MARCOS 4 - Dios Tatanchispaq Musuq Rimayninkuna

Jesusqa uj tarpuq runamanta rijch'anachiyta qun

¹ Jesusqa ujtawanmi Galilea quchapataniqpi yachachiyta qallarirqan. Ancha achkha runakuna uyarinapaq tantakumuqtinkutaq, Jesusqa quchapi kachkarqan chay yampuman chimpaspa tiyarikurqan, chhikankamataq runakunaqa quchapataniq pampapi qhiparapuchkarqanku.

² Chhikataq payqa imaymanakunamanta rijch'anachiykunawan yachachiyta qallarirqan. Yachachiynimpitaq ajinata nirqan:

³ “Kayta uyariychis: Uj chajra ruwaq runa tarpuq lluqsisqa.

⁴ Tarpuchkaspataq wakin mujuqa ñanjawaman chayarqan, chaytataq pisqukuna chayamuspa pallarqupurqanku.

⁵ Wakinkunataq rumi chawpiman t'akaykukurqan, maypichus mana achkha jallp'a karqanchu, chay mujukunataq usqhayllata ch'ijch'irimurqanku, pisi jallp'ayuq kasqanrayku,

⁶ chay rumi chawpipitaq, mujukunaqa manam sumaqta saphiykupurqankuchu, intitaq lluqsimuspa ruphayninwan ch'akirquchipurqan.

⁷ Wakin mujukunataq khichkha chawpiman jalaykusqaku, chay khichkhakunataq wiñqataspa mikirqupurqanku, ajinamantataq manañam uripurqankuchu.

⁸ Chaywampas wakinkaq mujukunaqa sumaq jallp'aman chayarqanku, chaykunataq wiñarispa ancha sumaqta urirqusqaku; wakin umakunaqa uj mujumanta kimsachunkata urisqaku, ujkunataq suqtachunkata, wakintaq uj mujumanta pachajta ima.”

⁹ Jesustaq ajinata nirqan: “¡Pikunachus ninriyuq kankichis chaykunaqa, uyariychis!” –Nispa.

¿Jesusqa imamantataq rijch'anachiykunawampuni yachachinri?

¹⁰ Jayk'aqchus Jesusqa sapallan qhiparapurqan chhikataq, pikunachus paywan kuska kachkarqanku chay wakin runakunawan jinataq chunka iskayniyuq yachaqaq qatiqninkunawanqa ¿Chay rijch'anachiy imaniytataq munanri? –Nispam Jesusman tapurirqanku.

¹¹ Jesustaq paykunaman ajinata jaynirqan: “Qankunaman Diosqa qhapaq suyunmanta sut'iman churaspam rikuchisunkichis; chaywampas jawaniqpi kachkanku chaykunakaqmanqa, rijch'anachiykunata churaspam yachachini,

¹² imaraykuchus qhawachkaqtinkupas mana rikunankupaq, uyarichkaqtinkupas mana yuwaywan yachaqanankupaq, ajinamanta Diosman ama kutirimunankupaq, jinataq juchankupas paywan mana pampachasqa kanampaq.”

Jesusqa tarpuq runamanta rijch'anachiyta sut'inchan

¹³ Jesustaq paykunaman ajinata nirqan: “¿Qankunaqa, manachu kay rijch'anachiykunata yuwaywan yachaqachkankichisri? Ajina kaqtinqa, ¿imaynatataq tukuy wakin rijch'anachiykunata yuwaywan yachaqankichisri?

¹⁴ Muju tarpuq runaqa, Diospaq sumaq willayninkunata yachachispa purichkan chayman rijch'akun.

¹⁵ Ñanman chayaq mujukunaqa sumaq willaykunata uyarinku jinaspataq supay jamuspa uyarisqankuta qunqachipun chay runakunaman rijch'akun.

¹⁶ Wakinkunataq rumi chawpiman chayaykuq mujuman rijch'akullankutaq; sumaq willaykunata uyarispa kusisqa jap'iqanku,

¹⁷ chaywampas mana sumaq saphiykusqa kasqankuraykuqa manam thuruta sayarikunkuchu, jayk'aqchus sumaq willaykunarayku uj mitk'akuy jamun, manachayqa qatiykachachikuykunapas kan chhikaqa, usqhayllatam urmapunku.

¹⁸ Wakinkunaqa khichkha chawpiman jalaykuq mujukunaman rijch'akuqkunapas kallankutaqmi: sumaq willaykunata uyarinku,

¹⁹ chaywampas kaypacha kawsaykuna anchata paykunaman llakichin, qhapaqkayllatam munakuchkanku, jinataq tukuy imatapas paykunallapaq munanku. Tukuy kay yuwaykunam paykunaman waykuspa sumaq willaykuna jap'iqasqankuta mikirqupun, ajinamantataq manaña uripunkuchu.

²⁰ Chaywampas wakinkunaqa allinta chay sumaq willaykunata uyarispa jap'iqanku, paykunataq sumaqta urinku imaraykuchus sumaq jallp'aman chayaq mujukunaman rijch'akunku. Chaykunamantataq uj mujumanta kimsachunkata, suqtachunkata jinataq uj mujumanta pachajta ima urirqunku.”

