MARCOS 5 - Dios Tatanchispaq Musuq Rimayninkuna

Jesusqa, Gerasa jallp'aniqpi kaq millay saqra supayniyuq runata alliyachin

¹ Jesusqa yachaqaq qatiqninkunawan Galilea qucha chimpaniq Gerasa jallp'aniqman chayarqan.

² Jesuspaq yampumanta uraqamuqtinjinataq, uj millay saqra supayniyuq runa payman qayllachakumurqan. Kay runataq aya pakana chawpimanta lluqsimusqa,

³ imaraykuchus chay chhikaqa paypaq tiyakunanmi karqan. Paytaqa manam pipas, watqasiyta atirqankuchu.

⁴ Achkha kutitañam chakinkunamanta jinataq makinkunamanta wiskhakunawan wataykusqaku. Chay watanakunataqa t'ipirpayallaq kasqa, ajinamanta manam pipas payman atipayta atirqankuchu.

⁵ Rumikunawan pay kikin takarqukuspataq, qaparikuspa tuta p'unchay aya pakana chhikakunapi jinataq urquniqkunapi phawaykachaq karqan.

⁶ Chaywampas, jayk'aqchus Jesusta karupachamanta rikurqan chhikataq, phawakama siqamurqan, paypaq ñawpaqimpi killpiykukuspataq

⁷ qaparikuspa ajinata nirqan: –¡Jesús, Kuraj Athunkaq Diospaq Churin, ama nuqawan jap'inakuychu! ¡Diosrayku mañarikuyki ama ñak'arichiwaychu! –Nispa.

⁸ Chayta nirqan imaraykuchus Jesusqa millay saqra supayman ajinata nisqa: “¡Millay saqra supay, kay runamanta lluqsiy!” –Nispa.

⁹ Jesusqa payman ajinata tapurirqan: –¿Imataq sutiykiri? –Nispa. –Paytaq ajinata jaynirqan: –Chakurim sutiyqa, imaraykuchus achkhayuqmi kayku –nispa.

¹⁰ Jesusmantaq chay millay saqra supaykunaqa chay chhikamanta ama wajniq chhikakunaman wijch'uwachanampaq anchata mañarikurqanku.

¹¹ Chay urqu chhikaniqkunapitaq achkha khuchikuna t'inqarachkarqanku,

¹² millay saqra supaykunataq Jesusman ajinata mañarikurqanku: –Chhaqay khuchikunaman waykunaykupaq kachaykuriwaychis –nispa.

¹³ Jesustaq paykunapaq mañakusqankumanjina uyarirqan, millay saqra supaykunataq chay runamanta lluqsispa khuchikunaman waykupurqanku. Kay khuchikunataq ñaqa iskay waranqa karqanku, quchaniqman manchayta phawarispataq qarqa pataniqmanta urmaykumpurqanku, chaypitaq unuwan mikirakuspa wañurapurqanku.

¹⁴ Khuchi michiqkunataq llaqtaniqman phawaripurqanku, llaqtaman chayaspataq runakunaman imatachus rikuchkarqanku chayta willarampurqanku. Runakunataq chayta uyarispaqa imataq ruwasqa kachkarqan chay rikuq jamurqanku.

¹⁵ Jayk'aqchus Jesús qayllaman chayamurqanku chhikataq, chay chakurijina millay saqra supaykunayuq runataqa, sumaq k'uchi p'achallt'asqa jinataq yuwaynimpi kachkaqta Jesús qayllapi tiyaykuchkaqta tariparqanku. Runakunataq chayta rikuspaqa mulljasqa kachkarqanku.

¹⁶ Chay musphay ruwayta rikuqkunataq imaynatachus saqra millay supayniyuq runaqa alliyachisqa kasqa, jinataq khuchikunawan imachus ruwakuchkasqa chayta rikurqanku, chaykunataq waj runakunaman willarampurqanku.

¹⁷ Chhikataq chay runakunaqa Jesusman chayniq suyumanta puripunampaq mañarikurqanku.

¹⁸ Jesusqa yampuman kutipunapaq chimpapuchkarqan chhikataq, millay saqra supayniyuq kachkarqan chay alliyapuq runaqa, paywan kuska purinapaq mañarikurqan.

¹⁹ Chaywampas Jesusqa paypaq ama purinanta munaspaqa, ajinata chay runaman nirqan: –Wasiykiman puripuy, jinaspa wasimasiykikunaman willakumuy, imaynatachus Dios Tataqa qanta khuyapayarikusunki, jinataq qanwan ima athun ruwaykunatachus ruwachkan chayta willarikumuy –nispa.

²⁰ Chay runataq puripuspa tukuy Decápolis llaqtakunaniqpi imaynatachus Jesusqa paywan ruwarqan chayta willarampusqa; chayta uyarispataq tukuy runakuna musphalla qhiparapurqanku.

Jairopaq ususin, jinataq unqusqa warmipiwan

²¹ Jayk'aqchus Jesusqa qucha chimpaniqmanta yampupi kutirimpurqan chhikataq, achkha runakuna tantaykukumurqanku, paytaq quchapataniqpi qhiparapurqan.

