MATEO 28 - Dios Tatanchispaq Musuq Rimayninkuna

Jesuspaq kawsarimpusqanmanta willay

¹ Samarana p'unchay tukukupuchkaqtin, jayk'aqchus qhipantin p'unchaytaq kapurqan chhikaqa, María Magdalena jinataq ujkaq Mariapiwan aya pakana jutk'u qhawariq purirqanku.

² Kaymantajinataq kaypacha jallp'a kharkhatirqan, imaraykuchus Dios Tatapaq ujkaq angelninmi janaqpachamanta uraqamurqan, aya pakana jutk'u chhikaman chayaspataq punku wisq'ana rumita jithirichispa chay patapi tiyarikurqan.

³ Chay angeltaq llijullijujinam lliphipichkarqan, p'achantaq rit'ijina yuraq karqan.

⁴ Pallapallakunataq chayta rikuspaqa manchaymantam kharkhatirqanku jinaspataq wañusqajina tukupurqanku.

⁵ Chay angeltaq warmikunaman ajinata nirqan: –Ama manchaychischu. Nuqa yachanim pichus chakatasqa kachkarqan chay Jesús maskasqaykichistaqa.

⁶ Manam kaypichu kachkan, manachayqa kawsaripunmi, imaynatachus paypaq nisqanmanjina. May chhikamanchus churarqanku chay qhawariq jamuychis.

⁷ Usqhayta puriychis jinaspataq yachaqaq qatiqkunaman ajinata willamuychis: ‘Kawsarimpunñam, jinaspataq Galileaniqman wajmanta paykunata tanthapinapaq purichkan; chaypim paykunaqa rikunqaku –nispa.’ Kaytam qankunaman nuqaqa ninay karqan –nispa.

Jesusqa warmikunaman rikhurin

⁸ Aya pakana chhikamanta warmikunaqa usqhayllata chay willayta yachaqaq qatiqkunaman willaq phawakama manchaywan jinataq ancha kusikuywan puripurqanku.

⁹ Chhikataq Jesusqa paykunapaq ñawpaqimpi rikhurispa napaykurirqan. Paykunataq Jesusman qayllachakuspa chakinkunamanta ujllaykuspa yupaycharqanku,

¹⁰ Jesustaq paykunaman ajinata nirqan: –Ama manchaychischu. Puriychis jinaspa wawqiykunata Galileaman purichunku chaypitaq nuqata rikuwanqaku nimuychis –nispa.

Pallapallakunata ama rimanankupaq qulqiwan simita sat'iykunku

¹¹ Warmikuna purichkarqanku chhikankamataq, wakin aya pakana rikuq pallapallakunaqa llaqtaman chayarqanku jinaspataq kurajkaq sacerdotekunaman tukuy imachus ruwakuchkasqa chayta willamurqanku.

¹² Chhikataq kay kurajkaq sacerdotekunaqa machulakunawan rimthapiq purirqanku ajinamanta tukuyninku uj yuwayniyuqlla kanankupaq. Jinaspataq achkha qulqita pallapallakunaman quykurqanku,

¹³ paykunaman ajinata kunaykuspa: –Tuta kachkaqtin qankunapaq puñurachkanaykichiskama, Jesuspaq yachaqaq qatiqninkuna jamuspa chay ayata suwarqupurqanku, nispam qankunaqa ninkichis –nispa.

¹⁴ Llaqta purichiq Pilatochus kaymanta yachanqa chhikaqa, nuqaykum payman iyaw nichikuchkasaqku, jinaspam qankunaman ima mana allinkunamantapas jithiqachisqaykichis.

¹⁵ Pallapallakunataq qulqita jap'iqakuspa, imaynatachus kunaykuchkarqanku ajinamanjinam ruwamurqanku. Kay sut'inchaymi kunan p'unchaykama judiokuna chawpipi yachachikun.

Jesusqa yachaqaq qatiqninkunaman athun llank'ayta saqin

¹⁶ Chunka ujniyuq yachaqaq qatiqkunaqa Galileaman puripurqanku, may urqumanchus Jesusqa purinankupaq nichkasqa chay urquniqman puripurqanku.

¹⁷ Jayk'aqchus Jesusta rikurqanku chhikaqa, wakinkuna iskayakurqanku chhikapas paykunaqa yupaycharqankum.

¹⁸ Jesustaq paykunaman qayllachakuspa ajinata nirqan: –Diosmi janaqpachapi jinallataq kaypachapi tukuy atiyta quwan.

¹⁹ Puriychis, jinaspataq tukuy kaypacha llaqtakunapi kawsaq runakunata nuqapaq yachaqaq qatiqniykunaman tukuchimuychis; Dios Tatapaq, Churipaq jinataq Ch'uwa Ajayupaq sutimpi bawtisamullaychistaq,

²⁰ jinaspataq tukuy imatachus qankunaman kamachichkarqaykichis chaykunata uyarinankupaq yachachimuychis. Nuqaniqmantataq, sapa p'unchaymi kaypachapaq tukukupunankama qankunawan kuska kakuchkasaq. Ajina kachun –nispa.