MATEO 19 - Dios Tatanchispaq Musuq Rimayninkuna

Jesusqa qhariwarmi mana wijch'unakunamanta yachachin

¹ Jesusqa Galilea suyumanta puripurqan, jinaspataq Jordán mayumanta inti lluqsimuyniq Judea suyuman chayarqan.

² Achkha runakuna Jesusta qatirqanku, chaypitaq unqusqakunata alliyachirqan.

³ Wakin fariseokunataq Jesusman qayllachakuspa, sipitamanjina jalaykuchinapaq pantachiyta munaspa payman ajinata tapurirqanku: –¿Ima kaqtimpas, qharipaq warmin wijch'unanqa atikunmanchuri? –Nispa.

⁴ Jesustaq paykunaman ajinata jaynirqan: –¿Qallariypi pichus ‘qhari warmita ruwarqan’ chayta manachu qankunaqa Qilqasqakunapi ñawirirqankichisri? –Nispa.

⁵ Jinaspataq ajinata nirqan: ‘Chayrayku, qhariqa tatanta jinataq mamantawan saqinqa warminwan ujlla kapunankupaq, iskayninkutaq uj runamanjinallam tukupunqaku.’

⁶ Ajinaqa manañam iskayñachu kapunku, manachayqa uj sapallamanmi tukupunku. Ajinaqa Diospaq qhariwarmita ujman tukuchisqantaqa, manam pi runapas wijch'unachiyta atinkumanchu –nispa.

⁷ Paykunataq ajinata tapurirqanku: –¿Ajinaqa, imamantataq Moisesqa uj wijch'unakuna qilqasqa llaqata warmiman quspa kachawachapunam nispa kamachirqanri? –Nispa.

⁸ Jesustaq paykunaman ajinata nirqan: –Moisesqa wijch'unakuyqa atikunmi nispam nisunkichis, qankunapaq pisi sunqu kasqaykichisrayku; chaywampas qallariypiqa manam chayqa ajinachu kachkarqan.

⁹ Nuqataq niykichis, pichus warminta mana wajwan puriykachachkaqtin mana juchayuqta wijch'un, jinaspa waj warmiwan runachakupun chhikaqa, millay khuchi juchatam chay qhariqa ruwan –nispa.

¹⁰ Yachaqaq qatiqninkunataq payman ajinata nirqanku: –Ajinaqa, kaychus qharipaq warminwan ajina kanan chhikaqa, runachakunaqa manam allinchu kachkanqä –nispa.

¹¹ Jesustaq paykunaman ajinata jaynirqan: –Manam tukuyninku kaytaqa yuwaywan jap'iqachkankumanchu, manachayqa pikunamanchus Diosqa yuwayta qun chaykunallam jap'iqankuman.

¹² Runakunapaqqa imaymana yuwaykunam mana runachakunankupaq kan: ujkunaqa, wawamantapacham runachakunapaq mana atiyniyuq paqarinku, wakinkunamantaq runakunallataq mana atiyniyuqta tukuchipunku, wajkunataq janaqpacha qhapaq suyurayku mana atiyniyuqjina kawsanku. Pichus kayta yuwaywan jap'iqan chayqa, sumaqta jap'iqachun.

Jesusqa wawakunaman sumaq kayta qun

¹³ Wawakunata Jesús qayllaman paypaq makinwan uña umankunamanta llankharispa Diosman paykunamanta mañapunampaq puskatarqanku; chaywampas yachaqaq qatiqkunaqa, chay puskataqkunaman k'amiyta qallarirqanku.

¹⁴ Chhikataq Jesusqa ajinata nirqan: –Chay wawakuna nuqaman chimpamuqta ama jark'aychischu, imaraykuchus Diospaq qhapaq suyunqa kay wawakunajina kaqkunapaqmi –nispa.

¹⁵ Wawakunapaq uña umankunapi makinta churqatarqan, jinaspataq chay chhikamanta puripurqan.

Qhapaq wayna

¹⁶ Uj wayna Jesusman rikuq purispa ajinata tapurikurqan: –Yachachiq, ¿Wiñay kawsay taripanaypaq, ima allin ruwaytataq ruwanay kanmanri? –Nispa.

