MATEO 14 - Dios Tatanchispaq Musuq Rimayninkuna

Bawtisaq Juanpaq wañupusqan

¹ Galilea suyuta Herodes apaykachachkarqan chhika, payqa Jesusmanta rimaqta uyarirqan,

² jinaspataq jaywaqninkunaman ajinata nirqan: “Bawtisaq Juanmi kawsarimpusqa. Chayraykum chay musphay ruwaykuna ruwanapaq atiyniyuq –nispa.”

³ Imaraykuchus Herodesqa Juanta wataykuchispa wisq'aykusqa. Chaytataq Filipo wawqimpaq warmin Herodiasraykum ajinata ruwasqa.

⁴ Imaraykuchus Juanqa Herodesman “manam wawqiykipaq warminwan kanayki allinchu kachkan” nispam nisqa.

⁵ Herodestaq Juanta wañuchiytam munarqan, chaywampas runata mancharqan, imaraykuchus tukuy runakunam Juanqa Diospaq sutimpi willaq kasqanta iyaw nirqanku.

⁶ Chaywampas Herodespaq p'unchayachikuynin raymipiqa, Herodiaspaq ususin tukuy chay raymiman wajasqakunapaq ñawpaqimpi tusuq lluqsirqan, chaytaq anchata Herodespaq sunqunman chayaykurqan,

⁷ chayrayku payqa, imatachus sipasqa mañanman karqan chay qunapaq rimayninta qurqan.

⁸ Chay sipastaq mamampaq simi sat'isqanta uyarispa, Herodesman ajinata nirqan: –Bawtisaq Juanpaq umanta uj chuwapi quway –nispa.

⁹ Chaytaq qhapaq suyu apaykachaq Herodesta llakirichirqan; chaywampas raymiman wajasqakunapaq ñawpaqimpi rimayninta qusqanraykuqa, sipaspaq mañasqanta qunankupaq kamachirqan.

¹⁰ Ajinaqa wisq'ana wasimanta Juanpaq umanta ñak'aqamunankupaq kamachirqan;

¹¹ Chhikamantataq uj chuwapi churqataspa chay sipasman qupurqanku, chaytataq payqa mamanman jaywampurqan.

¹² Juanpaq qatiqninkunataq chayamuspa, ayanta apakupurqanku jinaspataq p'amp'aykumpurqanku; chhikamantataq Jesusman willaq purirqanku.

Jesusqa phichqa waranqa runakunata mikhuchin

¹³ Jesusqa Juanpaq wañupusqanta yachaspaqa, sapallanmi uj yampupataman chimpaspa wajniqman puripurqan. Chaywampas runakunaqa chayta yacharqanku, jinaspataq tukuyniq llaqtakunamanta lluqsimuspa jallp'apataniq ñanta qatimurqanku.

¹⁴ Yampumanta uraqaspataq, Jesusqa achkha runakuna tantakumuqta rikurqan; paykunamantataq anchata khuyapayarikurqan, jinaspataq imaymana unqusqakuna apamusqankuta alliyachirqan.

¹⁵ Ch'isiyt'apuqtintaq, yachaqaq qatiqninkunaqa, payman qayllachakuspa ajinata nirqanku: –Ch'isiñam kapun, kaytaq ch'usaq chhikam. Kay runakunata kacharpayapuy, qaylla ayllukunaman purispa mikhunata rantikumunankupaq –nispa.

¹⁶ Jesustaq paykunaman ajinata jaynirqan: –Manam puripunanku chanichu kachkanku; mikhunataqa qankuna quychis –nispa.

¹⁷ Paykunataq ajinata jaynirqanku: –Phichqa t'ant'awan iskay challwakunallapiwan kapuwanku –nispa.

¹⁸ Jesustaq paykunaman ajinata nirqan: –Kayman apampuwaychis –nispa.

