MARCOS 6 - Dios Tatanchispaq Musuq Rimayninkuna

Jesusqa Nazaret llaqtapi

¹ Jesusqa chay chhikamanta suyunman puripurqan, yachaqaq qatiqninkunataq paywan kuska puripurqallankutaq.

² Jayk'aqchus samarana p'unchay chayampurqan chhikataq, Jesusqa judiokunapaq tantakunan wasipi yachachiyta qallarirqan. Jinaspataq achkhayuq payman uyariqkunaqa musphalla paykunapura ajinata nispa tapunakurqanku: –¿Kay runaqa, maypitaq chay tukuy imakunata yachaqamunri? ¿Maymantataq chay tukuy yachaykunata jurqumunri? ¿Ima atiywantaq chay musphay ruwaykunata ruwanri?

³ ¿Manachu kayqa Mariapaq churin, Santiagopaq, Josepaq, Judaspaq jinataq Simonpaq wawqin k'aspi llaqllaq runa kachkanri? ¿Manachu kaypaq panankunaqa kay kikin llaqtapi nuqanchiswan kuska tiyachkankuri? –Nispa. Chaypi kaq runakunataq manam Jesuspi iyaw nirqankuchu.

⁴ Chaywampas Jesusqa ajinata paykunaman nirqan: –Tukuy chhikakunapim uj Diospaq sutimpi willaqta waqaychanku, chaywampas manam kikin jallp'ankaqpi, wawqimasinkuna chawpikaqpi jinataq kikin wasinkaqpiqa –nispa.

⁵ Chaypitaq Jesusqa makinwan unqusqakunaman jaywqataspaqa wakinkunallatam alliyachipurqan, manataq uj musphay ruwaykunatapas ruwayta atirqanchu.

⁶ Paytaq ancha musphasqa kachkarqan, chay runakunapaq paypi mana iyawniyuq kasqankuraykuqa. Jesusqa tukuy qaylla ayllukunapi sumaq willaykunata yachachispam puriykacharqan.

Jesusqa yachaqaq qatiqninkunata Diospaq qhapaq suyunmanta willamunankupaq kachan

⁷ Chhikataq chunka iskayniyuq yachaqaq qatiqninkunata wajarqan, jinaspataq iskaymanta iskay millay saqra supaykunajawapi atiyniyuqta kachayta qallarirqan.

⁸ Paykunamantaq ama imatapas ñampaq apaychischu, manachayqa uj tanwallata apakuychis nispa kamachirqan. Manallataqmi t'ant'atapas, ima kawsaykunatapas, qulqitapas apanankuchu karqan.

⁹ Usut'ankuwan churaykusqallam purinanku karqan, chaywampas manam waj p'achata apakunankuchu karqan.

¹⁰ Paykunamantaq ajinata nirqan: –Jayk'aqchus uj wasiman waykunkichis chhikaqa, chayllapi qhiparankichis chay chhikamanta puripunaykichiskama.

¹¹ May chhikapichus qankunata mana jap'iqayta jinataq uyariytapas munasunkichis chhikaqa, chakiykichispi jallp'a chimpasqantapas, thalarakuychis jinaspataq lluqsimpuychis, kaytaq paykunapaq yachanankupaq uj ninrinchayjina kachun –nispa.

¹² Chhikataq yachaqaq qatiqninkunaqa runakunaman amaña juchata ruwanankupaq, ajinamanta Diosman kutirimpunankupaq willaq lluqsirqanku.

¹³ Jinaspataq achkha millay saqra supaykunata chhuqarqurqanku, jinataq wiswiwan jawispa achkha unqusqakunata alliyachimurqanku.

Bawtisaq Juanpaq wañupusqan

¹⁴ Qhapaq suyu apaykachaq Herodesqa Jesusmanta rimaqta uyarirqan, Jesuspaq tukuyniqpi ancha riqsisqaña kapusqanrayku. Imaraykuchus ujkunaqa ajinata nirqanku: “Bawtisaq Juanmi kawsarimpusqa, chaymantam kay musphay ruwaykuna ruwanapaq atiyniyuqqa,” nispa.

¹⁵ Wakinkunataq: “Diospaq sutimpi willaq Eliasmi,” nispam nirqanku. Wajkunataq: “Ñawpaq Diospaq sutimpi willaq ujkaq runakunajinallataqmi,” nispam nirqallankutaq.

¹⁶ Herodestaq chaykunata uyarispaqa ajinata nirqan: –Kay runaqa Juanmi. Nuqa kikin umanta khuchuqamunankupaq kamachirqani, kunantaq kawsarimpusqam –nispa.

¹⁷ Imaraykuchus Herodiasrayku Herodesqa Juanta jap'irqumunankupaq kamachisqa, jinaspa wataykusqata wisq'aykuchisqa. Herodias warmiqa Filipo wawqimpaq warmin karqan, chaywampas Herodesqa paywan runachakupusqa.

¹⁸ Juantaq Herodesman ajinata nisqa: “Manam wawqiykipaq warmintaqa warmichakunaykichu kachkan” –nispa.

