MATEO 20 - Dios Tatanchispaq Musuq Rimayninkuna

Jesusqa uvas chajrapi llank'aqkunamanta rijch'anachin

¹ “Janaqpacha qhapaq suyuqa uj chajrayuq runaman rijch'akun, pichus qhipantin ancha tutapaqariymanta uvas chajran llank'achinapaq llank'aqkunata mink'aq lluqsirqan.

² Paykunawantaq uj p'unchay kallpasqamanta qunampaq rimanarirqan, jinaspataq uvas chajranman llank'amunankupaq kachapurqan.

³ Chay kikin p'unchaytaq ñaqa ñawpaq akullipacha, wajmanta lluqsirqan, jinaspa wakinkunata llaqtakanchapi qasi tiyarachkaqta rikurqan.

⁴ Paykunamantaq ajinata nirqan: ‘Qankunapas uvas chajrayman llank'aq purillaychistaq, jinaspataq kallpasqaykichismanjina chiqan kachkan chaytam qusqaykichis –nispa.’ Paykunataq llank'aq purirqanku.

⁵ Chajrayuqqa wajmanta chawpi p'unchay, jinataq ch'isi akulli pachapas lluqsispa, kikillantataq ruwarqan.

⁶ Ch'isiyaykupuqtintaq, puripunapaq ñaqa apthapikuna chhika pacha wajmanta llaqtakanchaniqman purispa, waj qasi tiyarachkaq runakunata taripallarqantaqmi, jinaspataq ajinata paykunaman tapurirqan: ‘¿Imamantataq qankunaqa tutamantapacha kunankama mana llank'aspa qasi tiyarachkankichisri? –Nispa.’

⁷ Paykunataq ajinata jaynirqanku: ‘Manam pipas nuqaykuta mink'akuchkawankuchu, chayraykum qasilla tiyarakuchkayku –nispa.’ Chajrayuqtaq paykunaman ajinata nirqan: ‘Qankunapas, uvas chajrayman llank'aq purillaychistaq,’ nispa.”

⁸ “Tutayaykupuqtintaq, chajrayuqqa ajinata llank'achiq runaman nirqan: ‘Tukuy llank'aqkunata wajay, jinaspataq qhipa waykuqkunamanta qallarispa ñawpaq waykuqkunaman tukuchaspa kallpasqankunamanta qupuy –nispa.’

⁹ Chaypitaq pikunachus qhipata ch'isiyaykupuqtinña llank'aq waykuchkarqanku chaykuna llank'achiqman chimparqanku, jinaspataq uj p'unchay junt'asqa kallpasqamantam jap'iqarqanku.

¹⁰ Tutamantapacha ñawpaqta waykuq llank'aqkunapaq chimpananku kapurqan chhikataq, uj p'unchay kallpasqamanta niqtimpas astawan achkhatachä jap'iqasun nispa yuwachkarqanku; chaywampas sapa ujninku kikin uj p'unchay kallpasqallamanta jap'iqapurqanku.

¹¹ Chayta jap'iqaspataq chajrayuqpaq ajinata nispa thuthukuyta qallarirqanku:

¹² ‘Nuqaykuqa tutamantapacha ch'isiyaykunankama chay tukuy ruphaypi llank'ayku; kaykunataq ch'isi chayamuspa uj chhikapachallata llank'arinku, chaywampas nuqaykuwan kikintapas kallpankuman ajinatam qanqa paykunaman kallpasqankunamanta quchkanki,’ nispa.

¹³ Chajrayuqtaq ujkaqman ajinata jaynirqan: ‘Wawqimasiy, ima mana allintapas manam ruwachkaykichu. ¿Manachu qanwan uj p'unchay kallpasqamanta qunapaq rimachkarqanchisri?

¹⁴ Ajinaqa, chay kallpasqaykimanta jap'iqaspa puripuy. Nuqachus kay qhipa waykumuqman qanmanjina kikinta quyta munani chhikaqa,

¹⁵ nuqapaq munayniymi qulqiywan ima ruwakunaypasqa. ¿Manachayqa nuqapaq sumaq sunquyuq kasqaymantachu icha chhiqnikuchkankiri?’ –Nispa.”

¹⁶ “Ajinaqa, pikunachus kunan p'unchay qhipapi kachkanku, chaykunam ñawpaqpi kanqaku; jinallataq, pikunachus kunan p'unchay ñawpaqpi kachkanku chaykunaqa qhipapim kapullanqakutaq.”

