MARCOS 3 - Dios Tatanchispaq Musuq Rimayninkuna

Jesusqa ch'aki makiyuq runata samarana p'unchaypi alliyachin

¹ Wajmanta Jesusqa judiokunapaq tantakunan wasiman waykurqan, chaypitaq uj ch'aki makiyuq runa kachkarqan.

² Fariseokunataq payman samarana p'unchaypi alliyachillanqachu manachu icha nispa qhawqasichkarqanku, ajinamanta chay tumpawan juchanchaykunapaq.

³ Chhikataq Jesusqa chay ch'aki makiyuq runaman ajinata nirqan: –Jatariy jinaspa kay chawpiman sayarikuy –nispa.

⁴ Chhikamantataq wakinkunaman ajinata tapurirqan: –¿Samarana p'unchaypi: Ima ruwaykaqtaq allin kanmanri? ¿Allin ruwaychu, manachayqa mana allin ruwaykaqchu icha ruwana kanmanri? ¿Uj kawsayta qhispichinachu, manachayqa chay kawsayta ch'usaqman tukuchinakaqchu allin kanmanri? –Nispa. Chaywampas paykunaqa jup'alla chaypi uyarqasirqanku.

⁵ Chhikataq Jesusqa phiñarikuspa chaypi kaq runakunata qhawkatarqan, chayjina t'uqpi runakuna kasqankuraykuqa sunqumpi llakirikuspa chay unqusqa runaman ajinata nirqan: –Makiykita jaywatatamuy –nispa. Chay runataq makinta jaywatatarqan, jinaspataq makinqa sumaqta alliyapurqan.

⁶ Fariseokuna lluqsimpurqanku chhikamantataq, Herodespaq qatiqninkunawan tantakuspa Jesusman wañuchinapaq pakamanta rimakipanakumurqanku.

Jesusqa quchapataniqpi achkha runakunaman yachachin

⁷ Jesusqa achkha Galileapi kaq runakunawan qatisqa, jinataq yachaqaq qatiqninkunawan ima quchapataniqman puripurqan.

⁸ Jayk'aqchus Jesuspaq sumaq athun ruwayninkunamanta yachqatarqanku chhikataq, tukuyniqmanta payman rikunapaq jamurqanku. Judea suyumanta, Jerusalén llaqtamanta, Idoneamanta, Jordán mayupi inti lluqsimuyniqkunamanta, Tiro jinataq Sidón suyukunamantawan ima jamurqanku.

⁹ Kayrayku chay tukuy runakunawan ama limirquchikunapaqtaq, Jesusqa yachaqaq qatiqninkunaman uj yamputa wakichamunankupaq kunarirqan.

¹⁰ Imaynatachus achkha runakunata alliyachisqanraykuqa, tukuy unqusqakuna pay qayllaman chayaspa alliyanapaq llankhariyllatapas munarqanku.

¹¹ Jayk'aqchus millay saqra supaykuna Jesusta rikurqanku chhikataq, paypaq ñawpaqimpi killpiykukuspa ajinata nispa qaparirqanku: –¡Qan Diospaq churin kanki! –Nispa.

¹² Chaywampas Jesusqa ama paymanta runakunapaq ñawpaqimpi rimanankupaq runkhaykuspa kamachirqan.

Jesusqa chunka iskayniyuq paypaq kachasqakunata ajllin

¹³ Chhikamantataq Jesusqa uj urquniqman chimparqan, jinaspataq rikusqanmanjina pikunatachus pay munarqan chay runakunata wajarqan. Tukuyninku chaypi kachkaqtinkutaq,

¹⁴ chunka iskayniyuq runakunata paywan kuska kanankupaq chay chawpimanta ajllirqan, jinataq sumaq willaykunata yachachiqta kachanapaq. Kay ajllisqa runakunamantaq paypaq Kachasqankuna nispa sutiyarqan.

¹⁵ Paykunamantaq, millay saqra supaykunata chhuqarqunankupaq atiyta qurqan.

¹⁶ Chunka iskayniyuq ajllisqakunaqa, kaykunam: Simón, pimanchus Pedro nispa sutiyan.

