MATEO 24 - Dios Tatanchispaq Musuq Rimayninkuna

Jesusqa Diospaq wasin t'unasqa kananmanta willan

¹ Jesusqa Diospaq wasinmanta lluqsimpuspa puripuchkarqanñam, ajinaman yachaqaq qatiqninkunaqa payman qayllachakuspa Diospaq wasin chhikapi kaq wasikunata jawaniqmanta rikuchiyta qallarirqanku.

² Jesustaq paykunaman ajinata nirqan: –¿Qankunaqa, tukuy kaykunata rikunkichischuri? Sut'inta niykichis, kaypiqa manam uj rumipas waj rumijawapi puchunqachu. Ch'usaq t'unarqusqam kapunqa –nispa.

Manaraq kaypacha tukukuynimpaq rikuchiykuna

³ Olivos urquniqman puripurqanku. Jesustaq chaypi tiyarikurqan, yachaqaq qatiqninkunataq payman qayllachakuspa sapan kachkaqtin ajinata tapurirqanku: –¿Jayk'aqtaq Diospaq wasin t'unarqusqa kanqari? ¿Imaynatataq qampaq wajmanta jamunaykita jinataq kaypachapaq tukukuynin p'unchayta yachasaqkuri? ¿Tukuy kaykuna ruwakuchkananqa chhikaqa, maykaq rikuchiykunataq kanqari? Chaytam yachayta munayku –nispa.

⁴ Jesustaq paykunaman ajinata jaynirqan: –Yuwaywan allinta qhawaqarikuspa kachkaychis, ama piwampas llullaykuchikunaykichispaq.

⁵ Imaraykuchus, achkhayuqmi nuqapas kachkayman ajinata jamunqaku. Jinaspataq ajinata ninqaku: “Nuqam Mesías kani” –nispa, ajinamantataq achkha runakunatam llullaykunqaku.

⁶ Qankunaqa kayniqpi jinataq chhaqayniqkunapi tupjanakuykunamanta willaykunata uyarinkichis chhikaqa ama mulljakunkichischu, imaraykuchus ajinapunim chayqa kanan; chaywampas, chayqa manaraqmi kaypachapaq tukuchaynin p'unchaychu kachkanqa.

⁷ Imaraykuchus uj suyuqa waj suyuwan maqanakunapaq uqharikunqa, uj qhapaq suyutaq waj qhapaq suyuwan tupjanakunapaq ch'aqwayta qallarinqaku; Jinallataq tukuy chhikakunapim kaypacha jallp'a kharkhatiykuna jinataq mikhuymanta yariqachikuykuna ima kanqa.

⁸ Kaykunaqa ñak'ariykunapaq ñaqa qallariyninkunallaraqmi kanqa.

⁹ “Chhikataq qankunata chhuqrichinapaq puskatasunkichis; jinaspataq wañuchisunkichis, tukuy kaypachataq nuqarayku chhiqnikusunkichis.

¹⁰ Chay p'unchaykunapitaq achkha runakunam nuqapi iyaw nisqankuta saqiwachapunqaku, paykunapura chhiqninjakuspa ranqaykunakunqaku.

¹¹ Llulla willaqkunam rikhurimunqaku, jinaspataq achkha runakunaman llullaykunqaku.

¹² Chay tukuy saqrakay kapuqtintaq, manañam runamasintinqa munakuy kapunqañachu.

¹³ Chaywampas tukuchaykama thuru sayarikuqllam qhispichisqa kanqa.

¹⁴ Diospaq kay qhapaq suyumpaq sumaq willayninkunataq, tukuy kaypachaman willasqam kanqa, ajinamanta tukuy llaqtakuna riqsinankupaq; chhikataq tukukuy p'unchay chayaykumpunqa.”

¹⁵ “Pichus kayta ñawirinqa chayqa umampi yuwaywan jap'iqachun. Imaynatachus Diospaq sutimpi willaq Danielqa ajinata qilqachkarqan chaytaqa; Diospaq sinchi millakusqan qhillichaq ruwayta ch'uwa kachkan chay chhikapi qhinchachaspa ruwakuqta rikunkichis chhikaqa,

¹⁶ Judea suyupi kaqkunaqa urqukunaman pakaykukunapaq phawaripuychis.