²² Chhikataq, judiokunapaq tantakunan wasipi uj kuraj atiyniyuq Jairo sutiyuq runa Jesusta rikuspa chakin qayllaman k'uñuykukuspa killpiykukurqan,

²³ jinaspataq Jesusman ajinata nispa anchatapuni mañarikurqan: –Ususiy wañjapuchkanña, jamuy jinaspa makiykita paypataman churqataripuway ajinamanta alliyaspa kawsapunampaq –nispa.

²⁴ Jesustaq Jairowan purirqan, achkha runakunataq pay muyuriyta liminjakusparaq qatichkarqanku.

²⁵ Chay runa chawpipitaq, uj chunka iskayniyuq wataña yawar apay unquywan unqusqa warmi kachkarqan.

²⁶ Jampiqkunapaq makinkunapitaq anchata ñak'arisqa, tukuy kaqninkunatapas qasipaq tukurqukuspa. Alliyapusaqchari nispaqa, astawanraqmi unquykupurqan.

²⁷ Jayk'aqchus Jesusmanta rimaqta uyarirqan chhikataq, kay warmiqa runa chawpipi qhipaniqmanta jamuchkaspa Jesuspaq mantillunta llankharirqan.

²⁸ Imaraykuchus payqa sunqun ukhupi ajinata yuwarqan: “Mantillunllatapas llankhariyman chhikaqa sumaq k'uchipunim alliyapuyman” –nispa.

²⁹ Chay kikin pachapitaq yawar apay unquyninqa ch'akipurqan, aychampitaq unquyninmanta alliyachisqa kapusqanta qhawatatarikupurqan.

³⁰ Jesustaq atiynin paymanta lluqsisqanta riparakuspataq, runaniqman qhawarispa ajinata tapuykachakurqan: –¿Pitaq p'achayta llankharimuwan? –Nispa.

³¹ Yachaqaq qatiqninkunataq ajinata payman nirqanku: –Chay tukuy runakuna qanta tukuyniqmanta limirquchkasunkichis, qantaq ¿p'achayta pitaq llankharimuwan nispa tapuykachakunaykipaqri?

³² Chaywampas Jesusqa ñätaq ñätaq runaniqman qhawaykachakurqan, chayjinamanta pichus llankharimurqan chayta tariparqunapaq.

³³ Chhikataq chay warmiqa manchaymanta kharkhatikuspa jinataq imachus paywan ruwakuchkasqa chayta yachaspa, Jesuspaq ñawpaqinman purispa killpiykukurqan, jinaspataq imachus chiqan kachkarqan chayta willarqan.

³⁴ Jesustaq payman ajinata nirqan: –Mama, Diospi iyaw nisqaykiraykum alliyasqa kapunki. Tukuy sunqu jampisqa puripuy –nispa.

³⁵ Jesusqa rimachkarqanraq, ajinaman Jairopaq wasimpi kaqkunaqa chayamurqanku, jinaspataq ajinata nirqanku: –¡Ususiykiqa wañupunñam! ¿Imapaqñataq Yachachiqta qhawqasikuchkankiri? –Nispa.

³⁶ Chaywampas Jesusqa paykunapaq nisqanta mana uyarispa, judiokunapaq tantakunan wasipi kaq kurajkaq Jairoman ajinata nirqan: –Ama manchaychu; nuqapi iyaw nillay –nispa.

³⁷ Jinaspa mana pitapas paywan purinanta munaspa, Pedrota, iskaynin wawqintin Santiago, jinataq Juanllatawan pusqarukurqan,

³⁸ Judiokunapaq tantakunan wasipi kurajkaqpaq wasinman chayaspataq, manchanata runakuna piturakuchkaqta, wakinkunataq waqarachkaqta jinataq qaparichkaqkunata rikurqan,

³⁹ Jesusqa wasi ukhuniqman waykuspataq ajinata paykunaman nirqan: –¿Imamantataq chay tukuyta qaparikuspa waqachkankichisri? Kay warmi wawaqa manam wañusqachu kachkan, manachayqa puñukuchkanmi –nispa.

⁴⁰ Chayta uyarispataq runakunaqa Jesusman asipayarqanku. Chaywampas payqa tukuy runakunata jawaniqman qatirquchirqan, chhikamantataq chay wawapaq tatanta, mamantawan jinataq pikunachus paywan kuska purichkarqanku chay kimsa yachaqaq qatiqninkunawan ima, maypichus warmi wawa kachkarqan chay chhikaman waykurqanku.

⁴¹ Wawapaq makinmanta jap'ispataq, Jesusqa ajinata nirqan: –¡Talitá cum! –Nispa. (Chaytaq ajinata niyta munan: “Warmi wawa, qanta niyki jatarikuy.” –Nispa).

⁴² Chhikapachataq, chay chunka iskayniyuq watayuq warmi wawaqa jatarispa puriykachayta qallaripurqan. Runakunataq chayta rikuspaqa musphalla qhiparapurqanku.

⁴³ Chaywampas Jesusqa tukuy runakunaman chay rikusqankunamanta ama pimampas willamunankupaq kamachirqan. Chhikamantataq chay kawsariq warmi wawaman mikhuyta qumunankupaq kamachirqan.