LUCAS 24 - Dios Tatanchispaq Musuq Rimayninkuna

¹ Samarana p'unchaymanta qhipantin p'unchaytaq aya pakana chhikaniqman ancha tutamanta sumaq q'apachkaq jampikuna wakichasqankuna aparisqa warmikunaqa kutirirqanku.

² Chay chhikaman chayaspataq, aya pakana jutk'u lluphasqa kachkarqan chay rumipaq kuyurisqa kapusqanta rikurqanku.

³ Chhikataq aya pakana jutk'uman waykurqanku, chaywampas Tata Jesuspaq ayantaqa manañam chaypi kachkaqta taripapurqankuchu.

⁴ Paykunaqa manam ima yuwaytapas atirqankuchu, kaymantajinataq iskay runakunata lliphipichkaq p'achakunawan p'achallt'asqata paykunawan kuska sayarachkaqta rikurqanku.

⁵ Manchay junt'ataq warmikunaqa pampakama k'uñuykukurqanku; chaywampas chay runakunaqa paykunaman ajinata nirqanku: –¿Qankunaqa, imamantataq kawsachkaq kachkan chayman wañusqakuna chawpipi maskachkankichisri?

⁶ Manam kaypichu kachkan, manachayqa kawsaripunmi. Jayk'aqchus Galileapiraq kachkarqan chhika imatachus nichkarqasunkichis chaymanta yuwatatarikuychis:

⁷ Runapaq Churinqa juchararakunapaq makinman puskatasqam kanan, paykunataq chakanapi chakataykunanku karqan, kimsa p'unchaymantataq kawsarimunan karqan –nispa.

⁸ Chhikataq paykunaqa Jesuspaq rimayninkunamanta yuwatatarikurqanku,

⁹ aya pakana chhikamanta kutirimpuspataq, tukuy kaykunamanta chunka ujniyuq Jesuspaq kachasqankunaman jinataq wakin runakunaman ima willampurqanku.

¹⁰ Kachasqakunaman chay willaykunata willaqkunaqa kaykunam karqanku: María Magdalena, Juana, Santiagopaq maman María, jinataq wakin warmikunapiwan ima.

¹¹ Chaywampas kachasqakunaqa manam iyaw niyta munarqankuchu, imaraykuchus chay warmikunaqa mana yuwayniyuq uma muyusqapas rimachkankuman chaytam yuwarqanku.

¹² Chaywampas, Pedroqa phawakama aya pakana chhikaman purirqan; chay ukhuta qhawaykuspataq, k'iruykusqa kachkarqan chay thanthakunallatam rikupurqan. Chhikataq chay ruwasqakunamanta anchata musphaspa wasinman kutiripurqan.

Emaús llaqtaniqman puriq ñampi

¹³ Chay kikin p'unchaypi, paykunamanta iskayniyuq Jesuspaq qatiqninkuna Emaús aylluniqman purichkarqanku, chaytaq Jerusalén llaqtamanta kuska p'unchay chakipuriypim karqan.

¹⁴ Tukuy imachus ruwakuchkasqa chaykunamanta rimakipaspam puriykuchkarqanku.

¹⁵ Rimaspa jinataq ch'aqwaspa puriykuchkaqtinkutaq, Jesús kikinmi qayllachakurqan jinaspa paykunawan kuska puriykuyta qallarirqan.

¹⁶ Rikuchkarqanku chaywampas, ñawinkuqa mana pipas kasqanta riqsinankupaq lluphasqajinam karqan.

¹⁷ Jesustaq paykunaman ajinata tapurirqan: –¿Ñanta purichkaspa, imamantataq qankuna rimachkankichisri? –Nispa. Paykunataq llakirikuspa sayt'arqanku,

¹⁸ jinaspataq paykunamanta ujkaq Cleofas sutiyuq ajinata jaynirqan: –¿Jerusalén llaqtapi qurpachasqa kachkaqtiykipas, qan sapallaykichu imachus kay p'unchaykunapi ruwakuchkarqan chayta mana yachankiri? –Nispa.

