MATEO 17 - Dios Tatanchispaq Musuq Rimayninkuna

Jesusqa waj rijch'ayniyuq tukun

¹ Suqta p'unchayña kapurqan chhikamantataq, Pedrota, Santiagota jinataq wawqin Juantawan Jesusqa sapallankuta pusqarukuspa, uj athun urquniqman puripurqanku.

² Chaypitaq paykunapaq ñawpaqimpi kapuspa, Jesusqa waj rijch'ayniyuq tukupurqan. Uyanqa intijina k'ancharirqan, jinataq p'achampas uj yuraq k'anchaymanjina tukupurqan.

³ Chaypitaq Moisesta jinataq Eliastawan Jesuswan rimachkaqta rikurqanku.

⁴ Pedroqa Jesusman ajinata nirqan: –Tata Jesús, ¡Ima allinchä kaypi kayku! Munanki chhikaqa kimsa ch'ujllakunata, ujta qampaq, wajtaqa Moisespaq, wajtataq Eliaspaq wasichasaqku –nispa.

⁵ Pedro rimachkaqtintaq uj k'anchachkaq phuyu paykunapataman lluqsimurqan, chay chawpimantataq uj rimay ajinata nispa uyarikumurqan: “Kaymi munasqa Wawayqa, mayqintachus ajllikuni: payman uyariychis –nispa.”

⁶ Chayta uyarispataq yachaqaq qatiqninkunaqa, uyanku jallp'a pampaman chayanankama ancha mulljasqa killpiykukurqanku.

⁷ Jesustaq qayllachakuspa paykunaman llankharispa ajinata nirqan: –Sayariychis; ama manchaychischu –nispa.

⁸ Qhawarirqanku chhikataq, manam pitapas rikupurqankuchu, manachayqa Jesús sapallantam rikurqanku.

⁹ Urquniqmanta uraqamuchkaqtinkutaq, Jesusqa paykunaman ajinata kamachirqan: –Kay rikusqaykichistaqa Nuqa runapaq Churin kawsarimunaykamaqa ama pimampas willankichischu –nispa.

¹⁰ Chhikataq yachaqaq qatiqkunaqa Jesusman ajinata tapurirqanku: –¿Imamantataq Diospaq kamachiyninmanta yachachiq runakunaqa, Eliasqa Mesiasmanta niqtimpas ñawpaqtam jamunqa nispa rimankuri? –Nispa.

¹¹ Jesustaq ajinata jaynirqan: –Eliaspaq ñawpaqta jamunanqa chiqampunim, jinaspataq paymi tukuy imantinta allich'anqa.

¹² Chaywampas nuqa niykichis, Eliasqa ñawpaqtañam jamurqan, paykunataq manam riqsirqankuchu, manachayqa imachus munasqankuta payman yanjarqanku. Kikillantataqmi Nuqa runapaq Churinqa paykunapaq makimpi ñak'arisaq.

¹³ Chaypachataq yachaqaq qatiqkunaqa, Jesusqa Bawtisaq Juanmanta rimachkasqanta riparakurqanku.

Jesusqa uj millay saqra supayniyuq waynata alliyachin

¹⁴ Jayk'aqchus Jesusqa runakuna kachkarqanku chay chhikaman chayapurqan chhikataq, uj runa Jesusman qayllachakurqan, pay ñawpaqimpi killpiykukuspataq ajinata nirqan:

¹⁵ –Apu Tata, churiymanta khuyapayarikuy, imaraykuchus t'uku unquy payman purqatan, jinaspataq manchanatam ñak'arin; may chhikakunaqa unuman jinataq ninaman imam urmaykun.

¹⁶ Yachaqaq qatiqniykikunaman puskatani, chaywampas paykunaqa manam alliyachiyta atichkankuchu.

¹⁷ Jesustaq ajinata jaynirqan: –¡Ima mana iyawniyuq saqra runakunataq kaykunari! ¿Jayk'aqkamataq qankunawan kaypi kasaqri? ¿Jayk'aqkamataq qankunata tiyqasisqaykichisri? Chay waynata kayman apamuychis –nispa.

¹⁸ Chhikamantataq Jesusqa chay millay saqra supayman k'amiykuspa waynamanta jurqupurqan, chhikamantapacham waynaqa alliyasqa kapurqan.

¹⁹ Chhikamantataq yachaqaq qatiqninkunaqa Jesuswan waj chhikapi rimaspa ajinata tapurirqanku: –¿Nuqaykuqa, imamantataq chay millay saqra supayta mana chhuqarquyta atiykuri? –Nispa.

^20-21 Jesustaq paykunaman ajinata nirqan: –Imaraykuchus qankunaqa ancha pisi iyawniyuq kankichis. Sut'inta niykichis qankunachus uj mustasa muju chhikan iyawniyuq kawaqchis chhikaqa, kay urquman: ‘Chay chhikamanta kuyuriy, jinaspa wajniqman puripuy’ nispa niwaqchis chhikaqa, chay urquqa kuyurinmanmi. Imapas mana atinaqa manam kachkanmanchu.

Jesusqa ujtawan wañunanmanta willan

²² Galilea suyuniqpi qutupacha puriykachachkaspataq, Jesusqa paykunaman ajinata nirqan: –Nuqa runapaq Churinqa, runakunapaq makinman jap'ichisqam kasaq,

²³ jinaspataq paykunaqa wañuchiwanqaku; chaywampas kimsa p'unchaymantam kawsarimpusaq. Kay willasqanqa paykunaman anchata llakirichirqan.

Diospaq wasimpaq qulqi qunamanta

²⁴ Jayk'aqchus Jesusqa yachaqaq qatiqninkunawan Cafarnaúm llaqtaman chayarqanku chhikaqa, Diospaq wasimpaq qulqi apthapiq runakuna Pedroman rikuq purirqanku, jinaspataq ajinata tapurirqanku: –¿Qampaq yachachiqniykiqa Diospaq wasimpaq qulqita manachu quchkanri? –Nispa.

²⁵ Pedrotaq –Arï, pay qunmi, –nispa jaynirqan. Pedrotaq wasiman waykupurqan chhikamantataq, ñawpaqta Jesusqa ajinata nispa rimapayarqan: –¿Simón, qan imaynatataq yuwankiri? Kaypacha llaqta apaykachaqkunaqa ¿pikunamantaq qulqi apthapinankuta mañankuri? ¿Paypaq apaykachasqankunamanchu manachayqa puriq runakunamanchu qulqita mañanri? –Nispa.

²⁶ Pedrotaq ajinata jaynirqan: Puriq runakunamanmi qulqitaqa mañan –nispa. Jesustaq ajinata nispam yaparirqan: –Ajinaqa, kikin apaykachasqankunaqa manam imatapas qunankuchu kachkan –nispa.

²⁷ Chaywampas, kay qulqi apthapiqkuna ama phiñakunankupaqqa, quchaniqman puriy jinaspataq challwa jap'inaykita chhuqaykumuy. Ñawpaqta kaniykumuq challwapaq aysarqumuy, siminta wisq'aranki, chaypitaq uj qulqitam taripanki. Chay qulqita jap'iy jinaspataq mayqinchus nuqapaq jinataq qampaq qulqi quna junt'ananchispaq kanqa; chaytataq apay jinaspa qulqi qunanchista qumuy –nispa.