MATEO 27 - Dios Tatanchispaq Musuq Rimayninkuna

Jesusta Pilatopaq ñawpaqinman puskatanku

¹ P'unchaytatampuqtinqa, tukuy kurajkaq sacerdotekuna, judiokunapaq machulankunapiwan imaynamanta Jesús wañuchinapaq rimthapinakumurqanku.

² Romano Pilato llaqta purichiq qayllaman watasqata apaspa puskatarqanku.

Judaspaq wañupusqan

³ Ranqaykuq Judastaq, Jesús wañuchinankupaq juchanchasqankuta rikuspaqa, chay ruwasqanmantaqa sunquntam nanarichikupurqan, jinaspataq kurajkaq sacerdotekunaman jinataq machulakunaman ima chay kimsa chunka qulqi jap'iqakusqanta kutichimpurqan,

⁴ paykunaman ajinata nispa: –Uj mana juchayuq runata wañunampaq puskatasqayrayku juchatam taripani, –nispa. Paykunataq payman ajinata jaynirqanku: –¿Chayqa, nuqaykupaq ima yachanaykutaqri? ¡Qampaq allich'akumunaykim chayqa! –Nispa.

⁵ Chhikataq Judasqa chay qulqikunata Diospaq wasin pampaman t'akawachaspa puripurqan, jinaspataq sipirqukumpurqan.

⁶ Kurajkaq sacerdotekunataq chay t'akawachasqa qulqita pallthapispa, ajinata nirqanku: –Kay qulqiqa yawarwan ch'itkatasqam; manam Diosman jaywana qulqiwan kuska churaykuchuwanchu –nispa.

⁷ Ajinaqa chay qulqiwan uj “Manka Lluch'iqpaq Jallp'an” nisqa sutiyuq chajranata rantinapaqmi rimanthapirqanku, chaytaq puriq runakuna p'amp'ana chhika kanampaqmi rantirqanku.

⁸ Chayrayku chay chajrana jallp'aqa “Yawar Jallp'a” nisqa sutiyuq kunan p'unchaykunakama kapun.

⁹ Ajinamantam Diospaq sutimpi willaq Jeremiaspaq nisqanqa junt'akurqan: “Kimsa chunka qulqikunata uqharirqanku, israelitakunapaq chanin churaykusqankuta,

¹⁰ chay qulqikunawantaq manka lluch'iqpaq jallp'anta rantirqanku, imaynatachus Apu Tataqa kamachichkarqawan chaymanjina.”

Jesusqa Pilatopaq ñawpaqimpi

¹¹ Jesusqa llaqta purichiq runapaq ñawpaqinman puskatasqam karqan, paytaq ajinata tapurirqan: –¿Qanchu judiokunapaq qhapaq suyu apaykachaqnin kankiri? –Nispa. Jesustaq –qan nichkanki –nispa jaynirqan.

¹² Kurajkaq sacerdotekuna jinataq machulakunawan tumpaykuchkarqanku chhikataq, Jesusqa manam imanispas jaynikurqanchu.

¹³ Chayrayku Pilatoqa payta ajinata tapurirqan: –¿Qanjawapi tukuy imata rimachkasqankuta manachu uyarinkiri? –Nispa.

¹⁴ Chaywampas Jesusqa manam uj simitapas jaynirqanchu; chayraykum llaqta purichiqqa musphalla qhiparapurqan.

Jesusta wañunampaq juchanchanku

¹⁵ Sapa wata raymi p'unchaypi llaqta purichiqqa uj jap'isqa runata runapaq ajllisqanmanjina kachariq karqan.

¹⁶ Chaypacha uj ancha riqsisqa runa Barrabás sutiyuq jap'isqa kachkarqallantaq;

¹⁷ chaypi tantakuchkaqtinkutaq, Pilatoqa paykunaman ajinata tapurirqan: –¿Qankunaqa mayqinkaqtataq kacharinayta munankichisri: Barrabastachu manachayqa Mesías nispa ninku chay Jesustachu icha? –Nispa.

¹⁸ Imaraykuchus Jesusta chhiqnikusqankurayku payman puskatasqankuta allintam riparakurqan.

¹⁹ Pilatoqa juchanchanapaq tiyakuna chhikapi tiyaykuchkaqtin, warmin payman ajina willaqta kacharqan: “Ama chay chiqan puriykachakuq runawan imatapas ruwaychu, imaraykuchus kunan tutaqa uj millay musquytam payrayku musqukuni –nispa.”

²⁰ Chaywampas kurajkaq sacerdotekuna jinataq machulakunapiwan imaqa, chay tantasqa runakunaman Barrabasta kacharinankupaq, Jesuskaqtataq wañuchinankupaq simita sat'ichkarqanku.

²¹ Llaqta apaykachaqtaq paykunaman wajmanta tapurirqan: –¿Qankuna kay iskayninmanta, maykaqtataq kacharinayta munankichisri? –Nispa. Paykunataq ajinata nirqanku: –¡Barrabaskaqta! –Nispa.

