MATEO 25 - Dios Tatanchispaq Musuq Rimayninkuna

Chunka sipaskunamanta rijch'anachiy

¹ “Janaqpacha qhapaq suyuwanqa imaynatachus uj runachakuy raymipi ruwakurqan, chayjinallataqmi ruwakunqa: Chunkayuq sipaskuna wirawan lawraq micha k'anchayninkuta uqharikuspa runachakuq waynaman jap'iqaq lluqsirqanku.

² Paykunamanta phichqayuqqa mana llakiqakuqmi karqanku, wakinkaq phichqayuqtaq allin yuwayniyuq sipaskunam karqanku.

³ Mana llakiqakuq sipaskunaqa micha k'anchayninkuta apakurqanku, chaywampas wajmanta yaparikunapaqqa manam wirata apakusqakuchu;

⁴ yuwayniyuq sipaskunakaqtaq, micha k'anchayninkuta yaparikunapaq wiratawan aparikuspa purisqaku.

⁵ Runachakuq mana usqhay chayamuqtintaq, tukuyninkuman puñuy chayapusqa jinaspataq puñurapusqaku.

⁶ Chawpi tutaña kapurqan chhikataq ajinata nispa waqach'akuykuna uyarikumurqan: ‘¡Runachakuq jamuchkanñam! ¡Pay jap'iqaq lluqsimuychis!’ –Nispa.

⁷ Chay sipaskunataq tukuyninkum jatarispa micha k'anchayninkuta wakichayta qallarirqanku.

⁸ Chhikataq, chay mana llakiqakuq phichqa sipaskunaqa ujkaq phichqa yuwayniyuq sipaskunaman ajinata nirqanku: ‘As chhika micha wiraykichista quriwaychis, imaraykuchus nuqaykupaq micha k'anchayniykuqa wañjapuchkanñam –nispa.’

⁹ Yuwayniyuq sipaskunataq ajinata jaynirqanku: ‘Manam, imaraykuchus qankunapaqpas nuqaykupaqpas pist'apunmanmi. Allinmi kanman may chhikapichus ranqanku chayta qankuna kikin rantikuq purinaykichisqa –nispa.’

¹⁰ Chaywampas chay phichqa sipaskunapaq micha k'anchaypaq wira rantiq purinankukamaqa, runachakuqqa chayampurqanñam, jinaspataq yuwayniyuq kachkarqanku chay sipaskunallam paywan kuska runachakuy raymiman waykupurqanku, punkutaq wisq'aykukupurqanmi.

¹¹ Chhikamantataq wakin wira rantikuq puriq sipaskunaqa, ajinata nispa chayamullarqankutaqmi: “¡Tata, tata, wisq'arariwaychis!” –Nispa.

¹² Chaywampas payqa ajinatam jaynirqan: ‘Sut'inta niykichis qankunataqa manam riqsiykichischu,’ nispa.”

¹³ “Qankunaqa, rijch'arisqa suyaychis, imaraykuchus ima p'unchaytachus, jayk'aqchus Nuqa runapaq Churin jamusaq chaykaqtaqa manam yachachkankichischu.”

Qulqiniqmanta rijch'anachiy

¹⁴ “Janaqpacha qhapaq suyuwanqa, imaynatachus uj runa jawaniq karu llaqtaniqman puripunan kachkaqtin, jaywaqninkunata wajaspa qulqinkunata saqirqan, ajinatam ruwakullanqataq.

¹⁵ Ujman phichqa waranqa qulqita saqirqan, ujmantaq iskay waranqata, ujkaqmantaq waranqata: sapa ujman atiyninkumanjina. Chhikamantataq karuniqman puripurqan.

¹⁶ Phichqa waranqa jap'iqaqqa, chay qulqita llank'aykuchispa waj phichqa waranqatawan tantaykurqan.

¹⁷ Kikillantataq iskay waranqa jap'iqaqqa iskay waranqatawan tantaykurqan.

¹⁸ Chaywampas waranqa jap'iqaq runakaqqa, purispa chay wasiyuqnimpaq qulqinta uj jutk'uta jallp'a pampapi jutk'urqusqam chayman pakaykumpurqan.”

