MATEO 4 - Dios Tatanchispaq Musuq Rimayninkuna

Supayqa Jesusta yanarin

¹ Ajayuqa Jesusta pusarqan ch'usaq qasi pampaniqman supaywan yanarisqa kanampaq.

² Chaypitaq tawachunka p'unchay, tawachunka tutapiwan mana ima mikhusqa kachkarqan, chhikamantataq yariqachikurqanmi.

³ Chhikataq Supayqa Jesusman yanarinapaq ajinata nispa qayllachakurqan: –Chiqachus Diospaq Churin kanki chhikaqa, kay rumikunata t'ant'aman tukuchun niy –nispa.

⁴ Chaywampas Jesusqa payman ajinata jaynirqan: –Qilqasqakunapiqa ajinatam nin: “Runaqa manam t'ant'allawanchu kawsanman, manachayqa tukuy Diospaq siminmanta lluqsiq rimaykunawampas kawsallanmantaqmi.” –Nispa.

⁵ Chay chhikamantataq, Supayqa Jerusalén ch'uwa llaqtaman pusarqan, chaypitaq Diospaq wasimpi janaqkaq pataman pusarqurqan,

⁶ jinaspataq payman ajinata nirqan: –Chiqachu Diospaq Churin kanki chhikaqa, kay patamantapacha pampaniqman t'alaqakuy; imaraykuchus Qilqasqakunapiqa ajinatam nin: “Diosmi angelninkunata qan pakanapaq kachamunqa. Makinkunawan uqharisunkichis, ajinamanta rumikunaman chayaspa ama chakiykikunata nanjachikunaykipaq.”

⁷ Jesustaq payman ajinata jaynirqan: –Qilqasqakunapiqa nillantaqmi: “Apu Tata Diosniykitaqa ama yanariychu,” nispa.

⁸ Wajmanta Supayqa uj athun urqupataniqman pusarqurqallantaq, jinaspataq tukuy kaypacha qhapaq suyukunata jinataq llaqtakunata rikuchispa,

⁹ payman ajinata nirqan: –Qanchus killpiykukuspa nuqata yupaychawankiman chhikaqa, tukuy kaykunata nuqa qupusqayki –nispa.

¹⁰ Chayta uyarispataq, Jesusqa payman ajinata jaynirqan: –Supay, puriy kaymanta, imaraykuchus Qilqasqakunapiqa ajinatam nin: “Tata Diosniykita yupaychay, jinataq pay sapallaman jayway” nispa.

¹¹ Chhikamantataq Supayqa jithiqapurqan, Jesusman jaywaqtaq uj angelkuna chayamurqanku.

Jesusqa Galilea suyupi llank'aynin ruwayta qallarin

¹² Jesusqa Bawtisaq Juanpaq jap'isqa kasqanta yachaspaqa, Galilea suyuniqman purirqan:

¹³ Chaywampas manam Nazaret llaqtapi qhiparapurqanchu, manachayqa Zabulón jinataq Neftalïpaq ayllumpi kaq Cafarnaúm quchapataniq llaqtaman tiyakuqmi puripurqan.

¹⁴ Ajinatam chay ruwakurqan imaynatachus Diospaq sutimpi willaq Isaiasqa qilqachkasqa chaymanjina junt'akunampaq.

¹⁵ “Zabulonpaq jinataq Neftalïpaq jallp'an, Jordán mayu chimpaniq qucha pataniqpi: mana judío kaqkunapaq tiyanan Galilea.

¹⁶ Ch'amakapi puriykachaq llaqtaqa uj musphay k'anchaytam rikun; wañuy laqa ch'amakapi tiyaqkunapaq uj k'anchaymi lliphipimun.” –Nispa.

¹⁷ Chhikamantapacha Jesusqa ajinata nispa tukuyman yachachiyta qallarirqan: “Diosman kutirimpuychis imaraykuchus Diospaq qhapaq suyunqa qankuna qayllapiñam kapun –nispa.”

Jesusqa tawa challwa jap'iq runakunata wajan

¹⁸ Jesusqa Galilea qucha ch'ullpaniqta purichkaspa, iskay wawqintin runakunata rikurqan: ujqa Simón, pichus Pedro nisqallataq karqan, ujkaqtaq Andrés, paykunaqa challwa jap'iq runakunam karqanku. Chhikataq challwa jap'ina ch'ipata unuman chhuqaykuchkarqanku.

¹⁹ Jesustaq paykunaman ajinata nirqan: –“Challwa jap'iq runakuna, qatimuwaychis, nuqataq runakuna qatinawankupaq maskayta yachachisqaykichis –nispa.”

²⁰ Jinaspataq chay kikimpachapi, challwa jap'ina ch'ipankunata saqiwachaspa Jesuswan kuska puripurqanku.

²¹ Tumpatawan karunchaspaqa, Jesusqa Santiagota wawqin Juantawan rikurqan, pikunachus Zebedeopaq churinkuna karqanku, quchapi tuyuq yampupatapitaq, challwa jap'ina ch'ipankunata allich'achkarqanku. Chhikataq Jesusqa paykunata wajarqan,

²² chay kikimpachapi, tatankuta yampupatapi saqiwachaspa Jesusta qatipurqanku.

Jesusqa achkha runakunata yachachin

²³ Jesusqa tukuy Galilea suyuniqta judiokunapaq tantakunan wasikunapi qhapaq suyupaq sumaq willayninkunata yachachispa, jinallataq tukuy runakunapaq unquyninkunata alliyachispa puriykacharqan.

²⁴ Tukuy Siria suyuniqkunapi Jesusmanta rimakurqan, jinaspataq tukuy mana allinkunamanta ñak'ariqkunata, jinallataq imaymana unquyniyuq, millay saqra supayniyuqkunata, t'uku unquyniyuqkunata, such'u runakunata ima payman apamurqanku. Jesustaq paykunata alliyachirqan.

²⁵ Galileamanta achkha runakuna, Decápolis suyuniq llaqtakunamanta, Jerusalén llaqtamanta, Judea suyuniqkunamanta, jinallataq inti lluqsimuyniq Jordán mayuniqkunamanta ima Jesusman qatirqanku.