²² Pilatotaq paykunata tapurirqan: –¿Mesías nispa ninkichis chay Jesuskaqwan imatataq ruwasaqri? –Nispa. Tukuyninku ajinata jaynirqanku: –¡Chakataykuy! –Nispa.

²³ Pilatotaq paykunaman ajinata nirqan: –Ajinaqa, ¿ima mana allintataq pay ruwanri? –Nispa. Chaywampas paykunaqa wajmanta waqach'akurqanku: –¡Chakataykuy! –Nispa.

²⁴ Mana ima ruwayta atispa, manachayqa astawanraq runakuna ch'aqwaraqta rikuspa, Pilatoqa unu apamunankupaq kamachirqan, jinaspataq tukuyninkupaq ñawpaqimpi ajinata nispa makinta mayllaqakurqan: –Nuqaqa manam kay chiqan runapaq wañusqanmanta imatapas yachachkasaqchu; qankuna imaynamampas tukuchikumuychis –nispa.

²⁵ Tukuy runakunataq ajinata jaynirqanku: –¡Nuqaykum, wawaykunantin paypaq wañusqanmanta imapipas tukusaqku! –Nispa.

²⁶ Chhikataq Pilatoqa Barrabaskaqta kachawachapurqan; chhikamantataq Jesusta khirjanankupaq kamachispa chakatasqa kanampaq paykunaman kachkatapurqan.

²⁷ Llaqta purichiqpaq pallapallankunataq Jesusta qhapaq wasiman pusaykurqanku, jinaspataq pay muyuriyta tukuy pallapallakunata tantaykumurqanku.

²⁸ P'achankunata qichuqaspataq uj puka mantilluwan llijllaykuchirqanku,

²⁹ umampitaq khichkhamanta simp'asqa uj pilluwan churjatarqanku, paña makimpitaq uj k'aspita ayqaruchirqanku. Chhikamantataq ñawpaqimpi killpiykukuspa payman ajinata nispa asipayarqanku: –¡Judiokunapaq qhapaq suyu apaykachaqnin kawsachun! –Nispa.

³⁰ Jinallataq thuqkatarqanku, jinaspataq kikin k'aspiwan umapi waqtarqanku.

³¹ Paymanta ajinata asikuspataq, chay puka mantilluta qichuqaspa, kikin p'achanwan churaykuspa chakatanapaq pusakupurqanku.

Jesusqa chakataykusqam

³² Pilatopaq qhapaq wasinmanta lluqsimuspataq, Cirene llaqtapi tiyakuq Simón sutiyuq uj runata tariparqanku, pimanchus Jesuspaq chakananta apanampaq mat'iykurqanku.

³³ Jayk'aqchus Gólgota (chayqa suqu uma tullu, niyta munan) sutiyuq chhikaman chayapurqanku chhikataq,

³⁴ vinota jayaqiwan chhaqruykusqata ujyanampaq jaywarqanku; chaywampas Jesusqa mallirispa, manam ujyaykuyta munarqanchu.

³⁵ Chakataykupurqanku chhikamantataq, pallapallakunaqa paykunapura pujllanapijina Jesuspaq p'achanta ch'iqirachikunapaq qhawachkarqanku.

³⁶ Chhikamantataq chay chhikapi pay qhawanapaq tiyararqanku.

³⁷ Umampataniqpitaq, imaniqmantachus juchanchasqa kachkarqan chayta riqsichinankupaq sut'i chhikapi uj qilqasqata churkatarqanku. Chay qilqasqapitaq ajinata nirqan: “Kayqa judiokunapaq qhapaq suyu apaykachaqnin Jesusmi.” –Nispa.

³⁸ Paywan kuskataq iskayniyuq suwakunatawan chakataykurqanku, ujta pañaniqnimpi, ujkaqtataq lluq'iniqnimpi.

³⁹ Chayniq puriq runakunataq umankunata khiwirikuspa, mana allin rimaykunawan juch'uycharqanku,

⁴⁰ ajinata nispa: –¡Qanchu Diospaq wasinta t'unarqunayki, jinaspa kimsa p'unchaypi wajmanta sayarichinayki karqan! ¡Diospaq Churin kanki chhikaqa, qan kikin qhispichikuy jinaspataq chay chakanamanta uraqamuy! –Nispa.

⁴¹ Kikillantataq kurajkaq sacerdotekuna, Diospaq kamachiynin yachachiq runakunapiwan paymanta ajinata nispa asikurqanku:

⁴² –Wajkunataqa qhispichiyta atinmi, chaywampas pay kikinkaqqa manataq qhispichikuyta atichkanchuqä. Israel suyupaq qhapaq suyu apaykachaqnin chhikaqa, ¡Chakanamanta uraqamuchun, chayta rikuspa nuqaykupas iyaw ninaykupaq!

⁴³ Diospim sunqunta churanqa: ¡Ajinaqa Dios payta munakun chhikaqa qhispichichun ari! ¿Manachu Diospaq Churin kani nispa nichkarqawanchisri? –Nispa.

⁴⁴ Kikillantataq paywan kuska chakatasqa kachkarqanku chay suwakunantin payman juch'uycharqanku.

Jesuspaq wañupusqan

⁴⁵ Chawpi p'unchaymanta kimsa ch'isi pachakamaqa, tukuy kaypacham ch'amakaykupurqan.