¹⁹ Paytaq paykunaman ajinata tapurirqan: –¿Imataq ruwakurqanri? –Nispa. Paykunaqa ajinata nirqanku: –Nazaret llaqtapi kaq Jesusmanta, payqa ruwasqankunapi jinataq rimasqankunapim, Diospaq jinataq tukuy runakunapaq ñawpaqimpi ancha atiyniyuq Diospaq sutimpi willaq karqan.

²⁰ Chaywampas kurajkaq sacerdotekuna jinataq nuqaykupaq llaqtajawapi atiyniyuqniykunam juchanchaspa jinataq chakataykuspa wañuchisqa kanampaq puskatarqanku.

²¹ Nuqaykuqa, paychari Israel suyuta qhispichinqa nispam suyachkarqayku. Chaywampas tukuy kay ruwakusqakunamantaqa kimsa p'unchayñam uraqapun.

²² Chaywampas nuqaykuwan kaq wakin warmikunam mulljachiwanku, imaraykuchus tutamantam aya pakana chhikaman purirqanku,

²³ ayanta mana taripaspataq, wasiman kutirimpusqaku. Paykunataq uj angelkuna rikhurispa Jesuspaq kawsachkasqanta paykunaman willasqantam willarqawanku.

²⁴ Chhikamantataq, nuqaykumanta wakin wawqimasiykunaqa aya pakana chhikaman purispa, imaynatachus chay warmikuna nichkarqanku kikinta taripamusqaku, chaywampas Jesuskaqtaqa manam rikusqakuchu.

²⁵ Chhikataq Jesusqa paykunaman ajinata nirqan: –¡Qankunaqa imatachus Diospaq sutimpi willaqkuna nichkarqanku chayta yuwaywan jap'iqanapaqqa ancha pisi sunqu, jinataq iyaw ninapaqpas ancha lat'um kankichis!

²⁶ ¿Mesiasqa, manachu manaraq sumaq k'anchaynimpi athunchasqa kachkaspa tukuy kaykunata ñak'arinan kachkarqanri? –Nispa.

²⁷ Chhikamantataq tukuy Qilqasqakunapi imatachus payjawamanta nichkarqan chayta sut'inchapurqan, Moisespaq qilqasqan p'anqakunamanta qallarispa, Diospaq sutimpi willaqkunapaq tukuy p'anqankunata qatirispa.

²⁸ Mayqin ayllumanchus purinanku karqan chayman chayapuqtinkutaq, Jesusqa astawan karuniqmampas purinan kachkanman ajinatam paykunaman yuwachirqan.

²⁹ Paykunataq ajinata nispa qhiparanampaq jark'aykurqanku: –Ch'isiñamarï, ajinapas tutayt'apuchkanñam, nuqaykuwan kuska qhiparapuy –nispa. Jesustaq paykunawan qhiparapunapaq waykupurqan.

³⁰ Mikhuna chhikapi tiyarikupurqanku chhikataq, t'ant'ata makinkunapi jap'irqan, Diosman yuspärayta quspataq, phatmirpayaspa paykunaman jaywarqan.

³¹ Chay kikin pachapim paykunapaq ñawinkunaqa wisq'arasqa kapurqan, jinaspataq Jesusman riqsirqupurqanku; chaywampas payqa chinkawachapurqanmi.

³² Paykunapurataq ajinata ninakurqanku: –Jayk'aqchus payqa nuqanchisman rimapayaspa jinataq Qilqasqakunamanta sut'inchaspa ñampi jamuchkarqanchis chhikaqa ¿Manachu sunqunchis ukhupi uj ninapas lawrarichkanman ajinata riparakurqanchisri? –Nispa.

³³ Astawan mana suyaspa, chhikapacha purqaruspam Jerusalén llaqtaniqman kutipurqanku, maypichus chunka ujniyuq kachasqakunata, masinkunatawan kuska tantasqa kachkaqta tariparqanku.