¹⁹ Chay nisqanraykum Herodias warmiqa Juanwan chhiqnikurqan, jinaspataq wañuchinapaqpuni qhawachkarqan; chaywampas manam imaynamanta wañuchiytapas atirqanchu,

²⁰ imaraykuchus Herodesqa allintam Juanta rikurqan, uj chiqampi puriykachakuq runa kasqanta yachasqanrayku, chayraykum Juanta waqaycharqan. Juanpaq rimasqanta uyarispataq musphallam tukuy sunquwan mana imanakuyta atispa uyarqasirqan.

²¹ Uj kutitaq Herodesqa p'unchayachikuynimpi uj athun raymita ruwarqan. Tukuy Galilea suyupi atiyniyuq kurajkaq, jinataq pallapallakuna apaykachaq runakunata chay rayminman wajarqan. Herodias warmitaq chay p'unchay Juan wañuchinapaq allin kasqanta rikurqan.

²² Mikhuchkarqanku chaymantaq Herodias warmipaq ususin chayman waykuspa, tukuypaq ñawpaqimpi may sumaqta tusuykurqan, chay tusuykusqantaq Herodesman jinataq wajasqakunaman sunqunkuman anchata chayaykurqan, chayrayku Herodesqa sipasman ajinata nirqan: –Ima munasqaykitapas nuqaman mañaway, chaytataq qusqaykim –nisqa.

²³ Diospaq sutimpi rimayninta quspataq chay sipasman ima mañasqantapas, apaykachasqan qhapaq suyunmanta kuskampas kachun chayta qunapaq rimarqurqan.

²⁴ Sipastaq raymi wasimanta lluqsispa Herodias maman qayllata tapurikunapaq purirqan: –¿Imatataq mañasaqri? –Nispa. Herodias warmitaq kayjinata jaynirqan: –Bawtisaq Juanpaq umanta mañay. –Nispa.

²⁵ Sipastaq usqhayllata qhapaq suyu apaykachaq Herodes qayllaman siqaykuspa ajinata nirqan: –Kunampacha Bawtisaq Juanpaq umanta uj chuwapi jaywanawaykita munani. –Nispa.

²⁶ Qhapaq suyu apaykachaq Herodestaq ancha llakisqa churakurqan; chaywampas raymiman wajasqakunapaq ñawpaqimpi Diospaq sutimpi rimaynin qusqanraykutaq, manam mañasqanta ama niytaqa atirqanchu.

²⁷ Ajinaqa kikimpachataq, uj pallapallata Juanpaq uman apamunampaq kacharqan. Chay pallapallataq maypichus Juanqa jap'isqa kachkarqan chayman waykuspa paypaq umanta khuchuqampurqan,

²⁸ uj chuwapi churqataspataq sipasman qupurqan, paytaq maman Herodiasman jaywampurqan.

²⁹ Bawtisaq Juanpaq yachaqaq qatiqninkuna, chayta yacharquspaqa, ayanta mañakupuspa aya pakana chhikaman p'amp'aykumpunapaq apakupurqanku.

Jesusqa achkha runakunaman mikhuchin

³⁰ Jesuspaq kachasqankunaqa paywan tantakuspa, imatachus paykunapaq purisqankupi ruwamurqanku jinataq yachachimurqanku chayta payman willarqanku.

³¹ Jesustaq paykunaman ajinata nirqan: –Jamuychis, sapanchis uj sumaq ch'inlla kachkan chay chhikaniqman samararikunapaq purisunchis –nispa. Imaraykuchus achkha runakunam chaypi kachkarqanku, wakin chayamurqanku jinataq ujkunaqa puripuchkarqanku, chayrayku paykunaqa manam mikhurikuytapas atipurqankuchu.

³² Ajinaqa Jesuswan yachaqaq qatiqninkunawanqa uj yampupi waj karuniq sumaq ch'inlla kachkan chay chhikaman samaranapaq puripurqanku.

³³ Chaywampas puripuchkaqtaqa achkhayuqmi rikurqanku chay runakunaqa usqhayllata riqsirqupurqanku; chhikataq tukuyniq llaqtakunamanta, mayniqtachus Jesusqa purichkarqan chayniqman phawakama chakipi purispa paymanta niqtimpas ñawpaqtaraq chayarqanku.

³⁴ Yampumanta uraqaspataq, Jesusqa achkha runakuna tantakumuqta rikurqan jinaspataq anchata paykunamanta khuyapayarikurqan, imaraykuchus paykunaqa mana michiqniyuq uwijakunajinam kachkarqanku, chayrayku paykunamanqa tukuy imaniqmanta yachachiyta qallarirqan.

³⁵ Ch'isiyaykupuqtintaq, yachaqaq qatiqninkunaqa Jesusman qayllachakuspa ajinata nirqanku: –Ch'isiñam kapun, kay chhikataq ch'usaq pampam.

³⁶ Kay runakunata kachawachapuy, ajinamanta qaylla ayllukunaman mikhunata rantikuq purinankupaq –nispa.