⁴⁶ Chay kikin pachataq Jesusqa tukuy kallpawan ajinata qaparirqan: “Elí, Elí, ¿lemá sabactani?” (Kaytaq niyta munan: “Diosniy, Diosniy, ¿imamantataq saqirpariwankiri?”) –Nispa.

⁴⁷ Chaypi kaqkunamanta wakinkunataq, chayta uyarispaqa ajinata nirqanku: –Kayqa, Diospaq sutimpi willaq Eliastam wajachkan –nispa.

⁴⁸ Chhikapachataq, paykunamanta ujkaqnin uj thantha maskaq phawtarqan, chaytataq k'allk'u vinoman challpuykurqan jinaspa uj k'aspiman wataykuspataq Jesuspaq ch'umuykunampaq siminman qayllaykuchirqan.

⁴⁹ Chaywampas wakin runakunaqa ajinata nirqanku: –Ajinapi saqiwachay, ichapas Eliasqa pay qhispichiq jamunqa –nispa.

⁵⁰ Jesustaq wajmanta tukuy kallpanwan qaparirqan jinaspataq wañupurqan.

⁵¹ Chhikapachataq Diospaq wasin k'uchuniqpi kaq qatanaqa wichaymanta urayninkama iskayman llik'iwachakurqan. Kaypacha jallp'aqa kharkhatirqanmi, qarqakunapas phatmirakurqankum,

⁵² aya pakana jutk'ukunapas wisq'arakurqanku; jinataq ch'uwa kawsayniyuq wañuq runakunapas kawsarimurqankum.

⁵³ Jesuspaq kawsarimpusqan chhikamantataq, aya pakana jutk'ukunamanta lluqsiramurqanku, jinaspataq Jerusalén ch'uwa llaqtaman tukuy runakunapaq rikuchkasqankuta waykupurqanku.

⁵⁴ Jayk'aqchus kurajkaq romano pallapalla, jinataq pikunachus paywan kuska Jesusta qhawachkarqanku chaykunaqa, kaypacha jallp'apaq kharkhatisqanta, jinataq tukuy imachus ruwakuchkarqan chayta rikuspaqa anchatam mulljakurqanku, jinaspataq ajinata nirqanku: –¡Chiqampunim kay runaqa Diospaq Churin karqan! –Nispa.

⁵⁵ Chaypitaq karuniqmanta achkha warmikuna qhawachkarqanku; pikunachus Galileamantapacha Jesusta qatimusqaku, jinataq payta yanaparillasqakutaq.

⁵⁶ Chay chawpipiqa María Magdalena, Josepaq jinataq Santiagopaq maman María, jinataq Zebedeopaq churinkunapaq maman ima kachkarqanku.

Jesuspaq ayanta p'amp'anku

⁵⁷ Ch'isiyaykupuqtintaq, José sutiyuq Arimatea llaqtapi tiyaq uj qhapaq runa, pichus Jesuspaq qatiqnin kapusqa, chay runa chayamurqan.

⁵⁸ Joseytaq Pilato qayllata purisqa Jesuspaq ayanta mañakumpurqan. Pilatotaq qupunankupaq kamachirqan,

⁵⁹ Joseqa Jesuspaq ayanta jap'ispa uj musuq linomanta ruwasqa qatanapi llawuykurqan,

⁶⁰ jinaspataq qarqapi jutk'uchisqan uj musuq aya pakanaman p'amp'aykumpurqan. Uj athun rumiwantaq chay aya pakana jutk'upaq punkunta wisq'aykuspa puripurqan.

⁶¹ Chaywampas María Magdalenaqa ujkaq Mariapiwan chay aya pakanapaq ñawpaqimpi tiyachkaspa qhiparapurqanku.

Jesuspaq ayan pakasqa chhika qhawaqkuna

⁶² Samarana p'unchaymanta qhipantintaq, kurajkaq sacerdotekuna jinataq fariseokunapiwan ima Pilato qayllaman purirqanku,

⁶³ jinaspataq ajinata nirqanku: –Tata, yuwaykum imaynatachus chay llulla runaqa, wañupuspa kimsa p'unchaymanta kawsarimpusaq nisqantaqa.

⁶⁴ Chayrayku, chay aya pakana chhikaman qhawaqkunata kachay, kimsa p'unchay junt'akunankama, yachaqaq qatiqninkunapaq jamuspa ayanta ama suwarqunankupaq, jinaspa kawsarimpunmi nispa runakunaman ninankupaq. Ajina kanman chhikaqa, ñawpaqmanta niqtimpas kay llullaykuyqa astawan athunraqmi kanman –nispa.

⁶⁵ Pilatotaq paykunaman ajinata nirqan: –Chaypim qhawaq pallapallakuna qankunapaq kachkanku. Puriychis jinaspataq allinta chay aya pakana chhikata atisqaykichismanjina rikumuychis –nispa.

⁶⁶ Paykunataq purispa, chay aya pakana wisq'asqa punkunta allin ch'ikulliykusqata, pallapallakunatawan qhawanankupaq saqimpurqanku.