MATEO 3 - Dios Tatanchispaq Musuq Rimayninkuna

Bawtisaq Juanpaq ch'usaq qasi pampapi kasqan

¹ Chhaqay p'unchaykunapiqa, Judea ch'usaq qasi pampaniqpi Bawtisaq Juan rikhurirqan.

² Paytaq willayninkunapi ajinata nirqan: “¡Diosman kutirimpuychis, imaraykuchus paypaq qhapaq suyunqa qayllapiñam kapun!” –Nispa.

³ Chay Juanqa, Diospaq sutimpi willaq Isaiasniqta imaynatachus Dios ajinata nichkarqan chaymi karqan: Ch'usaq qasi pampapi uj runapaq qaparisqan uyarikumun: “Dios Tatapaq ñanninta wakichariychis, uj chiqan ñanta wisq'arariychis.” –Nispa.

⁴ Juanqa, kamillupaq willmanmanta ruwasqa p'achawan churakurqan, chaytataq uj qara chumpiwan jap'ichikurqan, mikhuynintaq, t'iskut'iskukuna jinataq sach'a misk'ipiwanmi karqan.

⁵ Tukuy Judea jallp'amanta, Jerusalén llaqtapi kaqkuna jinallataq Jordán mayu qayllapi tiyaqkuna yachachisqanta uyarinapaq lluqsimurqanku.

⁶ Runakunataq juchankunata willakuspa Juanwan Jordán mayupi bawtisachikurqanku.

⁷ Juanqa fariseokunata jinataq saduceokunata bawtisachikuq jamuqta rikuspaqa, ajinata nirqan: “¡Mach'aqwayamanta miraq runakuna! ¿Pitaq chay manchay asut'iy jamuchkan chaymanta qhispisqa kanaykichista yuwachichkasunkichisri?

⁸ Sumaqta puriykachaychis ari, ruwasqaykichiswan Diosman kutiripusqaykichista sut'inta riqsichinaykichispaq.

⁹ Ama sunquykichis ukhupi: “Nuqaykuqa Abrahampaq tunu allchhinkunam kayku” nispa niychischu. Sut'inta niykichis, Diosqa kay rumikunatapas Abrahampaq tunu allchhinkunamanraq tukuchiyta atinman.

¹⁰ Uj chajra ruwaq runaqa mana sumaq uriq sach'ata rikuspaqa saphinmantapacha p'atawachaspam ninawan ruphaykuchin. Ajinallataqmi Diosqa mana allin ruwaqkunata t'unarqunapaq wakichasqa kachkan.

¹¹ Chiqampi qankunapaq Diosman kutirimunaykichispaqqa, unullawanmi nuqaqa bawtisachkaykichis; chaywampas nuqa chhikamanta jamuchkan chayqa, Ch'uwa Ajayuwan jinataq ninawan bawtisasunkichis. Paykaqmi nuqamanta niqtimpas astawan atiyniyuqqa, pipaqchus nuqaqa manam wata runanman chayaytapas atichkanichu.

¹² Payqa allin ruwaq runakunata, mana allin ruwaq runakuna chawpimanta ajlliwachanqa. Allin ruwaqkunataqa uj sumaq chhikaman churanqa, mana allin ruwaqkunatataq wiñaypaq lawrachkaq ninaman chhuqaykunqa” –nispa.

Juanqa Jesusta bawtisan

¹³ Jesusqa Galileamanta Jordán mayuniqman purirqan, maypichus Juan kachkarqan chayman, ajinamanta paywan bawtisachikunapaq.

¹⁴ Juantaq mana bawtisayta munaspa ajinata nirqan: –Nuqachariqa qampaq bawtisasqa kanayqa, ¿Imamantataq nuqawan bawtisachikuq jamunkiri? –Nispa.

¹⁵ Jesustaq ajinata jaynirqan: –Chayqa ajinalla kachkachun niy, chaywampas imachus Diospaq ñawpaqimpi chiqan kachkan chaymanjinam junt'ananchis –nispa. Chayta uyarirqan, chhikamantaraqmi Juanqa iyaw nirqan.

¹⁶ Jesús bawtisachikurqan, unu chawpimanta lluqsimpuchkaqtintaq, janaqpacha wisq'arakurqan, Diospaq Espiritontataq uj urpiman rijch'akuspa paypataman uraqamuchkaqta rikurqan.

¹⁷ Chhikataq janaqpachamanta uj kunkapaq ajinata nisqan uyarikumurqan: “Kaymi munasqa Wawayqa, mayqintachus ajllikuni –nispa.” –Nispa.