¹⁷ Zebedeopaq churinkuna, Santiago jinataq wawqin Juantawan, pikunamanchus Boanerges, sutiwan sutiyarqallantaq, chaytaq “Qhunqhumpaq churinkuna” niyta munan;

¹⁸ Andrés, Felipe, Bartolomé, Mateo, Tomás, Alfeopaq churin Santiago, Tadeo, q'inakuspa suyunta munakuq Simonta jinataq,

¹⁹ Judas Iscariote, pichus chhikamantaqa Jesusta ranqaykurqan chayta ima.

Jesusta tumpaykunku

²⁰ Jesusqa uj wasiman waykupurqan. Ujtawan achkha runakuna tantakumuchkallarqanmi, paywan yachaqaq qatiqninkunawantaq manam uj juch'uy mikhuy malliriytapas atirqankuchu.

²¹ Jayk'aqchus Jesuspaq wasimasinkuna chayta yacharqanku chhikaqa, usqhayllatam wasinman apakupunapaq jamurqanku, imaraykuchus “mana yuwayniyuqmanmi tukupusqa” nispam nirqanku.

²² Jerusalén llaqtamanta chayamuq Diospaq kamachiynin yachachiq runakunaqa ajinallatataqmi nirqanku: “Kikin Beelzebú supaykunapaq kurajkaqninmi, kay runaman millay saqra supaykunata wijch'urqunampaq atiyta qun” –nispa.

²³ Jesustaq paykunata wajaspa kay rijch'anachiyta qurqan: “¿Imaynatataq Supayqa pay kikin Supayta wijch'urqukunmanri?”

²⁴ Uj suyupi kawsaqkunachus, paykunapura maqanjakunman chhikaqa, chay suyuqa ch'usaqmanmi tukupunman;

²⁵ jinataq uj wasipi kawsaq masikunachus paykunapura ch'aqwanqaku chhikaqa, chay wasiqa ch'usaqmanmi tukupullanqataq.

²⁶ Supaychus pay kikinwan ch'aqwanman chhikaqa, ajinallatataqmi qhapaq suyumpas ch'usaqman tukjakupullanmantaq.

²⁷ “Pichus uj kallpayuq runapaq wasinta suwayta munanman chhikaqa, ñawpaqta chay runataqa wataykunanmi kanman, ajinamanta suwarqunapaq.

²⁸ “Sut'inta niykichis; Diosqa tukuy runapaq imaymana saqra mana allin ruwasqankunata, jinataq juchakunatapas pampachallanqam.

²⁹ Chaywampas pichus Ch'uwa Ajayuman mana allin rimaykunawan juch'uyman tukuchichkan chaykaqpaqqa, manam jayk'aqpas chay juchanmanta pampachasqa kayta atikuchkanqachu, manachayqa wiñaypaq wiñaynintimpaq juchanchasqam qhiparapunqa” –nispa.

³⁰ Kayta Jesusqa nirqan, imaraykuchus millay saqra supayniyuqmi nispam paykunaqa payman nirqanku.

Jesuspaq maman, wawqinkunapiwan

³¹ Maman María jinataq Jesuspaq wawqinkunapiwan ima chayamurqanku, chaywampas jawaniqllamanta pay wajaqta kachaykurqanku.

³² Jesús muyuriy tiyaraq runakunataq payman ajinata nirqanku: –Mamayki jinataq wawqiykikuna qanwan rimanapaq jawaniqpi suyachkasunkichis –nispa.

³³ Jesustaq paykunaman ajinata jaynirqan: –¿Pikunataq mamay jinataq wawqiykunapas kasqari? –Nispa.

³⁴ Chhikamantataq pay muyuriy tiyarachkarqanku chaykunata qhawkataspaqa, kaytawan nirqan: –“Kaykunam mamaypas jinataq wawqiykunapas kanku.

³⁵ Imaraykuchus pikunachus Diospaq munayninta ruwanku chaykunam wawqiypas, panaypas jinataq mamaypas kanku,” nispa.