¹⁷ Jinataq pichus wasipata kanchampi kachkanqa chayqa, ama ima kaqninkunata jurqukumunapaqpas uraqamuchunchu;

¹⁸ chajranapi kachkaqtaq ama qhipaniqman p'achanta uqharikumunampaq kutirichunchu.

¹⁹ ¡Imalla kachkanqa chay p'unchaykunapi wawa unquq wijsayuq warmikunapaq, jinataq ñuñuchkaq wawayuqkunapaqqa!

²⁰ Qankunaqa Diosman mañakuychis ama qasa p'unchaykunapi jinataq samarana p'unchaypipas phawarinaykichis kanampaq.

²¹ Imaraykuchus chhikaqa, kaypacha qallariymanta kunankama mana jayk'aqpas kaq ancha athun ñak'ariykunam kanqa, chhikamantaqa manallataqmi jayk'aqpas kapunqañachu.

²² Dioschu chay p'unchaykunata mana juch'uyachinman chhikaqa, manam pipas qhispisqa kachkanmanchu; chaywampas payqa ajllikusqankunata munakusqanraykum chay p'unchaykunataqa juch'uyachinqa.”

²³ “Chay pachakunapichus, qankunaman pipas ajinata nisunkichis: “Qhawariychis, kaypim Mesías kachkan,” manachayqa “qhawariychis chhaqayniqpim kachkan,” nispa chhikaqa, ama iyaw niychischu.

²⁴ Imaraykuchus llulla mesiaskuna jinataq llulla willaq runakunam jamunqaku; paykunataq athun rikuchiykunawan jinataq musphay ruwaykunawan ima runakunaman llullaykuspa pantachinqaku, jinallataq atinqaku chhikaqa Dios kikimpaq ajllikusqankunantintam pantachinqaku.

²⁵ Qankunamanqa ñawpaqtañam manaraq tukuy chaykuna chayamuchkaqtin umancharichkaykichis.

²⁶ Chayrayku, ‘Qhawaychis chhaqay ch'usaq qasi pampapi kachkan,’ niqtinkuqa ama puriychischu; manachayqa, ‘Qhawaychis, kaypi pakaykusqam kachkan,’ niqtinkupas amallataq iyaw niychispaschu.

²⁷ Imaraykuchus Nuqa runapaq Churimpaq jamunayqa, imaynatachus uj llijulliju inti lluqsimuyniqmanta inti jalaykuyniqman k'ancharichkan, ajinam nuqapaq kutimuyniyqa kanqa.

²⁸ Maypichus aya kachkan, chaypim suwiq'arakunaqa tantakumunqaku. Ajinaman nuqapaq kutimunayqa kanqa, tukuyninkum yachanqaku.”

Runapaq Churimpaq kutimuynin

²⁹ Ñak'ariy p'unchaykuna puripuqtinjinataq, intiqa laqayaykupunqam, killapas manañam k'ancharimpunqañachu, quyllurkunapas janaqpachamanta jalaqamunqaku, jinataq janaqpacha atiykunapas kharkhatirinqakum.

³⁰ Chhikataq janaqpachapi Nuqa runapaq Churin jamusqayta willanapaq rikuchiyniyta tukuyninku rikunqaku, ajinamanta athun manchaywan kharkhatispa tukuy kaypacha llaqtakuna waqanqaku, jinaspataq Nuqa runapaq Churinta phuyu chawpipi janaqpachamanta tukuy athun atiyniywan jinataq sumaq k'anchayniypi athunchasqa jamuchkaqta rikuwanqaku.

³¹ Jinaspataq angelniykunata uj athun pututuwan tukuyniqmanta, kaypacha jinataq janaqpacha k'uchukunamanta ajllikusqaykunata tantaykumunankupaq kachasaq.

³² “Higo sach'amanta yachachisqata yachaqakuychis: Jayk'aqchus llaqankuna q'umirtatapun jinataq ch'ijch'irimpuchkan chhikaqa para pachapaq qayllachakumpusqantam yachapunchis.

