MATEO 22 - Dios Tatanchispaq Musuq Rimayninkuna

Runachakuy raymimanta rijch'anachiy

¹ Jesusqa ujtawan rijch'anachiykunawan rimayta qallarirqan. Paykunamantaq ajinata nirqan:

² “Janaqpacha qhapaq suyuqa, uj qhapaq suyu apaykachaqqa churimpaq runachakunan raymita ruwarqan, ajinamanmi rijch'akun.

³ Raymiman wajasqakunata wajamunankupaq jaywaqninkunata kacharqan, chaywampas chay wajasqakunaqa manam jamuyta munarqankuchu.

⁴ Waj jaywaqninkunata wajmanta kacharqallantaq, ajinata kunarispa: ‘Raymiman wajasqakunata mikhuy wakichasqañam nispa nimuychis. Wira uywaykunata jinataq wakaykunata imam ñak'arachimuni, ajinapas tukuy allich'asqañam kachkan; raymiman jamuchunku nimuychis –nispa.’

⁵ Chaywampas wajasqakunaqa, manam jamuyta munarqankuchu. Ujqa chajrananta purikupusqa, ujkaqtaq imachu ruwananta ruwakuq purikupusqallataq,

⁶ wakinkunataq, qhapaq suyu apaykachaqpaq jaywaqninkunata jap'ispa, wañuchinakama maqjapusqaku.

⁷ Chhikataq qhapaq suyu apaykachaqqa anchata phiñarikupurqan, jinaspataq pallapallankunata kamachispa chay jaywaqninkunaman wañuchiq runakunata wañurachimunankupaq jinataq llaqtankunatapas phichaykumunankupaq kacharqan.

⁸ Chhikamantataq jaywaqninkunaman ajinata nirqan: ‘Raymiqa wakichasqañam, chaywampas chay wajasqakunaqa manam jamunanku chanichu karqanku.

⁹ Ajinaqa llaqta ñankunaman qankunaqa puriychis, jinaspa tukuy pikunatachus taripankichis chaykunata raymiman wajthapimuychis –nispa.’

¹⁰ Jaywaqkunataq llaqta ñankunaman lluqsispa tukuy imaymana allin jinataq mana allin runakunata taripaspa tantarqumurqanku; ajinamantataq raymi wasiqa junt'aykumpurqan.”

¹¹ “Jayk'aqchus qhapaq suyu apaykachaqqa wajasqakunata qhawkataq waykurqan chhikaqa, chaypiqa uj mana runachakuy raymiman purin p'achayuq runata rikurqan.

¹² Paymantaq ajinata nirqan: ‘Wawqimasi, ¿Imaynatataq mana runachakuna raymiman purin p'achayuq kayman waykumunkiri? –Nispa.’ Chaywampas, payqa jup'alla uyarqasirqan.

¹³ Chhikataq qhapaq suyu apaykachaqqa mikhuna jaywaqkunaman ajinata kamachirqan: ‘Chakinkunamanta, makinkunamantawan ch'uqaykuychis, jinaspa jawaniq laqa ch'amakaniqman chhuqawachamuychis.’ Chaypim paypaq ñak'arispa waqanan kanqa jinataq kirunkunatapas k'uturakunqa.

¹⁴ Imaraykuchus achkhayuqmi wajasqakunaqa, chaywampas ajllisqakunaqa pisillam” –nispa.

Qulqi apthapinamanta yachachiy

¹⁵ Fariseokunaqa, Jesusman sipitamanjina churaspa mana allinta rimarquchinapaq jinaspataq tumpaykunapaq rimakipanakumurqanku.

¹⁶ Ajinamanta paykunapaq qatiqninkunata, Herodespaq qatiqninkunatawan kuska Jesusman tapurimunankupaq kacharqanku: –Yachachiq, runapaq nisqanta mana manchaspa chiqan rimasqaykita nuqaykuqa allintam yachayku, imaraykuchus manam paykunapaq munasqankumanjina puriykachanankupaq rimachkankichu. Chiqampipunim qanqa Diospaq ñanninta yachachinki.

¹⁷ Ima ninkitaq kaymanta: ¿Roma llaqtapi kaq athun suyukuna apaykachaq Cesarpaq qulqi apthapiykunata qunaykupunichu? –Nispa.

¹⁸ Jesustaq, saqra yuwayninkunawan payman qayllachakumusqankuta yachaspaqa, paykunaman ajinata nirqan: –Puraj uya runakuna, ¿Imamantataq sipitamanjina urmaykuchiyta munawankichisri?

¹⁹ Apthapinapaq kachkan chay uj qulqita rikuchiwaychis –nispa. Paykunataq uj denario nisqa qulqita payman jaywarqanku,

²⁰ Jesustaq ajinata paykunaman tapurirqan: –¿Pipaq uyantaq kay, jinataq pipaq sutintaq kaypi qilqasqa kachkan chayri? –Nispa.

²¹ Paykunataq ajinata jaynirqanku: –César athun suyukuna apaykachaqpaqmi –nispa. Chhikamantataq Jesusqa paykunaman ajinata nirqan: Chhikaqa, imachus Cesarpaq kachkan chaytaqa Cesarman quychis ari, Diospaq kachkan chaytataq Diosllamantaq quychis –nispa.

