MATEO 12 - Dios Tatanchispaq Musuq Rimayninkuna

Yachaqaq qatiqkunaqa, samarana p'unchaypi triguta pallanku

¹ Jesusqa uj samarana p'unchaypi trigu chajra chawpinta purichkarqan. Yachaqaq qatiqninkunataq yariqachikurqanku, jinaspa trigupaq umankunata t'ipiraspa mikhuyta qallarirqanku.

² Fariseokunataq chayta rikuspa Jesusman ajinata nirqanku: –Qhawariy, chay yachaqaq qatiqniykikunata, samarana p'unchaypi mana wakikuq ruwaykunata ruwachkanku –nispa.

³ Paytaq ajinata paykunaman jaynirqan: –¿Manachu jayk'aqpas Davidpaq uj kuti masinkunawan yariqachikuspa ruwachkarqanku chayta ñawirirqankichisri?

⁴ Diospaq wasinman waykuspa payman jaywasqa t'ant'akunata mikhurarqanku, mayqin t'ant'akunachus Davidpaq jinataq masinkunapaq mana mikhunankuchu karqan, manachayqa sacerdotekunapaq churasqalla karqan.

⁵ ¿Manallataqchu ñawirinkichis icha, Moisespaq kamachiynimpi, sacerdotekunapaq samarana p'unchaypi llank'achkaqtinkupas mana jucha kasqantari?

⁶ Chaywampas niykichis, kaypiqa Diospaq wasinmanta niqtimpas astawan chaniyuqraq kachkan.

⁷ Qankunaqa manam kay rimaykunapaq nisqanta yuwaywan jap'iqachkankichischu: ‘Nuqa qankunapaq khuyapayakuq kanaykichistam munani, manam uywa wañuchisqata jaywanawaykichista munachkanichu.’ Qankunachus yuwaywan jap'iqawaqchis karqan chhikaqa, mana juchayuqkunamanqa manam juchanchawaqchischu karqan.

⁸ Ajinaqa, Nuqa runapaq Churinqa samarana p'unchayjawapi atiyniyuqmi kani.

Jesusqa uj ch'aki makiyuq runata samarana p'unchaypi alliyachin

⁹ Jesusqa chaymanta puripuspa, chay chhikapi kaq judiokunapaq tantakunan wasiman waykurqan.

¹⁰ Chay ukhupitaq uj ch'aki makiyuq runa kachkarqan; jinaspa imaymanamanta Jesusman tumpaykunapaq qhawachkaspataq ajinata payman tapurirqanku: –¿Samarana p'unchaypi alliyachinaqa atikunmanchuri? –Nispa.

¹¹ Jesustaq paykunaman ajinata jaynirqan: –¿Qankunamanta mayqintaq, uwijanqa uj unu quwuñaman samarana p'unchaypi urmaykunman chhika mana jurqumuchkanmanri?

¹² Chaywampas ¡Uj runaqa uj uwijamanta niqtimpas astawan chaniyuqraqmi! Chayrayku, samarana p'unchaypiqa allin ruway ruwaytaqa atikunmi –nispa.

¹³ Chhikamantataq chay runaman ajinata nirqan: –Makiykita jaywatatamuy –nispa. Chay runataq makinta jaywatatarqan jinaspataq chay makinqa ujniqkaq makinjina alliyasqa kapurqan.

¹⁴ Chaywampas jayk'aqchus fariseokuna chay ukhumanta lluqsimpurqanku chhikaqa, Jesusta wañuchinapaq rimakipayta qallarirqanku.

Jamuq p'unchaykunamanta willasqakuna junt'akupusqanmanta

¹⁵ Jesustaq, chayta yacharquspa chay chhikamanta wajniqman puripurqan, jinaspataq achkha runakuna payta qatirqanku. Jesustaq tukuy unqusqakunata alliyachirqan,

¹⁶ jinaspataq paykunaman ama paymanta runakunapaq ñawpaqimpi rimanankupaq kamachirqan.

¹⁷ Chaytaq Diospaq sutimpi willaq Isaiaspaq willasqanmanjina junt'akunampaq ajinata ruwakurqan, jayk'aqchus ajinata nirqan:

¹⁸ “¡Qhawariychis pimanchus ajllikuni chaytaqa, pimanchus jaywanawampaq nuqa wajakuni! Paymanqa anchatapunim nuqa munakuni, paytaq nuqaman kusikuywan sunquyta junt'aykuchin. Payjawaman Ajayuyta churasaq, jinaspataq tukuy suyukunaman chiqampi kayta willanqa.

