MATEO 18 - Dios Tatanchispaq Musuq Rimayninkuna

Kurajkaq kanamanta

¹ Yachaqaq qatiqninkunaqa Jesusman qayllachakuspa ajinata tapurirqanku: –¿Janaqpacha qhapaq suyupiqa, pitaq kurajkaq kanqari? –Nispa.

² Jesustaq uj qhari wawata paykuna chawpiman churarqan,

³ jinaspataq ajinata nirqan: –Sut'inta niykichis, qankunachus mana kay wawamanjina tukuchkankichis chhikaqa, manam janaqpacha qhapaq suyuman waykuchkankichischu.

⁴ Pikunachus kay wawamanjina tukun jinataq llamp'u sunquyuqqa, chaykunam janaqpacha qhapaq suyupi kurajkaqmanta riqsisqaqa.

⁵ Jinallataq pichus kay wawatajina nuqapaq sutiypi jap'iqan chhikaqa, nuqatam jap'iqawan.

Juchaman urmachiqkunamanta

⁶ “Mayqinchus kay uj juch'uy nuqaman iyaw niq wawaykunata juchaman urmachinman chaymanqa, allinraqmi kanman uj athun piqana marana rumiwan kunkanmanta wataykuspa mama quchaman chhuqaykunankuqa.

⁷ ¡Ancha mana allinmi kaypacha runakunapaq juchaman urmachiykuna kasqanqa! Chayqa kanampunim, chaywampas ¡Imalla kachkanqa pi runachus wakinkunaman juchaman urmachichkan chaykaqpaqqa!”

⁸ “Chayrayku, makiykichus manachayqa chakiykichus juchaman urmaykuchisunki chhikaqa, khuchuqakuy jinaspa qanmanta karuniqman chhuqay; allinraqmi kanman muthu makiyuq jinataq muthu chakiyuq kawsayman waykunaykiqa, iskaynin makiyuq jinataq iskaynin chakiyuq wiñaypaq lawrachkaq ninaman chhuqaykusqa kanaykimanta niqtimpasqa.

⁹ Ñawiykichus juchaman urmaykuchisunki chhikaqa, jurqurakuy jinaspa qanmanta karuniqman chhuqay; allinraqmi kanman ch'ulla ñawiyuq kawsayman waykunaykiqa, iskay ñawiyuq wiñaypaq lawrachkaq ninaman chhuqaykusqa kanaykimanta niqtimpasqa.”

K'ita uwijamanta rijch'anachiy

¹⁰ “Kay juch'uykunamanta mayqintapas ama juch'uychaychischu. Imaraykuchus nuqa niykichis, janaqpachapiqa paykunapaq angelninkunaqa Tataypaq ñawpaqimpipunim kachkanku,

¹¹ imaraykuchus Nuqa runapaq Churinqa, chinkasqa kaqkunata qhispichiqmi jamuni.”

¹² “¿Kaymanta imatataq niwaqchisri? Uj runachus pachaj uwijayuq kanman jinaspa ujkaq chinkawachapunman chhikaqa, ¿isqun chunka isqunniyuq uwijakunata urquniqpi saqirpayaspa manachu chay k'ita uwijata maskaq purichkanmanri?

¹³ Chinkasqa uwijata taripaspataq, chay runaqa anchatam kusikunqa, wakin isqun chunka isqunniyuq mana chinkasqa uwijakunamanta niqtimpas.

¹⁴ Ajinallataqmi, janaqpachapi kachkan chay Tataykichisqa kay juch'uykunapaq chinkanankuta mana munanchu.”

Imaynatataq wawqimasita pampachana kanman

¹⁵ “Wawqiykichu uj mana allinta ruwasunki chhikaqa, paywan sapallampi rimanariy, jinaspa mana allin ruwasqanta riqsichimuy. Uyart'asunki chhikaqa, wawqiykiwan sumaqpim kawsakupunki.

¹⁶ Mana uyart'asunki chhikataq, ujta, iskay manachayqa ujtawampas wajay, jinaspa paywan rimaq puriy, ima rimasqaykitapas iskayniyuq manachayqa kimsayuqpas uyarinankupaq ajinamanta paykunapas yachanallankupaqtaq.

