MATEO 2 - Dios Tatanchispaq Musuq Rimayninkuna

Yachaysapa runakuna wawa qayllata chayanku

¹ Judea suyupi kaq Belén llaqtapim Jesusqa paqarirqan, maypichus Herodesqa chay suyupaq qhapaq suyu apaykachaqnin karqan. Chaypachataq inti lluqsimuyniqmanta Jerusalén llaqtaman uj yachaysapa runakuna chayamurqanku, pikunachus quyllurkunamanta yachjataqkuna karqanku.

² Jinaspataq ajinata tapurikurqanku: –¿May chhikapitaq judiokunapaq qhapaq suyu apaykachaqnin paqarinri? Nuqaykuqa quyllurnin lluqsimuqta rikuyku, chaymantam payman yupaychaq jamuyku –nispa.

³ Chayta uyarispaqa, qhapaq suyu apaykachaq Herodesqa anchatam mulljakurqan, jinallataqmi karqan Jerusalén llaqtapi tiyaq runakunapaqqa.

⁴ Chhikamantataq Herodesqa tukuy kurajkaq sacerdotekunaman jinataq kamachiy yachachiqkunaman ima wajaspa, may chhikapichus Mesías paqarinan karqan chay yachanapaq tapurikurqan.

⁵ Paykunataq ajinata nirqanku: –Judea suyupi kaq Belén llaqtapi, imaraykuchus ajinatam Diospaq sutimpi willaqqa qilqarqan:

⁶ Qanrï Judá suyupi kaq Belén, tukuy kaypachapi athumpi qhawasqa llaqtakunamanta niqtimpas manam astawan juch'uykaqchu kanki; imaraykuchus qanmantam uj llaqta purichiq runa lluqsinqa, mayqinchus Israel suyuyta apaykachanqa –nispa.

⁷ Chhikataq Herodesqa pakamanta yachaysapa runakunata wajarqan, ajinamanta may chhikapichus chay quyllurqa rikhurirqan chay yachqatanapaq.

⁸ Chhikamantataq Belén llaqtaman ajinata nispa kacharqan: –Chhaqayniqman puriychis jinaspa imachu atisqaykichista ruwaspa chay wawamanta yachqatamuychis, ajinamanta nuqapas payman yupaychaq purinallaypaqtaq –nispa.

⁹ Kay qhapaq suyu apaykachaqpaq kunayninkunawanmi yachaysapa runakunaqa puriykupurqanku. Rikusqanku quyllurtaq paykunapaq ñawpaqintam puriykurqan, may chhikapichus wawaqa paqarirqan chay chhikaman sayt'anankama.

¹⁰ Jayk'aqchus quyllurta rikurqanku chhikaqa, chay yachaysapa runakunaqa anchatapunim kusirikurqanku.

¹¹ Chhikamantataq chay wasiman waykuspa, wawata María mamanwan kuska tariparqanku; killpiykukuspataq payta yupaycharqanku. Chhikamantataq istallankunamanta qurita, kupalata, mirratawan jurquspa wawaman jaywarqanku.

¹² Chhikamantataq, Diosqa paykunaman musquyniqta ama Herodes qayllata kutirinankupaq willarqan. Ajinamanta paykunaqa wajniq ñanta llaqtankuman kutipurqanku.

Egiptoman phawarisqanku

¹³ Yachaysapa runakunapaq puripusqankumantaqa, Dios Tatapaq uj angelnin Joseman musquypi rikhurispa ajinata nirqan: “Jatariy, wawata mamantawan pusqarukuy, jinaspa Egipto llaqtaman phawariy. Chaypitaq nuqapaq willayniyta uyarinaykikama suyawanki, imaraykuchus Herodesqa wañuchinapaqmi wawata maskanqa.”

¹⁴ Chay tutapacham Joseqa wawata jinataq mamantawan pusqarukuspa Egipto llaqtaniqman puripurqan,

¹⁵ maypichus Herodespaq wañupunankama tiyamurqanku. Kaytaq ajinamanta ruwakurqan imaraykuchus Dios Tatapaq nisqan junt'akunampaq, imaynatachus Diospaq sutimpi willaqniqta nichkarqan chaymanjina, ajinata nispa: “Egiptomanta Wawayta wajamuni –nispa.”

Wawakunata wañuchinankupaq Herodesqa kamachin

¹⁶ Herodesqa yachaysapa runakunapaq payman llullaykusqankuta yachaspaqa anchatapunim phiñarikupurqan; ajinamanta Belenpi jinataq chay qaylla llaqtakunapi kawsaq runakunapaq wawankunata iskay watayuqmanta urayman wañurachimunankupaq kamachirqan.

¹⁷ Ajinamantam Diospaq sutimpi willaq Jeremías runapaq qilqasqan junt'akupurqan:

¹⁸ “Uj kunka Ramá chhikapi uyarikun, musphay waqay, ayquykuna ima. Payqa Raquelmi karqan, wawankunaraykum waqachkarqan, manam sunquchasqa kayta munachkarqanchu, imaraykuchus wañurachisqaña kapurqanku chayrayku.”

Jesuspaq wasimasinkuna Nazaret llaqtapi tiyaykunku

¹⁹ Herodes wañupuqtintaq, Egiptopi Diospaq uj angelnin Joseman musquynimpi rikhurispa ajinata nirqan:

²⁰ “Jatariy, wawata mamantawan qanwan kuska pusqarukuy, jinaspataq Israel suyuman kutiripuy, imaraykuchus payman wañuchiyta munaqkunaqa wañupunkuñam” –nispa.

²¹ Chhikataq, Joseqa jatarispa wawata mamantawan Israel suyuniqman pusarikupurqan.

²² Judea suyupi Herodespaq churin Arquelao, tatan lantimpi llaqta purichichkasqanta yachaspaqa; Joseqa chayniqman puriyta mancharipurqanmi, ajinamanta musquynimpi Diosmanta willasqa kachkaspa Galilea suyuniqman puripurqan.

²³ Chayniqman chayaspataq, Nazaret llaqtaniqman kawsakuq puripurqan. Kaytaq ajinamanta ruwakurqan imaynatachus Diospaq sutimpi willaqkuna nichkarqanku chaymanjina junt'akunampaq: Imaraykuchus Nazaret llaqtapi kaq Jesús nisqam kanan karqan.