniyuq runata alliyachin

¹ Jesusqa urquniqmanta uraqamuchkarqan chhikaqa, achkha runakunam payman qatimurqanku.

² Chay pachataq uj lliqi unquyniyuq runa paypaq ñawpaqimpi killpiykukuspa ajinata nirqan: –Tatay, munanki chhikaqa unquyniymanta pichararikuway ari –nispa.

³ Jesustaq makinwan llankharispa ajinata nirqan: –Qan alliyachiyta munanim. ¡Pichasqa kapuy! –Nispa. Chay runataq chhikapacha chay lliqi unquyninmanta pichasqa kapuspa alliyapurqan.

⁴ Jesustaq ujtawan ajinata nirqallantaq: –Uyariy, ama pimampas willamuychu; sacerdotellaman rikuchikumuy, jinaspataq kay picharasqa kapusqaykimanta jaywanaykita apakuspa Moisespaq kamachisqanmanjina qumuy, ajinamanta chay sacerdotekunaqa mana unquyniyuq kapusqaykita rikunankupaq –nispa.

Jesusqa romano kurajkaq pallapallapaq jaywaqninta alliyachin

⁵ Jesusqa Cafarnaúm llaqtaman waykuchkaqtin uj romano kurajkaq pallapalla mañarikunapaq qayllachakurqan,

⁶ paymantaq ajinata nirqan: –Apu Tata, jaywaqniymi imaymana nanaykunawan such'uyaspa ancha unquykunawan wasiypi ñak'arichkan –nispa.

⁷ Jesustaq payman ajinata jaynirqan: –Alliyachiq purisaqmi –nispa.

⁸ Kurajkaq pallapallataq ajinata jaynirqan: –Apu Tata, manam wasiyman qampaq waykumunayki chanichu kachkani. Kamachiyniykillata quway, jinaspataq jaywaqniyqa alliyapunqa.

⁹ Imaraykuchus nuqa kikimpas kurajkaqniykunapaq kamachisqanmi kani, jinataq nuqapaq makiypi waj pallapallakuna kamachinaypaqpas kallantaqmi. Maykaqtapas puriy nini chhikaqa, iyaw nispam purinku; ujman jamuy nini chhikaqa jamullantaqmi; jinataq jaywaqniyta ima ruwanampaqchus kamachini chhikaqa, payqa nisqaymanjinam ruwamun –nispa.

¹⁰ Jesustaq chayta uyarispa musphalla qhiparapurqan, jinaspataq pay qatiqkunaman ajinata nirqan: –Sut'intapuni niykichis, kay Israel suyupiqa chay tukuy iyawniyuqta manam uj runatapas kay runatajina taripanichu.

¹¹ Jinallataq niykichis achkha runakuna inti lluqsimuyniqkunamanta jinataq inti jalaykuyniqkunamanta jamunqaku, chhikamantataq Abrahamwan, Isaacwan, Jacobwan ima janaqpacha qhapaq suyupi mikhunapaq tiyarikunqaku.

¹² Janaqpacha suyupi kananku karqan chay runakunataq, jawaniq laqa ch'amakaman chhuqarqusqam kanqaku. Chhikataq waqay jinataq kiru k'uturakuykuna ima paykunapaq jamunqa –nispa.

¹³ Chhikamantataq kurajkaq pallapallaman Jesusqa ajinata nirqan: –Wasiykita puripuy, jinaspataq iyaw nisqaykimanjina munasqaykiqa junt'asqa kachun –nispa. Chay kikimpachapi pallapallapaq jaywaqninqa k'uchi kapurqan.

Jesusqa Pedropaq taykch'inta alliyachin.

¹⁴ Jesusqa Pedropaq wasinman purirqan, chaypitaq Pedropaq taykch'inta puñunapi lliqti unquywan unqusqa kachkaqta tariparqan.

¹⁵ Jesustaq makinmanta llankharirqan, chhikapachataq chay lliqti unquyninqa uraqapurqan; paytaq puñunanmanta jataripuspa paykunaman mikhuy jaywayta qallaripurqan.

Jesusqa achkha unqusqakunata alliyachin.

¹⁶ Tutayt'apuchkaqtintaq Jesús qayllaman imaymana millay saqra supayniyuq runakunata chayachimurqanku; Jesustaq uj kamachiywan chay millay saqra supaykunata chhuqarqurqan, jinallataq tukuy unqusqakunata alliyachirqan.

