MATEO 10 - Dios Tatanchispaq Musuq Rimayninkuna

Jesusqa chunka iskayniyuq kachasqankunata ajllin

¹ Jesusqa chunka iskayniyuq yachaqaq qatiqninkunata wajarqan, jinaspataq paykunaman millay saqra supaykunata chhuqarqunankupaq jinataq imaymana unquykunata, nanaykunatawan alliyachinankupaq atiyta qurqan.

² Kaykunam chunka iskayniyuq kachasqankunapaq sutinkunaqa: Ñawpaqkaqqa Simón, pichus Pedro nisqa karqallantaq, jinataq wawqin Andrés; Zebedeopaq churinkuna Santiago jinataq wawqin Juanpiwan;

³ Felipe jinataq Bartolomé; Tomás, Roma llaqtapaq qulqi apthapiq Mateopiwan; Alfeopaq Churin Santiago, jinataq Tadeo ima.

⁴ Cananeo Simonpiwan, jinallataq Judas Iscariote, pichus chhikamantaqa Jesusta ranqaykupurqan chay ima.

Jesusqa sumaqta umancharispa chunka iskayniyuq kachasqankunata kachan

⁵ Jesusqa chay chunka iskayniyuqkunaman ajinata umancharispa kacharqan: “Mana judío runakuna kachkanku chay chhikaniqkunaman ama puriychischu, manallataq Samaria suyuniq llaqtakunamampas waykuychischu;

⁶ Manachayqa Israel suyupi chinkasqa uwijakunaman puriychis.

⁷ Janaqpacha qhapaq suyu qayllachakumpusqanta willaq puriychis.

⁸ Unqusqakunata alliyachimuychis, wañusqakunatapas kawsarichimuychis, lliqi unquyniyuqkunata picharamuychis, jinallataq millay saqra supaykunatapas chhuqarqumullaychistaq. Qankunaqa kay atiykunata qasillam jap'iqankichis, chayrayku ama chay ruwasqakunamantaqa imatapas mañankichischu.”

⁹ “Quritapas, qulqitapas ama apaychischu.

¹⁰ Ñampi mikhunaykichispaqpas manallataq imatapas apakuychischu. Waj p'achatapas, waj usut'atapas, jinataq tanwatapas amallataq apaychischu, imaraykuchus llank'aqqa llank'asqanmanta mikhunampaq qusqam kanan.”

¹¹ “Uj llaqtaman waykunkichis chhikaqa uj sumaq qayllaykurikunajina runata maskaychis, jinaspataq chaymanta puripunaykichiskama wasimpi qhiparaychis.

¹² Chay wasiman waykunkichis chhikataq, sumaq kaywan napaykuriychis.

¹³ Chay wasipi kaqkunachus sumaq runa kanku chhikaqa, napaykusqaykichismanjina sumaqpi kayqa paykunawanmi qhiparapunqa, manachu ajina kachkanqa chhikataq, sumaqpi kaypaq napaykurisqaykichisqa qankunamanmi kutirimpunqa.

¹⁴ Mayqin wasipichus, manachayqa llaqtapichus qankunata mana jap'iqayta jinataq uyariytapas munasunkichis chhikaqa, chakiykichispi jallp'a chimpasqantapas thalarakuspa lluqsimpuychis.

¹⁵ Sut'inta niykichis, athun juchanchana p'unchaypiqa Sodoma jinataq Gomorra llaqtakunapi kawsaq runakunamanta niqtimpas astawanraqmi chay llaqtapaq asut'iyninqa kanqa.”

Jamuq p'unchaykunapi qatiykachachikunamanta

¹⁶ “¡Rikuychis!” Nuqaqa, qankunaman uwijakunatajinam atuqkuna chawpiman kachachkaykichis. Chayraykum niykichis, pallikunajina ch'iki kaychis jinallataq urpikunajina sumaq llamp'u sunquyuq kallaychistaq.

¹⁷ Qankunapura rikunakuychis, imaraykuchus llaqtajawapi atiyniyuqkunaman jap'iykuchisunkichis, jinaspataq judiokunapaq tantakunan wasikunapi maqachisunkichis

¹⁸ jinallataq llaqta purichiqkunaman, jinataq qhapaq suyu apaykachaqkunaman nuqarayku puskatasunkichis; ajinamanta qankunaqa paykunapaq jinataq Diospi mana iyawniyuq runakunapaq ñawpaqimpi nuqamanta rimayta atinaykichispaq.

¹⁹ Llaqtajawapi atiyniyuqkunaman puskatasunkichis chhikaqa, ama llakikuychischu imaynatataq, manachayqa imatataq ninkichis chaymantaqa, imaraykuchus rimanaykichis kachkanqa chhikaqa, Diosmi yachayta umaykichisman churasunkichis paykunaman kutichinaykichispaqqa.

²⁰ Imaraykuchus chaypiqa, manam qankunachu rimachkankichis, manachayqa Tataykichispaq Ajayunmi qankunamanta rimakuchkanqa.

²¹ “Wawqintimpura wañuchinakunapaq puskatanakunqaku, tatankutaq churinkunata; churinkunataq tatankunata mana allinman churanapaq kutkataspa wañuchinqaku.

²² Nuqaraykutaq tukuy kaypacha runakunawan chhiqnisqa kankichis; chaywampas pichus tukuchaykama nuqawan kuska sayarichkanqa, chaymi qhispisqa kanqa.