²² Chayta uyarirqanku chhikataq, musphalla qhiparapurqanku; jinaspataq puripurqanku.

Wañusqakunapaq kawsarimunankumanta

²³ Wakin saduceokuna Jesusman rikuq purirqanku. Paykunaqa: wañusqakuna manam kawsarimunkumanchu nispam nirqanku, ajinaqa kay willayta payman willarqanku.

²⁴ –Yachachiq, Moisesqa ajinatam nirqan: ‘Uj runachus warminwan manaraq wawayuq kachkaspa wañupunman chhikaqa, wañuqpaq wawqinqa chay sapayaq warmiwan runachakupunan, ajinamanta wañuq wawqinman wawakunata qunampaq –nispa.’

²⁵ Ajinaqa, nuqayku chawpipi uj kuti qanchis wawqimasintin karqanku. Kurajkaq runachakurqan, chhikamantataq wañupurqan. Manaraq wawakunayuq kasqanraykutaq, iskaykaq sullk'anman warminta saqipurqan.

²⁶ Kikillantataq chay iskaykaq sullk'a wawqinqa wañupurqallantaq, jinaspataq kimsakaq wawqimpiwan ima, ajinallatataqmi tukuyninkupas wañurapurqanku, qanchiskaq wawqinman chayanankama.

²⁷ Tukuyninku wañupusqankumantataq, chay sapayaq warmiqa wañupurqallantaqmi.

²⁸ Ajinaqa, wañuymanta kawsarimuna p'unchaypiqa, qanchisnin wawqimasintinwan runachakupusqanraykuqa, ¿mayqimpaq warmintaq chay warmiqa kapunqari? –Nispa.

²⁹ Jesustaq paykunaman ajinata jaynirqan: –Qilqasqakunata jinataq Diospaq atiyninta mana riqsisqaykichisraykuqa ¡Ima pantasqataq kachkankichis!

³⁰ Jayk'aqchus wañusqakuna kawsarimunqaku chhika p'unchayqa, qharikunapas jinataq warmikunapas, manam runachakunqakuchu, imaraykuchus janaqpachapi kaq angelkunajinam tukupunqaku.

³¹ Wañusqakunapaq kawsarimunanmantataq, ¿qankunaqa manachu ñawirirqankichis, Dios kikin ajinata nisqanta:

³² ‘Nuqa Abrahampaq, Isaacpaq, jinataq Jacobpaq Diosnin kani’ nisqantari? ¡Payqa manam wañusqakunapaq Diosninchu, manachayqa kawsachkaqkunapaq Diosninmi!

³³ Chayta uyarispataq, runaqa anchata Jesuspaq yachachisqankunamanta muspharqanku.

Jesusqa astawan kurajkaq kamachiymanta riman

³⁴ Saduceokunaman Jesuspaq jup'ayachisqanta yachaspa fariseokunaqa tanthapikumurqanku.

³⁵ Ujkaq Diospaq kamachiyninmanta yachachiq karqan chayqa, uj sipitamanjina urmaykuchinapaq Jesusman ajinata tapurirqan:

³⁶ –Yachachiq, ¿mayqinkaqtaq kamachiykunamanta astawan kurajkaqri? –Nispa.

³⁷ Jesustaq payman ajinata nirqan: –‘Dios Tataykita tukuy sunquykiwan, tukuy kawsayniykiwan jinataq tukuy yuwayniykiwan munakuy.’

³⁸ Kaymi kamachiykunamanta astawan kurajkaq jinataq ñawpaqkaqqa.

³⁹ Chaywampas uj chayman rijch'akuqpiwanraq kan; chaytaq ajinatam nin: ‘Runa masiykitaqa qan kikimpas kanman ajinata munakuy.’

⁴⁰ Kay iskay kamachiykunapim tukuy kamachiykuna jinataq Diospaq sutimpi willaqkunapas rimasqankunata tiyaykuchirqankuqa.

¿Mesiasqa, pipaq churintaqri?

⁴¹ Fariseokuna tantaykusqaraq kachkaqtinkutaq,

⁴² Jesusqa paykunaman ajinata tapurirqan: –¿Qankunaqa, Mesiasmanta ima ninkichistaqri? ¿Pipaq mirayninmantam ninkichistaqri? –Nispa. Paykunataq ajinata jaynirqanku: –Davidpaq mirayninmantam –nispa.

⁴³ Jesustaq paykunaman ajinata nirqan: –¿Ajinaqa, Davidqa Ajayupaq yuwachisqanmanjina, imamantataq Apu Tata nispa ninri? Imaraykuchus Davidqa ajinatam nirqan:

⁴⁴ ‘Dios Tataqa, Apu Tatayman ajinatam nin: Nuqawan kuska tiyarikuy, qanman chhiqnikuqniykikunata chakiyki pampaman churanaykama.’

⁴⁵ David kikinchus Apu Tata nispa nin chhikaqa ¿Imaynatataq Mesiasqa Davidpaq mirayninmanta jamuq tunu allchhin kanmanri? –Nispa.

⁴⁶ Manam pipas uj simitapas jayniyta atirqankuchu, jinaspataq chay p'unchaymantapacha manam pipas astawan tapuriyta munapurqankuchu.