¹⁷ Tukuy kay ruwaykunataq Diospaq sutimpi willaq Isaiaspaq nisqanman junt'akunampaqmi ruwakurqan, jayk'aqchus ajinata nirqan chhika: “Paymi tukuy nanayninchiskunata jinataq unquyninchiskunata paypatapi apakupun –nispa.”

Jesusman qatiyta munaqkuna

¹⁸ Jesusqa achkha runakunawan muyuykusqa kasqanta rikuspaqa, qucha chimpaniqman purinapaq kamachirqan.

¹⁹ Chhikataq uj Diospaq kamachiyninmanta yachachiq runa payman qayllachakurqan, jinaspataq ajinata nirqan: –Yachachiq, maymanchus purichkanki chayman qatiyta munayki –nispa.

²⁰ Jesustaq payman ajinata jaynirqan: –Atuqkunaqa qarqa jutk'ukunapi wasiyuqmi, jinallataq pisqukunapas tapayuqmi kanku; chaywampas Nuqa runapaq Churinqa manam may chhikapi umayta ch'ijmarikunaypas kachkawanchu –nispa.

²¹ Ujkaq yachaqaq qatiqnin ajinata nirqallantaq: –Apu Tata, suyarillaway ñawpaqta tataytaraq pakarikumusaq –nispa.

²² Jesustaq payman ajinata jaynirqan: –Qatimuway, wañusqakuna wañusqa masinkunata pakakumuchun niy –nispa.

Jesusqa wayrata, phiñarikuq quchatawan thanichin

²³ Jesusqa yampuman chimparqan, yachaqaq qatiqninkunataq paywan kuska purirqanku.

²⁴ Ajina kachkaqtintaq, uj manchana wayra quchajawaman wayrarimurqan, qucha qhullchuqiywantaq yamputa unuwan junt'aykuchimpurqan, chay pachataq Jesusqa puñurikupusqa.

²⁵ Yachaqaq qatiqninkunataq, pay qayllata purispa ajinata nispa rijch'arichimurqanku: –¡Tata Jesús, qhispichiwaychis! ¡Quchaman chinkaykupuchkanchisñam! –Nispa.

²⁶ Paytaq paykunaman ajinata jaynirqan: –Pisi iyawniyuq runakuna ¿Imamantataq chay tukuyta mulljakuchkankichisri? Chayta nispataq, jatarimuspa uj kamachiywan chay wayrata jinataq quchatawan thanirichirqan, ajinamanta tukuy imapas ch'inlla kapurqan.

²⁷ Paykunataq anchata musphaspa tapunakurqanku: –¿Wayrapas quchapas payta uyarinampaq, pitaq kanman kay runari? –Nispa.

Jesusqa Gadara llaqtapi iskay supayniyuq runakunata alliyachin

²⁸ Jesusqa qucha chimpaniq Gadara jallp'aniqman chayarqan chhikaqa, aya pakana ukhumanta iskay millay saqra supayniyuq runakuna lluqsimuspa payman qayllachakumurqanku. Paykunataq runapaq ancha manchasqam karqanku, chayrayku chayniq ñantaqa manam pipas puriykacharqankuchu;

²⁹ jinaspa qapariyta qallarirqanku: –¡Diospaq Churin, ama nuqaykuwan jap'inakuychu! ¿Manaraq juchanchana p'unchay chayamuchkaqtinchu nuqaykuman ñak'arichinapaq jamunkiri? –Nispa.

³⁰ Paykuna qaylla chhikapitaq achkha khuchikuna mikhurachkarqanku,

³¹ millay saqra supaykunataq Jesusman ajinata mañarikurqanku: –Chhuqarquwankichis chhikaqa, chay khuchikunaman kachaykuriwaychis –nispa.

³² Jesustaq ajinata jaynirqan: –Puriychis –nispa. Chay millay saqra supaykunataq runakunamanta lluqsipuspa chay khuchikunaman waykupurqanku; chhikapachataq chay khuchikunaqa, imapas kanmanjina quchaniqman phawarispa chaypi unuwan mikirakuspa wañurapurqanku.

³³ Khuchi michiqkunataq llaqtaniqman phawaripurqanku, llaqtaman chayaspataq chay millay saqra supayniyuqkunawan ruwakusqan rikusqankuta runakunaman willayta qallaripurqanku.

³⁴ Chhikataq llaqtayuq runakuna tukuyninku Jesús qayllaman lluqsimurqanku, jinaspataq payman rikuspa chayniq suyumanta puripunampaq mañarikurqanku.