²³ Uj llaqtapichus qatiykachasunkichis chhikaqa waj llaqtaman phawaripuychis; imaraykuchus sut'inta niykichis, manaraq tukuy Israel suyupi kaq llaqtakunata chayayta tukuchachkankichis chhikaqa, runapaq Churin jamunqaña.”

²⁴ “Mayqin yachaqaq qatiqpas manam yachachiqninmanta astawan kurajkaq kanmanchu, jinataq mayqin jaywaqpas manallataqmi wasiyuqninmanta kurajkaq kachkanmanchu.

²⁵ Uj yachaqaq qatiqqa jayk'aqchus yachachiqninjina kapun chhikaqa sunquchakupunanmi, jinallataq jaywaqpas wasiyuqninjina kapuspaqa sunquchakupunallantaqmi.”

Ama manchachikuspa rimana

²⁶ “Ama pi runamampas manchaychischu. Imaraykuchus manam ima pakasqapas mana yacharqunaqa kachkanmanchu, manallataq ima pakapi kachkan chaypas mana sut'inchakuq kachkanmanchu.

²⁷ Imakunatachus ch'amakapi nuqa nichkaykichis chaytaqa, qankunaqa sut'i p'unchaypi willamuychis; jinallataq sapaykichispi nichkaykichis chaytapas wasipatakunamantapacha waqach'amuychis.

²⁸ Ama aychaykichis wañuchiqta manchaychischu, imaraykuchus almaykichiskaqtaqa manam wañuchiyta atichkanqakuchu; astawampas pichus aychata jinataq almatawan wiñaypaq nina ukhupi ñak'arichispa wañuchichkanman chay Dioskaqta manchariychis.”

²⁹ “¿Iskay pisqukunaqa, manachu uj chhikan pisi chaniyuq qulqillaman ranqakuchkanri? Chaywampas Tatapaq mana munasqanmantaqa, manam paykunamanta maykaqpas jallp'aman jalaqamunkumanchu.

³⁰ Chaywampas qankuna kikinkaqwanqa, umaykichispi kaq chujchaykichistapas ujmanta uj sumaq yupasqatam payqa kachin.

³¹ Ajinaqa ama manchaychischu: Qankunaqa achkha pisqukunamanta niqtimpas astawan chaniyuqraqmi kankichis.”

Runakunapaq ñawpaqimpi Jesusmanta willana

³² “Pichus runakunapaq ñawpaqimpi nuqamanta sayarispa riqsiq tukuwanqa chhikaqa, janaqpachapi kaq Tataypaq ñawpaqimpi nuqaqa paymanta sayarispa riqsiq tukullasaqtaqmi;

³³ Chaywampas pichus runakunapaq ñawpaqimpi nuqaman mana riqsiq tukunqa chaymanqa, janaqpachapi kaq Tataypaq qayllampiqa nuqaqa payman mana riqsiq tukullasaqtaqmi.”

Jesusrayku t'ipit'ipi kanku

³⁴ “Qankunaqa ama nuqapaq kaypachaman sumaqpi kay apamusqayta yuwaychischu; manachayqa ch'aqwayta tupjanakuykunatawan apamuqmi jamuni.

³⁵ Nuqaqa, churita tatantawan ch'aqwanachiq jamuni, ususintataq mamantawan, yuqch'antataq taykch'intawan ch'aqwanachiq jamuni.

³⁶ Ajinaqa sapa ujpaq chhiqnikuqninqa kikin wasimasinmi kanqa.”

³⁷ “Pichus tatanta mamantapas nuqamanta niqtimpas astawan munakun chayqa, manam nuqapaq kananjinachu kachkan; jinallataq pichus churinta ususintawan nuqamanta niqtimpas astawan munakun chayqa, manallataqmi nuqapaq kananjinachu kachkallantaq;

³⁸ jinallataq pichus chakananta qhiwirikuspa mana qatimuchkawan chayqa, manam nuqapaq kananjinachu kachkan.

³⁹ Pichus kawsaynin qhispichiyta munanqa chayqa, kawsaynintam apt'akunqa, chaywampas pichus kawsayninta nuqarayku jinataq sumaq willaykunarayku apt'akunqa chayqa, kawsayninta qhispichinqa –nispa.

Jap'iqanamanta

⁴⁰ “Pikunachus wasimpi qankunata jap'iqasunkichis chaykunaqa, nuqatam jap'iqawanku; jinataq pichus nuqaman jap'iqachkawan chayqa, kachamuchkawan chaytapas jap'iqallantaqmi.

⁴¹ Pichus Diospaq sutimpi willaqta, Diospaq sutimpi willaq kasqanrayku jap'iqan chayqa, chay willaqman qusqa kanan kachkarqan chay kikillantataqmi jap'iqanqa; jinallataq pichus uj chiqan runata, chiqan runa kasqanrayku jap'iqan chayqa, chay chiqan runapaq jap'iqanan kachkarqan chay kikillantataqmi jap'iqanqa.

⁴² Jinallataq mayqinchus kay uñakunaman nuqaman qatiqniy kasqankurayku uj as chhika ila unullatapas pusillupi jaywarinqa chhikaqa, sut'inta niykichis paykunaqa astawanraqmi kutichisqa kanqaku.