¹⁷ Paykunamampas mana uyart'anqa chhikaqa, Iglesiaman willay; chaywampas mana uyart'akupuqtinqa, mana Diosman iyaw niq runapas manachayqa Roma llaqtapaq qulqi apthapiq runapas kachkanman ajinata rikupunki.”

¹⁸ Sut'inta niykichis, imatachus kaypachapi wataykunkichis chayqa, janaqpachapiqa watasqallataqmi kanqa, jinallataq imatachus kaypachapi paskarankichis chayqa, janaqpachapi paskarasqallataqmi kanqa.

¹⁹ “Kayta niykichis: Qankunamanta iskayniyuqchu kaypachapi Diosman imatapas mañanapaq rimanarikuspa mañankichis chhikaqa, janaqpachapi kachkaq Tatayqa qusunkichismi.

²⁰ May chhikapichus iskayniyuq manachayqa kimsayuqpas sutiypi tantakunku, chay chawpipim nuqa kachkani.”

²¹ Chhikataq Pedroqa purispa ajinata Jesusman tapurirqan: –Apu Tata, wawqiychus ima mana allinta ruwawanqa chhikaqa, ¿jayk'a kutitaq pampachanayri? ¿Qanchis kutikamachu? –Nispa.

²² Jesustaq ajinata jaynirqan: –Manam qanchis kuti pampachanaykita mañachkaykichu, manachayqa qanchischunka kuti qanchistam pampachanayki, nispam niyki –nispa.

Mana pampachay munaq jaywaq runamanta rijch'anachiy

²³ “Chayrayku, uj qhapaq suyu apaykachaq, jaywaqninkunawan kaqninkunata yupthapiyta munanman ajinamanmi janaqpacha qhapaq suyuwanqa ruwakun.

²⁴ Chayta ruwachkaqtintaq, uj achkha waranqa waranqa manuyuq jaywaqnin runata payman puskatarqanku.

²⁵ Chay jaywaqnin runapaq mana imawampas manun junt'anapaq kachkaqtin, qhapaq suyu apaykachaqqa tukuy imanta, payta, warminta, jinataq wawankunatawan ima ranqarqumunankupaq kamachirqan, ajinamanta manun junt'asqa kapunampaq.

²⁶ Chay runataq qhapaq suyu apaykachaqpaq ñawpaqimpi killpiykukuspa ajinata mañarikurqan: ‘Tata suyariway, chhikamantam tukuyninta junt'apusqayki,’ nispa.

²⁷ Qhapaq suyu apaykachaqnintaq paymanta khuyapayarikurqanmi; ajinaqa manunkunamanta pampachaspa puripunampaq kacharipurqan.”

²⁸ “Chaymanta lluqsimpuspataq, chay jaywaq runaqa, uj paypaq jaywaq masinwan tinkurqan, pichus uj as chhika qulqi manun karqan. Paytataq kunkanmanta jap'iykuspa sipirquyta qallarirqan: ‘¡Kunan pacha manuykita junt'apuway!’ –Nispa.

²⁹ Jaywaq masintaq paypaq ñawpaqimpi killpiykukuspa ajinata mañarikurqan: ‘Suyariway chhikamantaqa tukuynintam junt'apusqayki,’ nispa.

³⁰ Paytaq manam uyariyta munarqanchu, manachayqa tukuy manun junt'anankamaqa uj wisq'ana wasiman wisq'aykuchirqan.

³¹ Kay ruwasqantaq wakin jaywaq masinkunapaq sunqunkuta anchatapunim nanarichirqan, chayraykum paykunaqa chay ruwasqanmanta qhapaq suyu apaykachaqman willaq purirqanku.

³² Chhikataq qhapaq suyu apaykachaqqa payta wajachispa, ajinata nirqan: ‘¡Saqra runa! Tukuy manuykitam mañarikusqaykirayku pampachayki.

³³ Qantaq, imaynatachus nuqa qanmanta khuyapayarikuni, ajinallatataqmi jaywaq masiykimanta khuyapayarikunayki karqan’ –nispa.

³⁴ Chaytukuytapuni phiñarikupuspataq, qhapaq suyu apaykachaqqa tukuy manunta junt'anankama khirjamunankupaq kamachirqan.”

³⁵ –Qankunachus wawqimasiykichista tukuy sunquwan mana pampachankichis chhikaqa, kikillantataqmi janaqpachapi kaq Tatayqa qankunawan ruwanqa.