Micha k'anchaymanta rijch'anachiy

²¹ Kaytawampas Jesusqa paykunaman nirqallantaqmi: “¿Micha k'anchayta, t'apiwan qhupiykunapaq, manachayqa waracha ukhuman churaykunapaq apamuchuwanchuri?” Manam, micha k'anchaytaqa sut'i chhikaman churanapaq, jinataq chay chhikamanta tukuyman k'anchamunampaqmi apamunchis.

²² Kikillantaq: manam imapas pakasqa mana yacharquna kachkanmanchu, manallataqmi ima pakapi kachkan chaypas mana sut'inchakuq kachkanmanchu.

²³ “Ninriyuq kankichis chhikaqa, uyariychis.”

²⁴ Kaytawampas Jesusqa nirqallantaqmi: “Kay uyarisqaykichista allinta qhawaqarikuychis. Ima tupuwanchus wajkunaman tupuykunkichis, kikin tupullawantaqmi qankunaman Diosqa chaymanta niqtimpas astawanraq tupuykusunkichis.

²⁵ Imaraykuchus kaqniyuqmanqa astawanraqmi qukunqa; mana kaqniyuqmantaq, uj chhika kaqnintapas qichuqakunqaraqmi.”

Wiñaq mujumanta rijch'anachiy

²⁶ Jesusqa kaytawan nirqallantaqmi: “Diospaq qhapaq suyunqa, uj runapaq jallp'aman tarpusqan mujuman rijch'akun:

²⁷ Puñuchkanman, rijch'achkanman chhikapas, tutapas p'unchaypas kachun, kikillanmi mujuqa jallp'amanta ch'ijch'irimuspa lluqsikuchkanqa, jinataq wiñakuchkanqa, tarpuq runapaq mana imayna kasqanta yachaspa.

²⁸ Imaraykuchus jallp'aqa sapallanmi urichin; ñawpaqtaqa yurankuna wiñaramun, chhikamantataq uman t'ikarqumun astawan chhikamantataq urinkuna umampi junt'arapun.

²⁹ Urinkuna puqurapun chhikataq, chajra ruwaq runaqa usqhayllatam ruturqumunapaq purqatapun.”

Mustasa mujumanta rijch'anachiy

³⁰ Jesusqa nirqallantaqmi: “¿Diospaq qhapaq suyunqa imakaqmantaq rijch'akun, manachayqa imawantaq rijch'anachichuwanri?

³¹ Diospaq qhapaq suyunqa, mustasa yurapaq mujunman rijch'akun, tukuy mujukunamantapas astawan juch'uykaqmi,

³² chaywampas tarpuykusqaña kaspaqa, wakin mallkikunamanta niqtimpas astawan athunmi wiñarqupun, ch'ampankunamantaq pisqukunantin llanthurakuq jamunku.”

Jesusqa rijch'anachiykunawan yachachin

³³ Runakunapaq atisqankumanjina yachaqanankupaq Jesusqa kayjina rijch'anachiykunawan sumaq willaykunata yachachirqan.

³⁴ Chaywampas payqa manam imatapas mana rijch'anachiykunawan yachachirqanchu, yachaqaq qatiqninkunamankaqqa sumaqta sapankupi yuwayta quspa sut'incharqan.

Jesusqa wayrata, phiña quchatawan thanichin

³⁵ Chay kikin p'unchay tutayt'apuchkarqan chhikataq, Jesusqa yachaqaq qatiqninkunaman ajinata nirqan: –“Qucha chimpaniqman purisunchis” –nispa.

³⁶ Chhikataq runakunata saqirpayaspa mayqin yampupichus Jesús kachkarqan chay kikimpi chimpaniqman apapurqanku; wakin yampukunapiqa paywan kuska purillarqankutaqmi.

³⁷ Kaymantajinataq uj manchay wayra quchajawaman wayrarimurqan, qucha qhullchuqiywantaq yamputa unuwan junt'aykuchipurqan.

³⁸ Chaywampas, yampu qhipaniq chhikapi Jesusqa uj ch'ijmanata churarikuspa puñurikupusqa. Yachaqaq qatiqninkunataq qaparikuspa rijch'arichirqanku: –¡Yachachiq! ¿Unu ukhuman chinkaykupuchkanchisñam, manachu chaymanta llakiqakuchkankiri? –Nispa.

³⁹ Jesustaq jatarimuspa chay wayrata jinataq quchatawan ajinata nispa runkhaykurqan: –¡Thaniriy! ¡Ama kuyuychu! –Nispa. Wayrataq chhikapacha thaniripurqan, jinaspataq tukuy imapas ch'inlla kapurqan.

⁴⁰ Chhikamantataq Jesusqa yachaqaq qatiqninkunaman ajinata nirqan: –¿Imamantataq kayjinatapuni mulljakunkichisri? ¿Manaraqchu iyawniykichis nuqapi kachkanraqri? –Nispa.

⁴¹ Paykunapurataq anchata mancharikuspa ajinata tapunakurqanku: –¿Wayrapas, quchapas payta uyarinampaq, pitaq kanman kay runari? –Nispa.