¹⁹ Manam piwampas ch'aqwanqachu, manataq waqach'akunqapaschu; manataq pipas llaqta ñankunapi kunkanta uyarinqakuchu.

²⁰ Pikunachus chhuqrisqa kachkanku chaykunamanqa manañam chhuqrinchapunqañachu, manallataqmi pikunachus wañjachkanku chaykunamampas wañuchichkanqachu. Astawampas pisi kallpakunaman kallpacharinqa, jinaspataq imachus chiqan kay kachkan chaytam athumpi kachinqa.

²¹ Tukuy kaypachapi kaq runakunataq paypi sunqunta churanqaku.”

Jesusta tumpaykunku

²² Uj runakuna Jesús qayllaman uj ñawsa, jup'a jinataq millay saqra supayniyuq runata alliyachinampaq chayachimurqanku, Jesustaq chay runaman alliyachirqan, chay runataq rikuyta atipurqanmi jinataq rimarquytapas atipurqallantaqmi.

²³ Tukuyninku paykunapura musphalla tapunakurqanku: “¿Kayqa Davidpaq churinchu kanmanri? –Nispa.”

²⁴ Kayta uyarispataq fariseokunaqa ajinata nirqanku: “Beelzebú supaykunapaq kurajkaqninmi, kay runaman millay saqra supaykunata wijch'urqunampaq atiyta qun” –nispa.

²⁵ Jesustaq imatachus chay runakunapaq sunqunku ukhupi yuwachkarqanku chayta yachaspataq, ajinata jaynirqan: “Uj suyupi kawsaqkunachus paykunapura t'ipinjakuspa chhiqninjakunkuman chhikaqa, chay suyuqa ch'usaqmanmi tukjakupunman; jinallataq uj llaqtapi manachayqa uj wasipi kawsaq masikunachus paykunapura t'ipinjakunkuman chhikaqa, chay wasiqa manam sumaqta sayarichkanmanchu.

²⁶ Ajinallataqmi, Supaychus pay kikinta chhuqarqukunman chhikaqa, pay kikinmi t'ipinjakuchkan; ajinaqa ¿Imaynatataq atiyninta kachinmanri?

²⁷ Qankunaqa Beelzebupaq atiyninwan millay saqra supaykunata chhuqarqun nispa niwankichis, ajina kaqtinqa, ¿pitaq qankunapaq yachaqaq qatiqniykikunaman supaykunata chhuqarqunankupaq atiyta qunri? Chayraykum paykuna kikinmi qankunapaq pantasqa kasqaykichista sut'inchachkanku.

²⁸ Nuqachus Diospaq Ajayunniqta millay saqra supaykunata chhuqarquni chhikaqa, janaqpacha qhapaq suyu qankunaman chayampusqantam riqsichin.”

²⁹ “¿Imaynatataq pipas uj kallpayuq runapaq wasinta suwarqunapaq waykunman manaraq payta wataykuchkaspari? Wataykuspallam suwarquyta atinman.”

³⁰ “Mana nuqawan sumaqpi kaqqa, nuqawan chhiqninakuqmi; jinataq nuqawan mana pallthapiqqa, t'akawachanmi.”

³¹ “Chayraykum niykichis, Diosqa tukuy runakunapaq juchankunata, jinataq imaymana mana allin rimasqankunatapas pampachanqam, chaywampas Ch'uwa Ajayuta llullaspa rimayninkunawan juch'uyman churaqkunakaqtaqa manam pampachachkanqachu.”

³² Runapaq Churinman mana allin rimaykunawan sutichaqmanqa, chay juchanmanta Diosqa pampachanmanraqmi, chaywampas Ch'uwa Ajayuman mana allin rimaykunawan sutichaqkaqmanqa manam chay juchanmantaqa kaypachapipas, jamuq pachakunapipas, jayk'aqpas pampachachkanqachu.

Urinmanta sach'ata riqsina

³³ “Sach'achus allin chhikaqa, sumaq urikunatam urin; sach'achus mana allin chhikataq, mana allin urikunata urillanqataq; ajinaqa, urinkunamantam sach'ataqa riqsina.”

³⁴ ¡Mach'aqwayapaq mirayninmanta jamuq runakuna! ¿Imaynatataq allin kaqkunata rimawaqchis qankuna kikin mana allin runakuna kachkankichis chhikari? Imachus sunqupi achkha kachkan, chaykunamantam simiqa riman.

³⁵ Sumaq runaqa allinkunallatam riman, imaraykuchus sumaq kaymi paypaq sunqun ukhupiqa kan; saqra runataq mana allinkunallatam riman, imaraykuchus saqra kaymi paypaq sunqun ukhupiqa kan.