³³ Chay kikillantataqmi, jayk'aqchus tukuy kay rikuchiykuna ruwakuqta rikunkichis chhikaqa, Nuqa runapaq Churin jamunay qayllaña kasqanta yachapunkichis.

³⁴ Sut'intapunim niykichis: Tukuy kaykunaqa kay p'unchaykunapi kawsachkaq runakuna manaraq wañuchkaqtinmi ruwakupunqa.

³⁵ Janaqpachapas jinataq kaypachapas tukukupunqam, chaywampas rimayniykunakaqqa manam jayk'aqpas tukukuchkanqachu.”

³⁶ “Jayk'aqchus jamunay p'unchay jinataq pachakaqmantaqa manam pipas yachachkankuchu, janaqpachapi kaq angelkunapas, nuqa Churipas yachachkanichu. Dios Tatay sapallanmi chaytaqa yachan.”

³⁷ “Imaynachus Noepaq p'unchayninkunapi ruwakurqan, ajinallataqmi Nuqa runapaq Churin kutimuchkasaq chhikaqa ruwakunqa.

³⁸ Unuwan juchanchay pachamanta ñawpaqin p'unchaykunapiqa, Noepaq athun yampuman waykunan p'unchaykamaqa, runakunaqa mikhuchkarqanku, ujyachkarqanku, jinallataq runachakuchkarqanku;

³⁹ chaywampas, mana pipas suyachkarqan chhikam, unuwan juchanchay p'unchay kaymantajina chayamuspa tukuyninkuta aparikupurqan. Ajinallataqmi jayk'aqchus Nuqa runapaq Churin kutimusaq chhikaqa ruwakunqa.

⁴⁰ Chhaqaypachapiqa, iskay runakuna chajrapi kachkaqmantaqa, ujnin uqharisqa kanqa, ujninkaqtaq saqiwachasqam kapunqa.

⁴¹ Iskay piqarachkaq warmikunamantaqa, ujninmi uqharisqa kapunqa ujninkaqtaq saqiwachasqam kanqa.”

⁴² “Chayrayku qankunaqa rijch'arisqa qhawaqarikuspa suyachkaychis, imaraykuchus ima p'unchaychus Apu Tataykichis jamunqa chaymantaqa manam yachachkankichischu.

⁴³ Chaywampas kayta yachaychis, uj wasiyuq runachus jayk'aq suwapaq wasinman waykumunanta yachanman chhikaqa, rijch'arisqam suyaykunman jinaspataq manam pitapas wasinman suwakuq waykunanta saqinmanchu.

⁴⁴ Chayrayku qankunapas wakichasqallataq kachkaychis; imaraykuchus Nuqa runapaq Churinqa, jayk'aqchus astawan pisita suyachkankichis chhikam, kaymantajina jamusaq.”

Iskay laya jaywaqkuna

⁴⁵ “¿Maykaqtaq, uyarikuq jinataq astawan sumaq runa kachkan, jinaspataq pimanchus wasiyuqqa wasimpi kaqkunata pachampi mikhuyta jaywanampaq saqichkan chay jaywaqri?

⁴⁶ Kusikuyniyuqmi chay jaywaqqa, pimanchus wasiyuqninqa chayamuspa imachu ruwanampaq saqisqanta ruwachkaqta taripan chayqa.

⁴⁷ Sut'inta niykichis wasiyuqqa chay jaywaqta tukuy wasimpi kaqninkunjawapi atiyniyuqtam saqipunqa.

⁴⁸ Chaywampas chay jaywaqchus millay saqra, jinaspa wasiyuqnimpaq manaraq chayamunanta yuwachkaspa

⁴⁹ waj jaywaq masinkunata maqayta qallarin jinaspataq ujyaq runakunawan tantakun mikhunapaq jinataq ujyanapaq chhikaqa,

⁵⁰ mana suyasqan p'unchaypi jinataq mana yachasqan pachapim kaymantajina wasiyuqninqa chayamunqa,

⁵¹ paytataq khirjanqa puraj uya runakunatajina juchanchasqa kanampaq. Chhikataq paypaq waqay jamunqa kirunkunatapas k'uturakunqa.”