³⁴ Paykunataq ajinata nirqanku: –Chiqatapunim Tata Jesusqa wañusqamanta kawsarimpusqa, jinaspataq Simonman rikhurisqa –nispa.

³⁵ Chhikataq paykuna iskayniyuq imachus ñampi ruwakuchkasqa jinataq imaynatachus t'ant'a phatmiqtin payta riqsirqusqaku chayta willarqanku.

Jesusqa yachaqaq qatiqkunaman rikhurin

³⁶ Paykunaqa chay ruwasqakunamanta rimachkarqankuraq, ajinamanmi Jesusqa chay chawpiman waykuspa paykunaman ajinata napaykurirqan: –Sunqu tiyaykuy qankunawan kachun –nispa.

³⁷ Paykunataq anchata mulljakurqanku, uj qatiqatitapas rikuchkankuman karqan ajinata yuwaspa.

³⁸ Chaywampas Jesusqa paykunaman ajinata nirqan: –¿Imamantataq mulljasqa kachkankichisri? ¿Imamantataq sunquykichis ukhupi iskayakuy kanri?

³⁹ Makiykunata, chakiykunatawan qhawariychis. Nuqa kikinmi kani. Llankhariwaychis jinaspataq rikuychis: qatiqatiqa manam aychayuqchu, manataq tulluyuqpaschu, nuqataq junt'asqam kachkani –nispa.

⁴⁰ Kayta nispataq makinkunata jinataq chakinkunatawan paykunaman rikuchirqan.

⁴¹ Chaywampas paykunapaq kusikusqankurayku jinataq musphasqankurayku, manaraq iyaw nichkaqtinkutaq, Jesusqa paykunaman ajinata tapurirqan: –¿Manachu ima mikhunaykichispas kaypi kapusunkichis? –Nispa.

⁴² Paykunataq uj juch'uy challwa kankasqata qurqanku,

⁴³ paytaq jap'iqarikuspa paykunapaq ñawpaqimpi mikhurikurqan.

⁴⁴ Chhikamantataq paykunaman ajinata nirqan: –Imachus nuqawan ruwakuchkan chayqa, qankunawanraq kachkarqani chhika willachkarqaykichis chaymi, imaynatachus nuqamanta Moisespaq kamachiyninkunapi, Diospaq sutimpi willaqkunapaq qilqasqankunapi, jinataq Salmokunapi qilqasqa kachkan chay junt'akunanmanta nichkarqaykichis chayllam ruwakurqan –nispa.

⁴⁵ Chhikataq Qilqasqakunata yuwaywan jap'iqachipurqan,

⁴⁶ jinaspataq paykunaman ajinata nirqan: –Mesiaspaq wañunan, jinataq kimsa p'unchaymanta kawsarimunampas qilqasqañam karqan,

⁴⁷ jinataq tukuy suyukuna Diosman kutirimunankupaq sutimpi willasqam kanqa, ajinamanta Dios juchankunata pampachanampaq. Jerusalén llaqtamanta qallarispa,

⁴⁸ qankunaqa kaykunamanta willamunaykichis.

⁴⁹ Nuqataq qankunajawaman imatachus Tatay rimaynimpi qunapaq nichkarqasunkichis chaytam kachamusqaykichis. Chaywampas qankunaqa Jerusalén llaqtallapi qhiparachkaychis, janaqpachamanta jamuchkan chay atiyta jap'iqanaykichiskama.

Jesuspaq janaqpachaman chimpapusqan

⁵⁰ Jesusqa llaqta jawaniq Betania nisqa chhikaniqman paykunata pusapurqan, makinkunata uqharispataq sumaq kayta qurqan.

⁵¹ Sumaq kayta quchkaspataq, paykunamanta waj chhikaniqman jithiripurqan, jinaspataq janaqpachaman uqharisqa kapurqan.

⁵² Paykunataq payman yupaycharqanku, chhikamantataq ancha kusisqa Jerusalén llaqtaman kutimpurqanku.

⁵³ Jinaspam Diosman yupaychaspa wasimpipuni kachkarqanku.