³⁶ Nuqataq niykichis, athun juchanchana p'unchaypiqa tukuy qankuna sapa uj mana allin rimaykuna rimasqaykichismantajinam juchanchasqa kankichis.

³⁷ Imaraykuchus kikin rimasqaykimantajinam juchanchasqa kanki, chaymanjinallataqmi mana juchayuqpas, manachayqa juchanchasqapas lluqsinki.

Wakinkunaqa musphay ruwaykuna rikuyta mañanku

³⁸ Wakin fariseokuna jinallataq Diospaq kamachiyninmanta yachachiq runakuna Jesusman ajinata nirqanku: –Yachachiq, uj musphay ruway rikuchinawaykichistam munayku –nispa.

³⁹ Jesustaq paykunaman ajinata jaynirqan: –Kay saqra, qhincha Diospi mana iyawniyuq runakunaqa uj musphay ruway rikuyta mañanku; chaywampas paykunamanqa Diospaq sutimpi willaq Jonaspaq rikuchiyninmanta niqtimpas, wajtawanqa manam uj musphay ruwayqa rikuchikunqachu.

⁴⁰ Imaynatachus Jonasqa kimsa p'unchay jinataq kimsa tutapiwanmi athun challwapaq wijsampi kachkarqan, ajinallatataqmi Nuqa runapaq Churinqa kimsa p'unchay jinataq kimsa tutapiwan kaypacha jallp'a ukhupi kasaq.

⁴¹ Nínive llaqtapi kaq runakunaqa athun juchanchana p'unchaypi jatarimunqaku, jayk'aqchus kaypacha runakunata juchanchakunqa chaypacha, jinaspa juchanchasqa kanaykichispaq rimarqumunqaku; imaraykuchus Nínive llaqtapi kaqkunaqa Jonaspaq willasqanta uyarikuspa Diosman kutirimurqanku, chaywampas kaypi kachkan chayqa Jonasmanta niqtimpas astawan kurajkaqmi.

⁴² Kikillantaq, jayk'aqchus kaypacha runakunaman juchanchakuchkanqa chay athun juchanchana p'unchaypiqa, urayniq suyupi kaq qhapaq suyu apaykachaq warmi sayarikumunqa, jinaspataq payqa juchanchallanqataqmi. Imaraykuchus ancha karu jallp'aniqmantapacham Salomonpaq yachayninkunata uyarinapaq chayaykumurqan, chaywampas pichus kaypi kachkan chayqa Salomonmanta niqtimpas astawan kurajkaqmi.

Millay saqra supay kutiykumuqmanta

⁴³ “Jayk'aqchus uj millay saqra supay uj runamanta lluqsin, jinaspa ch'aki jallp'aniqkunapi samarayta maskaspa puriykachamun; jinaspa mana tarispataq, ajinata yuwarikun:

⁴⁴ ‘May wasimantachus lluqsimurqani chayman kutiripusaq’ –nispa. Kutirispataq uj ch'usaq, pichthapisqa sumaq allichthapisqa wasipas kachkanman ajinatam chay runata taripan.

⁴⁵ Chhikamantataq paymanta niqtimpas astawan millay saqra waj qanchis supaykunataraq tanthapimun, jinaspataq tukuyninkum chay runa ukhuman kawsanapaq sat'iykukunku, chay runataq qallariypi kachkarqan chaymanta niqtimpas astawanraq tukupun. Chay kikillantaqmi kay saqra runakunawan ruwakunqa” –nispa.

Jesuspaq maman, wawqinkunapiwan

⁴⁶ Jesusqa runakunawan rimachkarqanraq, ajinaman maman wawqinkunapiwan paywan rimanapaq chayamurqanku. Jawaniqpi qhiparaspataq,

⁴⁷ ujkaq Jesusman ajinata nispa willamurqan: –Mamaykiwan wawqiykikunapiwan jawaniqpi kachkanku, jinaspataq qanwan rimaytam munanku –nispa.

⁴⁸ Jesustaq chay willaqman ajinata jaynirqan: –¿Pitaq mamay, jinataq pikunataq wawqiykunari? –Nispa.

⁴⁹ Chhikataq yachaqaq qatiqninkunaman rikuchispa ajinata nirqan: –Kaykunam mamaypas jinataq wawqiykunapas kanku.

⁵⁰ Pikunachus janaqpachapi kaq Tataypaq munayninta ruwanku chaykunam wawqiy, panay, jinataq mamaypas kanku –nispa.