Jn 21 - Dios Tatanchispaq Musuq Rimayninkuna

Jesusqa qanchis yachaqaq qatiqninkunaman rikhurin

¹ Jesusqa wajmanta yachaqaq qatiqninkunaman Tiberias nisqa sutiyuq qucha pataniqpi rikhurirqan. Kaytaq ajinamantam ruwakurqan:

² Simón Pedro, pimanchus Ispa nispa suticharqanku chay Tomás, Natanael pichus Galileaniq Caná llaqtamanta karqan chay, Zabedeopaq churinkuna jinataq waj iskay Jesuspaq yachaqaq qatiqninkuna ima ujllapi tantasqa kachkarqanku.

³ Simón Pedrotaq paykunaman ajinata nirqan: –Challwa jap'iqmi purisaq –nispa. Paykunataq ajinata jaynirqanku: –Nuqaykuqa qanwan kuska purillasaqkutaqmi –nispa. Ajinaqa purirqanku, jinaspataq uj yampuman chimparqanku; chaywampas chay tutaqa manam imatapas jap'ichkasqakuchu.

⁴ Jayk'aqchus p'unchaytatampuchkarqan chhikataq, Jesusqa qucha pataniqpi rikhurirqan, chaywampas yachaqaq qatiqkunaqa manam pay kasqanmanta yachachkarqankuchu.

⁵ Jesustaq paykunaman ajinata tapurirqan: –Wawqimasiykuna, ¿challwaykichis kapusunkichischu? –Nispa. Paykunataq ajinata jaynirqanku: –Manam –nispa.

⁶ Jesustaq paykunaman ajinata nirqan: –Yampumanta pañaniqman challwa jap'ina ch'ipata chhuqaykuychis, jinaspam jap'inkichis –nispa. Paykunataq ajinatam ruwarqanku, chhikamantataq achkha challwakunayuq kasqanraykuqa manam ch'ipa aysarquytapas atirqankuchu.

⁷ Chhikataq, mayqin yachaqaq qatiqtachus Jesusqa anchata munakurqan chaymi Pedroman ajinata nirqan: –¡Tata Jesusmarï! –Nispa. Simón Pedrotaq Tata Jesús kasqanta uyarirquspajinam p'achalliykukurqan, imaraykuchus mana p'achayuqmi kachkasqa, jinaspataq unuman chhuqaykukurqan.

⁸ Wakin yachaqaq qatiqkunataq yampuwan qucha pataniq pampaman challwa junt'a ch'ipa qatatirisqa chayarqanku, imaraykuchus qucha pataniqmanta uj pachaj kapaypijinam kachkarqanku.

⁹ Jallp'aniqman chayapurqanku chhikataq t'ant'atawan lawrachkaq nina patapi uj challwatawan tariparqanku.

¹⁰ Jesustaq paykunaman ajinata nirqan: –Jurqusqaykichis challwakunamanta uj jayk'atawan kayman apamuychis –nispa.

¹¹ Simón Pedrotaq yampuman chimpaspa qucha pataniq pampakamam ch'ipata qatatimurqan, mayqimpichus pachaj phichqa chunka kimsayuq athun challwakuna junt'a karqan. Chay tukuy challwakuna kaqtimpas ch'ipaqa manam llik'ikurqanchu.

¹² Jesustaq paykunaman ajinata nirqan: –Mikhurikuq jamuychis –nispa. Manam maykaq yachaqaq qatiqpas pitaq pay karqan chay tapuriyta atichkarqankuchu, imaraykuchus Tata Jesús kasqanta allintam yacharqanku.

¹³ Chhikamantataq Jesusqa qayllachakurqan, makinkunapi t'ant'ata jap'ispataq paykunaman irqaruchirqan; kikillantataqmi challwakunawampas ruwarqan.

¹⁴ Kaywanqa kimsa kutiñam wañusqamanta kawsarimusqanmantapacha Jesuspaq yachaqaq qatiqninkunaman rikhurisqan karqan.