³⁷ Chaywampas Jesusqa paykunaman ajinata jaynirqan: –Qankuna mikhuyta quychis –nispa. Paykunataq ajinata jaynirqanku: –¿Imaynatataq chay tukuy runakunapaq t'ant'ata rantimuykumanri? Chaypaqqa iskaypachaq p'unchay llank'asqamanta qulqi jap'iqasqapas chay tukuy runakunaman mikhuchinapaq pisiraqcha kanmanqa –nispa.

³⁸ Jesustaq paykunaman ajinata nirqan: –¿Jayk'a t'ant'ataq qankunapaq kanri? Yachqatamuychis –nispa. Yachqatamuspataq, ajinata payman nirqanku: –Phichqa t'ant'awan jinataq iskay challwakunallawan kapuwanku –nispa.

³⁹ Chhikataq Jesusqa yachaqaq qatiqninkunaman q'umir jach'uniq pampakunapi runakunata tiyarachimunankupaq kamachirqan.

⁴⁰ Paykunataq pachajmanta pachaj, jinataq phichqa chunkamanta phichqa chunkapi tiyarachimurqanku.

⁴¹ Chhikamantataq Jesusqa chay phichqa t'ant'atawan iskay challwatawan jap'ispa, janaqpachaman qhawarispa Diosman yuspärayta qurqan. Chhikamantataq t'ant'akunata phatmiraspa, yachaqaq qatiqninkunaman qurqan paykunapaq runakunaman ch'iqirachimunankupaq. Chay iskay challwakunatapas tukuynin runakunaman ch'iqirachirqallankutaqmi.

⁴² Tukuyninku sajsarankama mikhurarqanku.

⁴³ Juch'uy q'upa t'ant'akunata jinataq challwa puchukunatawan apthapispataq chunka iskayniyuq kanastakunata junt'arachirqanku.

⁴⁴ Chaypi t'ant'ata mikhuchkarqanku chaykunaqa phichqa waranqa qhari runakunam karqanku.

Jesusqa unupatanta puriykachan

⁴⁵ Jesusqa yachaqaq qatiqninkunata yampupatapi purqaruchirqan, qucha chimpaniqman paymanta ñawpaqta Betsaida llaqtaman purinankupaq, chhikankamataq payqa runakunata kachawachapuchkarqan.

⁴⁶ Kacharpayapuspataq, urquniqman Diosmanta mañakuq puripurqan.

⁴⁷ Tutayt'apuchkaqtintaq yampuqa chawpi quchapiña kapusqa. Jesustaq jallp'aniqpi sapallan qhiparapuspataq,

⁴⁸ chaymantapacha imaynatachus yachaqaq qatiqninkunaqa ancha kallpawan yamputa purichichkarqanku chayta rikurqan, imaraykuchus paykunaniqmanqa ancha wayra kallpawan phukumuchkarqan. Qhipantin tutamantataq, Jesusqa paykunaniqman unupatanta ñawpariytapas munachkanman ajinata puriykuchkarqan.

⁴⁹ Jayk'aqchus unupatanta purichkaqta rikurqanku chhikataq, uj qatiqatichari nispa yuwayakuspa anchata mulljakurqanku, jinaspa qaparirqanku;

⁵⁰ imaraykuchus tukuyninku rikurqanku jinaspataq mulljakurqanku. Chaywampas chhikapacha Jesusqa paykunaman ajinata rimapayarqan: –¡Ama mulljakuychischu! ¡Nuqam kani: ama manchaychischu! –Nispa.

⁵¹ Chhikamantataq Jesusqa yampupataman chimpapurqan, wayrataq chhika pacha thaniripurqan, paykunataq ancha musphachkaq qhiparapurqanku.

⁵² Imaraykuchus paykunaqa Jesuspaq t'ant'akunawan musphay ruwasqanmantaqa manaraqmi sumaqta yuwaywan yachaqachkasqakuchu, astawampas rumi sunquraqmi karqanku.

Jesuspaq Genesaret llaqtapi unqusqakunata alliyachisqan

⁵³ Quchamanta ujniq jallp'aman chayaspataq, yamputa quchapataniqman wataykuspa Genesaret llaqtaman chayarqanku.

⁵⁴ Yampupatamanta uraqamuqtinkujinataq, runakunaqa usqhayllata Jesusman riqsirqurqanku.

⁵⁵ Jesuspaq chaypi kasqanta uyarispaqa, tukuyniqman phawaykacharqanku, ajinamanta Pay qayllaman unqusqakunata kallapukunapi wantuspa alliyachinampaq ayskatarqanku.

⁵⁶ May chhikakunamanchus Jesusqa waykurqan chaypi, ayllukunapas kachun, llaqtakunapas manachayqa ch'usaq pampaniqpi kawsakuqkunapas kachunku, unqusqakunata llaqta ñanjawakunapi alliyachinampaq churarqanku, jinaspa mantillun ch'ullpallantapas llankharinankupaq mañarikurqanku; jinaspataq tukuy Jesuspaq p'achan llankhariqkunataq alliyasqam kapurqanku.