¹⁹ Karupachamantataq chay jaywaqkunapaq wasiyuqnin kutirimpurqan, jinaspataq paykunawan kuska qulqin yupthapiyta qallarirqan.

²⁰ Ñawpaqtaqa phichqa waranqa qulqi jap'iqaq runa chayamurqan, jinaspataq waj phichqa waranqa qulqitawan ajinata nispa wasiyuqninman qupurqan: ‘Tata, phichqa waranqa qulqitam qanqa qurqawanki, kaypim waj phichqa waranqatawan miratatachisqayta qupusqayki –nispa.’

²¹ Wasiyuqtaq payman ajinata nirqan: ‘Allillanmi, ancha kusa jinataq uyarikuq jaywaq runam kanki; ajinaqa as chhikapi uyarikuq kasqaykimantaqa achkha kaqniykunajawapi atiyniyuq kanaykipaqmi saqisqayki. Waykumuy nuqawan kuska kusikunaykipaq –nispa.’

²² Chhikamantataq iskay waranqa qulqi jap'iqaq jaywaq runa chayamullarqantaq, jinaspataq ajinata nirqan: ‘Tata, iskay waranqa qulqitam qan qurqawanki, kaypim waj iskay waranqatawan miratatachisqayta qupusqayki’ –nispa.

²³ Wasiyuqnintaq payman ajinata nirqan: ‘Allillanmi, ancha kusa jinataq uyarikuq jaywaqmi kanki; ajinaqa as chhikapi uyarikuq kasqaykiraykuqa achkha kaqniykunajawapi atiyniyuq kanaykipaq saqisqayki. Waykumuy nuqawan kuska kusikunaykipaq.’

²⁴ “Chaywampas uj waranqa jap'iqaq jaywaqtaq chayamuspa wasiyuqninman ajinata nirqan: ‘Tata, qampaq ancha qhatukuq runa kasqaykitaqa, sumaqtam nuqa yachani, maypichus mana tarpusqa kachkan chaypi apthapiq kasqaykita jinataq mana t'akasqa kachkan chaypi pallthapiq kasqaykitapas yachallanitaqmi.

²⁵ Chayraykum mancharqani, jinaspataq jallp'a ukhuman qulqiykita purispa pakaykumpurqani. Ajinaqa kaypim qulqiykiqa kakuchkan kutichipusqayki’ –nispa.

²⁶ Wasiyuqtaq payman ajinata jaynirqan: ‘Qan, mana imapaq allin saqra qilla jaywaqmi kanki, nuqapaq mana tarpusqaypi apthapiq kasqayta jinataq mana t'akasqaypi pallthapiq kasqayta sumaqta yacharqanki chhikaqa,

²⁷ chay qulqiytaqa qulqi pakana wasiman apanaykim karqan, jinaspataq nuqa kutimuspa chay qulqiyta mirayninwantaraq jurqukupuyman karqan’ –nispa.

²⁸ Jinaspataq chaypi kaqkunaman ajinata nirqan: ‘Chay uj waranqa qulqinta qichuqaychis jinaspataq chunka waranqa qulqiyuqman qupuychis.

²⁹ Imaraykuchus achkha kaqniyuqmanqa, astawanraq puchunantimpaq qukunqa; chaywampas mana kaqniyuqmanqa, as chhika kaqnintapas qichuqasqaraqmi kanqa.

³⁰ Kay mana imapaq allin jaywaqtataq, jawaniq laqa ch'amakaman chhuqawachamuychis. Chaypitaq paypaq waqanan kanqa jinataq kirunkunatapas k'uturakunqaraqmi.’

Tukuy llaqtakunapaq juchanchaynin

³¹ “Jayk'aqchus Nuqa runapaq Churin sumaq k'anchayniywan jinataq tukuy angelniykunawan muyuykusqa jamusaq chhikaqa, sumaq k'anchayniyuq tiyanaypim tiyaykurikupusaq.

³² Tukuyniq llaqtakunapi kawsaq runakunataq nuqapaq ñawpaqiypi tantaykukunqaku, nuqataq imaynatachus uj michiq runaqa uwijakunata cabritukunamanta ajlliwachan, ajinallatataqmi nuqaqa ajlliwachasaq.