Jesusqa kimsa kutiña wañunanmanta willan

¹⁷ Jerusalén llaqtaman purichkaspataq, Jesusqa chunka iskayniyuq yachaqaq qatiqninkunata wajniqman wajaspa ajinata nirqan:

¹⁸ –Qankunapaq rikusqaykichismanjina, kunanqa Jerusalén llaqtaman chimpachkanchis, maypichus Nuqa runapaq Churinqa, kurajkaq sacerdotekunaman jinataq Diospaq kamachiynin yachachiq runakunaman puskatasqa kasaq, pikunachus wañunaypaq juchanchawanqaku,

¹⁹ jinaspataq nuqamanta asikunankupaq, maqjanawankupaq jinataq chakataykunawankupaq puriq runakunaman puskatawanqaku; chaywampas nuqaqa kimsa p'unchaymantam kawsarimpusaq.

Jesusqa Santiagopaq jinataq Juanpaq mamanta jaynin

²⁰ Zebedeopaq churinkunapaq maman; Santiago, jinataq Juan wawankunata pusarikuspa Jesusman qayllachakurqan, jinaspataq ñawpaqimpi mañarikunapaq killpiykukurqan.

²¹ Jesustaq payman ajinata tapurirqan: –¿Imatataq munankiri? –Nispa. Paytaq ajinata jaynirqan: –Qhapaq suyuykipiqa ujkaq churiyta pañaniqniykipi, ujkaqtataq lluq'iniqniykipi tiyarikunankupaq kamachiy –nispa.

²² Jesustaq ajinata jaynirqan: –Qankunaqa manam mañasqaykichista yachachkankichischu. ¿Nuqajina ñak'arinapaq jinataq ima tukuy mana allinkuna nuqawan ruwakuchkanqa, chaypaq wakichasqachu kankichisri? –Nispa. Paykunataq ajinata nirqanku: –Wakichisqam kayku –nispa.

²³ Jesustaq paykunaman ajinata jaynirqan: –Qankunaqa nuqajinallataqmi anchata ñak'arinkichis, chaywampas pichus nuqapaq pañaniqniypi jinataq lluq'iniqniypi tiyarikunankuqa manam nuqapaq qunaychu kachkan, manachayqa pikunapaqchus Tatayqa wakichachkan chayman qusqam chayqa kanqa.

²⁴ Jayk'aqchus wakin chunkayuq yachaqaq qatiqkuna chayta uyarirqanku chhikaqa, chay iskaynin wawqimasintinkunapaq anchatam phiñarikupurqanku.

²⁵ Jesustaq paykunata wajarispa ajinata nirqan: –Qankuna allinta yachankichis, imaynachus kaypachapiqa llaqta jinataq suyukunata apaykachaqkunaqa, munayninkumanjina imatapas ruwaspa runakunajawapi manchay atiyninkuwan tiyaykukunku. Jinataq kurajkaqkunaqa atiyniyuq kasqanta runakunapaq ñawpaqimpi rikhurichinku.

²⁶ Chaywampas qankuna chawpipiqa manam ajina kananchu. Astawampas wajniqmantam kanan. Qankuna chawpimanta pichus kurajkaq kayta munan chhikaqa, wakinkunamanmi jaywananqa;

²⁷ jinataq pichus ñawpaqpi kayta munan chayqa, wakinkunapaq jaywaqninman tukt'aspam paykunaman jaywanallantaq.

²⁸ Imaraykuchus ajinallataqmi Nuqa runapaq Churimpas mana kaypachaman jaywachikuqchu jamuni, manachayqa tukuy runakunaman jaywanapaq jinallataq paykunarayku kawsayniyta qunapaqmi kaypachaman jamuni –nispa.

Jesusqa iskay ñawsakunata qhawatatachin

²⁹ Paykunaqa Jericó llaqtamanta lluqsimuchkarqanku chhikataq, achkha runakunam Jesusman qatimurqanku.

³⁰ Iskay ñawsakuna ñanjawapi tiyarachkarqanku, Jesuspaq chayniqman purisqanta uyarispataq, ajinata waqach'akurqanku: –¡Apu Tata, Davidpaq Churin, nuqaykumanta khuyapayarikuy! –Nispa.

³¹ Runakunataq ama waqach'akunankupaq k'amiyta qallarirqanku, paykunataq astawan kallpawanraq waqach'akurqanku: –¡Apu Tata, Davidpaq Churin, nuqaykumanta khuyapayarikuy! –Nispa.

³² Chaymanta Jesusqa purichkaspa sayt'arqan, chay iskay ñawsakunata wajaspataq ajinata tapurirqan: –¿Imatataq qankunapaq ruwanayta munankichisri? –Nispa.

³³ Paykunataq ajinata jaynirqanku: –Apu Tata, wajmanta qhawatatayta munayku –nispa.

³⁴ Jesustaq paykunamanta khuyapayarikuspa, ñawinkunamanta llankharirqan. Chay kikin pachapitaq chay ñawsakunaqa qhawatataspa Jesusman qatipurqanku.