Jesusqa Simón Pedroman rimapayan

¹⁵ Mikhuyta tukuchapurqanku chhikamantataq Jesusqa Simón Pedroman ajinata tapurirqan: –Juanpaq churin Simón, ¿kaykunamanta niqtimpas astawanchu munakuwankiri? –Nispa. Pedrotaq payman ajinata jaynirqan: –Arï Tata, allintam qan yachanki imaynatachus munakuyki chaytaqa –nispa. Jesustaq payman ajinata nirqan: –Ajinaqa, qatiqniykunata rikuripuway imaraykuchus paykunaqa uwijaykunam kanku –nispa.

¹⁶ Jesusqa wajmanta ajinata tapurillarqantaq: –Juanpaq churin Simón, ¿munakuwankichuri? –Nispa. Pedrotaq payman ajinata jaynirqan: –Arï Tata, allintam qan yachanki imaynatachus munakuyki chaytaqa –nispa. Jesustaq payman ajinata nirqan: –Uwijaykunata michiripuway –nispa.

¹⁷ Kimsa kutitawan ajinata tapurirqan: –Juanpaq churin Simón, ¿munakuwankichuri? –Nispa. Pedrotaq kimsa kutiña munakuwankichu nispa tapurisqanraykuqa llakirikuspa payman ajinata jaynirqan: –Apu Tata, imantintam qan yachanki: allintam qan yachanki imaynatachus munakuyki chaytaqa –nispa. Jesustaq payman ajinata nirqan: –Uwijaykunata michiripuway –nispa.

¹⁸ Sut'inta niyki, jayk'aqchus astawan waynaraq kachkarqanki chhikaqa, p'achalliykukuspa maytachus puriyta munarqanki chaytam puriq karqanki. Chaywampas machuña kapunki chhikaqa, makiykikunata jaywatatanki, jinaspataq wajkunam qanta p'achallichisunki, maymanchus puriyta mana munachkanki chayllamantaq pusasunkichis –nispa.

¹⁹ Kayta nispataq, Jesusqa imaynamantachus Pedroqa wañuyninwan Diosman athunchanan karqan chayta yuwayachinapaqmi ajinata nichkarqan. Chhikamantataq payman ajinata nirqan: –¡Qatimuway! –Nispa.

Jesuspaq ancha munakusqan yachaqaq qatiqnin

²⁰ Pimanchus Jesusqa anchata munakuchkarqan chay yachaqaq qatiqqa, Jesusman jinataq Pedroman qhipaniqllamanta qatichkarqan. Kay yachaqaq qatiqmi jayk'aqchus ch'isi mikhuyta mikhuchkarqanku chhika mikhuna chhikapi Jesuswan kuska tiyachkarqan chayqa. “Apu Tata, ¿pikaqtaq ranqaykusunkiri?” nispa tapurichkarqan chay kikinqa.

²¹ Jayk'aqchus Pedroqa chay yachaqaq qatiqta rikurqan chhikaqa, Jesusman ajinatam tapurirqan: –Apu Tata, kaykaqqa, ¿imaynapitaq kapunqari? –Nispa.

²² Jesustaq payman ajinata jaynirqan: –Nuqachus kutimunaykama paypaq kawsananta munani chhikaqa, ¿imamanta qampaq llakikunaykitaq chayri? Qan nuqaman qatimuway –nispa.

²³ Chayraykum Jesusman qatiqkuna chawpipiqa, chay yachaqaq qatiqpaq mana jayk'aqpas wañunanmanta rimay uyarikurqan. Chaywampas Jesusqa manam jayk'aqpas manam wañunqachu nispa nichkarqanchu. Paypaq nisqanqa kaymi karqan: “Nuqachus kutimunaykama paypaq kawsananta munani chhikaqa, ¿imamanta qampaq llakikunaykitaq kanri?” –Nispa.

²⁴ Kay kikin yachaqaq qatiqmi pichus ruwakusqankunamanta willachkan jinataq qilqamuchkan chayqa. Jinallataq nuqanchispas chiqan nisqanmantaqa allintam yachanchis.

²⁵ Jesusqa astawan waj ruwaykunataraqmi ruwarqan. Chay tukuy kasqanraykutaq, ujmanta uj qilqakunman chhikaqa, rikusqaymanjina manachujinam tukuy kaypachapi qilqasqakuna qilqasqa kanman chaypipas waykunkumanchu.