³³ Uwijakunataqa pañanniqman, cabritukunakaqtataq lluq'inniqman churasaq.

³⁴ Jinaspataq Nuqaqa pañaniqniypi kaqkunamanqa ajinata nisaq: ‘Qankunaqa jamuychis, mayqinkunachus Tataypaq sumaq kaynin qusqa kankichis chaykunaqa; kaypacha qallariymantapacha qankunapaq wakichasqa qhapaq suyuta, jap'iqaychis.

³⁵ Imaraykuchus yariqasqam kachkarqani, qankunataq mikhuyta qurirqawankichis; unumanta ch'akisqam kachkarqani chhikataq unuta ujyanaypaq jaywarirqawankichis; qurpacharikuytam maskachkarqani, qankunataq qurpacharirqawankichis.

³⁶ Mana p'achayuqmi kachkarqani, qankunataq p'achata qurqawankichis; unqusqam kachkarqani, qankunataq nuqaman rikuq jamurirqawankichis; wisq'asqam kachkarqani, qankunataq nuqa rikuq jamurqankichis’ –nispa.

³⁷ Chhikataq chiqan puriykachakuq runakunaqa ajinata tapurinqaku: ‘Apu Tata, ¿jayk'aqtaq yariqasqata rikuspa mikhuyta jaywarirqaykichisri? Manachayqa, ¿jayk'aqtaq unumanta ch'akisqata rikuykichis jinaspataq unuta ujyarinaykipaq quykichisri?

³⁸ Manachayqa, ¿jayk'aqtaq qurpachakunata maskachkaqtiyki qurpacharirqaykichisri? ¿Mana p'achayuqta rikuspachu icha p'achata quykichisri?

³⁹ Manachayqa, ¿jayk'aqtaq unqusqata, jinataq wisq'asqata rikuspa qan rikuq purirqaykuri?’ –Nispa.

⁴⁰ Nuqataq paykunaman ajinata jaynisaq: ‘Sut'intapunim niykichis, jayk'aqchus tukuy kaykunata uj llamp'u sunquyuq juch'uy wawqipanaykunarayku ruwankichis chhikaqa, nuqa kikinwanmi ruwallankichistaq’ –nispa.”

⁴¹ “Chhikamantataq Nuqaqa tukuy lluq'iniqniypi kaqkunaman ajinata nisaq: ‘Nuqamanta uraqawaychis saqra runakuna; supaypaq jinataq angelninkunapaq wakichasqa kachkan, chay wiñaypaq nina lawrachkan chayman puriychis.

⁴² Imaraykuchus yariqasqam kachkarqani, qankunataq manam mikhuyta qurirqawankichischu; unumanta ch'akisqam kachkarqani chhikapas manallataqmi unuta ujyarinaypaq jaywarirqawankichischu;

⁴³ qurpachakuytam maskachkarqani, qankunataq manam qurpacharirqawankichischu; mana p'achayuqmi kachkarqani, qankunataq manam p'achata qurqawankichischu; unqusqa jinataq wisq'asqa kachkarqani, qankunataq manam nuqaman rikuriq jamurqankichischu’ –nispa.

⁴⁴ Chhikataq paykunaqa ajinata tapurinqaku: ‘Apu Tata, ¿Jayk'aqtaq yariqasqata, unumanta ch'akisqata, qurpachakuyta maskachkaqta, mana p'achayuqta, unqusqata, manachayqa wisq'asqatachu icha rikurqaykichis, jinaspa mana yanaparirqaykichisri?’ –Nispa.

⁴⁵ Nuqataq paykunaman ajinata jaynisaq: ‘Sut'intapunim niykichis, jayk'aqchus tukuy kaykunata uj llamp'u sunquyuq juch'uy wawqipanaykunarayku mana ruwankichis chhikaqa, nuqa kikinwampas manallataqmi ruwachkankichischu.’

⁴⁶ Chaykunaqa wiñay ñak'ariyman purinqaku, chiqampi kawsakuqkunataq wiñay kawsanaman puripunqaku –nispa.”