MATEO 7 - Dios Tatanchispaq Musuq Rimayninkuna

Jesusqa wakinkunaman ama juchanchanamanta yachachin

¹ Qankunaqa wakinkunaman ama juchanchaychischu, ajinamanta Diospaq mana juchanchasqan kanaykichispaq.

² Imaynatachus qankunaqa wajkunaman juchanchankichis, ajinallatataqmi Diosqa juchanchasunkichis; jinallatataq ima tupuwanchus wajkunapaq tupunkichis, kikin tupullawantaq qankunaman Diosqa tupuykusunkichis.

³ ¿Imamantataq wawqimasiykipaq ñawimpi uj juch'uy q'upa kaqta qhawachkankiri? ¿Qanqa, imamantataq chay chhikan k'ullu ñawiykipi kaqta mana rikukuyta atinkiri?

⁴ Qampaq ñawiykipi chhikan k'ullu kachkaqtin, ¿Imaynatataq wawqiykiman niwaq: “Chay ñawiykipi kaq q'upaykita jurqurisqayki,” nispari?

⁵ ¡Puraj uya! Ñawpaqtaqa ñawiykipi kaq k'ulluykitaraq jurqukuy, ajinamanta wawqiykipaq ñawimpi kaq q'upanta jurqunaykipaq.

⁶ “Diospaq kaqninkunataqa ama alqukunaman qaraykuychischu, chaymantataq kutkatamuspa wikharquchkasunkichisman, amallataq wallqakunaykichis pirlakunatapas khuchikunaman sarurqunankupaq qaraykuychischu.”

Jesusqa wajana, mañakuna jinataq maskanamanta yachachin

⁷ “Mañaychis, jinaspataq Diosqa qusunkichismi; maskaychis, taripankichismi; punkuman wajaychis, wisq'arasqallataq kankichis.”

⁸ Imaraykuchus mañaqqa jap'iqanmi; maskaqqa taripallantaqmi, jinallataq punkuman wajamuqmanqa wisq'arakullantaqmi.

⁹ ¿Qankuna chawpimanta maykaqpas; wawan t'ant'ata mañaqtin uj rumita irqaruchinmanchuri?

¹⁰ ¿Challwata mañaqtinchu icha, uj mach'aqwayata chhuqjaruchinmanri?

¹¹ Qankunaqa saqra kayniykichiswan wawaykichis mañaqtinkuqa astawan sumaqkunataraqmi quyta yachankichis ¡Jayk'ataraqmi janaqpachapi kaq Tataykichisqa sumaq kaqkunata mañasqaykichismanjina qusunkichismanqa!

¹² “Ajinaqa, qankuna imaynatachus wakinkunawan ruwasqa kayta munankichis, ajinallatataq qankunaqa paykunawan ruwaychis; imaraykuchus kaypim tukuy kamachiypas jinataq Diospaq sutimpi willaqkunapaq rimasqankunapas junt'akun.”

Jesusqa k'ullk'u punkuniqmanta yachachin

¹³ K'ullk'u punkuniqta waykuychis. Imaraykuchus chinkananiqman pusaq ñanwan jinataq punkuwanqa ancha athunmi, chayniqtataq achkhayuqmi waykunku;

¹⁴ Chaywampas kawsayman pusaq ñanwan jinataq punkunkaqwantaq k'ullk'ukunam, chaytataq as chhikayuqllam waykunapaq taripanku.

Jesusqa ruwasqankumantajina runa riqsiyta yachachin

¹⁵ “Diosniqmanta rimani nispa llulla yachachiqkunamanta jark'aqakuychis. Paykunataq sumaq uwijamanta p'achallt'akumuspa qankuna qayllaman jamunku, sunqunku ukhupitaq saqra suwa atuqkuna kanku.

¹⁶ Ruwasqankumantajina paykunataqa riqsiychis, imaraykuchus uvaskunaqa manam khichkhakunamanta pallaqanachu, manallataqmi higokunatapas tikakunamanta pallaqanachu kachkan.

¹⁷ Ajinaqa, allin sach'aqa sumaq urikunatam puquchin; mana allin sach'akaqtaq, mana allin urikunallatataq puquchin.

¹⁸ Sumaq sach'aqa mana allin urikunataqa manam puquchichkanmanchu, jinallataq mana allin sach'aqa sumaq urikunataqa manallataq puquchichkallanmantaqchu.

¹⁹ Mana allin uriq sach'akunataqa p'atarquspa ninaman chhuqaykuspa phichaykupunam.

²⁰ Ajinamanta, qankunaqa ruwasqankunamantajina chay llulla yachachiq runakunataqa riqsinkichis.”

Jesusqa Diospaq qhapaq suyunman waykunamanta yachachin

²¹ “Manam tukuy ¡Dios Tatay, Dios Tatay!” niqkunaqa janaqpacha qhapaq suyuman waykuchkanqakuchu, manachayqa pikunachus janaqpachapi kaq Tataypaq munayninta ruwaqkunallam waykunqaku.

²² Chhaqay p'unchaypiqa achkhayuq ‘Dios Tatay, Dios Tatay, nuqaykuqa sutiykipim willayniykikunata willaq puriyku, sutiykipillataq millay saqra supaykunata chhuqarqumuyku, jinataq musphay ruwaykunatapas sutiykipillataq ruwamuyku’ –nispa.

²³ “Chhikataq nuqaqa paykunaman ajinata jaynisaq: ‘Manam jayk'aqpas qankunata riqsirqaykichischu; ¡mana allin ruwaqkuna, uraqawaychis nuqamanta!’ –Nispa.”

Jesusqa iskay laya wasi ruwanamanta yachachin

²⁴ “Ajinaqa pichus nuqata uyariwan jinaspataq nisqayta junt'achkan chayqa, uj yuwayniyuq runapas wasinta qarqapatapi ruwakunman chayman rijch'akuqmi.

²⁵ Para chayamurqan, mayukunapas achkha waykumurqanku, jinallataq wayrapas wasiniqman kallpawan phukurimurqan; chaywampas manam chay wasiqa wijch'ukurqanchu, qarqapatapi ruwasqa kasqanraykuqa.

²⁶ Chaywampas pichus nuqata uyariwan jinaspataq nisqayta mana junt'achkan chayqa, uj ch'allapatapi wasi ruwakuq pisi sunqu runaman rijch'akun.

²⁷ Para chayamurqan, mayukunapas achkha waykumurqanku, wayrapas kallpawan phukurimurqan, chay wasitataq ch'usaqman tukjachipurqan.”

²⁸ Jayk'aqchus Jesusqa chay rimaykuna niyta tukuchapurqan chhikaqa, tukuy runakunam yachachisqankunata uyarispaqa musphalla karqanku.

²⁹ Paytaq athun atiyninwan yachachirqan, manataq Diospaq kamachiynin yachachiq runakunajinachu.