¹⁷ Jesustaq payman ajinata jaynirqan: –¿Imamantataq imachus allin kachkan chaymanta tapuriwankiri? Uj sapallam allinqa kan. Chaywampas, kawsayman waykuyta munanki chhikaqa, kamachiykunatam junt'anayki.

¹⁸ Waynataq –¿Mayqinkunatataq junt'anayri? –Nispa tapurikurqan. Jesustaq ajinata payman nirqan: –‘Ama wañuchiychu, ama millay khuchi juchakunata ruwaychu, ama suwakuychu, ama waj runakunajawapi mana allinman chayachinapaq llulla rimaykunata rimaychu,

¹⁹ tataykita mamaykitawan athumpi kachiy, jinataq runa masiykita qan kikimpas kanman ajinata munakuy,’ nispa.

²⁰ –Tukuy chaykunata junt'apuniñam, ¿Imawanraqtaq junt'anay kanmanri? –Nispa waynaqa nirqan.

²¹ Jesustaq payman ajinata jaynirqan: –Chiqan runa kayta munanki chhikaqa, puriy jinaspataq kaqniykikunata ranqaramuy, chhikamantataq mana imayuq wajcha runakunaman qumpuy. Ajinamanta janaqpachapi tukuy imayuq qhapaq kaqniykikuna kanampaq. Chhikamantataq jamuspa nuqaman qatimuway –nispa.

²² Chayta uyarispataq waynaqa, llakisqam puripurqan, imaraykuchus payqa ancha qhapaq runam karqan.

²³ Chhikataq Jesusqa yachaqaq qatiqninkunaman ajinata nirqan: –“Sut'inta niykichis, imaraykuchus uj qhapaq runapaq janaqpacha qhapaq suyuman waykunanqa ancha kallpam kanqa.

²⁴ Ujtawampas nisqallaykichis, astawan jasallaraqmi kanman uj kamilluqa yawripaq ñawinniqta ujniqman lluqsinanqa, Diospaq qhapaq suyumpi uj qhapaq runapaq waykunanmanta niqtimpasqa” nispa.

²⁵ Chayta uyarispataq, yachaqaq qatiqninkunaqa, astawanraqmi musphararqanku, jinaspataq ajinata nirqanku: –Chhikaqa, ¿pitaq qhispichikuyta atinqari? –Nispa.

²⁶ Jesustaq paykunaman qhawkataspa ajinata jaynirqan: –Kayqa runapaq manam atikunchu, chaywampas Diospaqqa imapas atikullanmi –nispa.

²⁷ Chhikataq Pedroqa ajinata nirqan: –Nuqaykuqa tukuy ima kaqniykunata saqirpayamuyku jinaspa qanman qatiykichis ¿Imatataq jap'iqasaqkuri? –Nispa.

²⁸ Jesustaq paykunaman ajinata jaynirqan: –Sut'inta niykichis, jayk'aqchus tukuy imapas musuqmanta ruwakupunqa chhikapacha: Jayk'aqchus Nuqa runapaq Churin sumaq k'anchayniypi atiyniywan tiyanaypi tiyaykurikupusaq chhikaqa, qankuna nuqaman qatiqniykunaqa chunka iskayniyuq Israel suyupi kaq llaqtakunaman juchanchanapaqmi athun tiyanakunapi tiyarikupunkichis.

²⁹ Jinallataq tukuy pikunachus, wawqinta, pananta, tatanta, mamanta, wawankunata, ichapas chajranankunata nuqarayku saqirpayarqanku, chaykunaqa pachaj kutitaraq chaymanta niqtimpas jap'iqanqaku, jinallataq wiñay kawsaytapas jap'iqallanqakutaqmi.

³⁰ Chaywampas achkhayuq kunan p'unchaykuna kurajkaq kachkanku chaykunaqa achkhayuqmi qhipapi kapunqaku; jinallataq pikunachus kunan p'unchaypi achkhayuq qhipapi kachkanku chaykunaqa kurajkaq kapullanqakutaq –nispa.