¹⁹ Chhikataq tukuy runakunata jach'u pampapi tiyaramunankupaq kamachirqan. Chhikamantataq chay phichqa t'ant'akunata jinataq iskay challwatawan makinwan jap'irqan, jinaspataq janaqpachata qhawkataspa yuspärayta qurqan ajinamanta t'ant'akunata phatmiraspa yachaqaq qatiqninkunaman qurqan, paykunataq tukuy runakunaman ch'iqirachimurqanku.

²⁰ Tukuyninku sajsaykunankukama mikhurarqanku, puchuq t'ant'akunata apthapispataq chunka iskayniyuq kanastakunata junt'arachirqanku.

²¹ Chaypi mikhuqkunaqa ñaqa phichqa waranqa qhari runakuna karqanku, warmikunata jinataq wawakunata mana yupaspa.

Jesusqa unupatanta puriykachan

²² Chhikamantataq Jesusqa yachaqaq qatiqninkunata yampupatapi purqaruchirqan, qucha chimpaniqman paymanta ñawpaqta purinankupaq, chhikankamataq payqa runakunata kachawachapuchkarqan.

²³ Kachawachapurqan chhikamantataq, Jesusqa uj urquniqman chimparqan chaypi sapallan Diosmanta mañakunapaq. Tutayaykuqtintaq pay sapallan chaypi kachkarqan,

²⁴ yampupaq quchapataniqmanta karutaña puripuchkasqa. Wayraqa anchata paykunaniqman wayrarimuspa unuta qhullchuqichichkarqan.

²⁵ Qhipantin sut'iytatampuqtintaq Jesusqa qucha chawpi unupatanta paykunaniqman puriykuchkarqan.

²⁶ Jayk'aqchus yachaqaq qatiqninkuna unupatanta puriykachachkaqta rikurqanku chhikaqa, anchata mulljakurqanku, jinaspataq manchaywan qaparirqanku: –¡Uj qatiqati jamuchkan! –Nispa.

²⁷ Jesustaq paykunaman ajinata nirqan: –¡Ama mulljakuychischu! ¡Nuqam kani: ama manchaychischu! –Nispa.

²⁸ Chayrayku Pedroqa ajinata jaynirqan: –Tata Jesús, qanchus kanki chhikaqa, qan kachkanki chay chhikaman unupatanta jamunaypaq kamachiway –nispa.

²⁹ Jesustaq –Jamuy –nispa payman nirqan. Pedrotaq yampumanta uraqaspa, Jesusqa may chhikapichus kachkarqan chayniqman unupatanta puriykachayta qallarirqan.

³⁰ Chaywampas Pedroqa wayrapaq ancha kallpawan wayramuchkaqta yuwaspaqa mulljakupurqanmi; unuman urmaykuyta qallarispataq, ajinata qaparirqan: ¡Qhispichiway Tata Jesús! –Nispa.

³¹ Chhikapachataq Jesusqa usqhayta makinmanta jap'ispa nirqan: –¡Ancha pisi iyawniyuq kanki! ¿Imamantataq iskayachikunkiri? –Nispa.

³² Yampuman chimpapusqankumantajina, wayraqa thaniripurqan.

³³ Chhikamantataq yampupi kaqkunaqa Jesuspaq ñawpaqimpi killpiykukuspa ajinata nirqanku: –¡Chiqampuni qan Diospaq Churin kanki! –Nispa.

Jesuspaq Genesaret llaqtapi unqusqakunata alliyachisqan

³⁴ Quchamanta ujniq jallp'aman chayaspataq, Genesaret jallp'aniqman chayapurqanku.

³⁵ Chay chhikapi kawsakuq runakunataq Jesusman usqhayllatam riqsirqupurqanku, jinaspataq chay tukuy chhikakunapi Jesuspaq chaypi kasqanta yachapurqanku. Pay qayllamantaq unqusqakunata apamurqanku,

³⁶ jinaspa mantillun ch'ullpallantapas llankharinankupaq mañarikurqanku; jinaspataq tukuy Jesuspaq p'achan llankhariqkunataq alliyasqam kapurqanku.