EFESIOS 6 - Dios Tatanchispaq Musuq Rimayninkuna

¹ Wawakuna, imaynatachus Tata Jesucristopaq munachkan ajinata tatamamaykichisman uyart'aychispuni, imaraykuchus kaymi chiqan kachkan chayqa.

² Ñawpaqkaq kamachiyqa kaymi; chaytaq uj rimay qusqawan kuskachasqam taripakun: “Tataykita jinataq mamaykita athumpi kachikuy,

³ ajinamanta kusisqa kanaykipaq jinataq karu kawsayta kaypachapi kawsakunaykipaq” –nispa.

⁴ Qankuna tatamamakunataq amapuni wawaykichista phiñachiychischu, manachayqa imaynatachus Apu Tataqa munachkan ajina chiqan kawsayniyuqta yachachikuychis.

⁵ Wata runakuna, kaypachapi qankunapaq wasiyuqniykichis kachkanku chaykunataqa uyariychis. Athumpi kachispa, mancharispa jinataq llamp'u sunquwan, Cristomampas jaywachkawaqchis ajinata jaywaychis.

⁶ Jaywaychis, ama qhawqasichkasunkichis chhikallachu ajinamanta paykunawan allimpi qhawasqa kanapaq, manachayqa Cristopaq jaywaqninkunajina Diospaq munayninta tukuy sunqu ruwaspa.

⁷ Llank'ayniykichistaqa ama runakunapaqjinallatachu manachayqa Apu Tatamampas jaywachkawaqchis ajinata tukuy sunquykichiswan ruwariychis.

⁸ Imaraykuchus yachanaykichismi sapa uj runaqa watarunapas kachun manachayqa kacharisqapas kachun, allin ruwasqanmantajinam Apu Tatamantaqa jap'iqanqa.

⁹ Wasiyuq runakuna, qankunaqa imaynachus jaywaqniykichiskunaqa llamp'u sunquwan kawsakunku ajinata ama paykunaman manchayta quspa kawsakullaychistaq. Qankuna jinataq paykunapas janaqpachapi kachkan chay Apu Tatapaq atiynimpi kasqaykichista yuwatatarikuychis, imaraykuchus paypaqqa manam pipas waqmantaqa astawan munasqa kachkanchu.

Tata Diospi kallpachakunamanta

¹⁰ Kunanqa wawqipanakuna Apu Tatapaq manchay atiynimpi kallpaykichista maskakuychis.

¹¹ Tukuy Diospaq qusqan maqanakuy p'achakunawan p'achalliykukuychis, ajinamanta supaypaq sallqaykuyninmanta jarq'aqakunaykichispaq.

¹² Imaraykuchus manam runapaq atiyninkunawanchu maqanakuchkanchis, manachayqa janaqpachapi kaq saqra ajayu kallpakunawanmi maqanakuchkanchis, chaykunaqa nuqanchis muyuriy kay ch'amakapachapi atiyniyuq jinataq kallpayuqmi kanku.

¹³ Chayrayku, tukuy Diospaq qusqan maqanakuna p'achata churaykukuychis, ajinamanta saqra p'unchay chayamuqtin atipanaykichispaq, sumaqta wakicharikuspataq thuru sayaykunaykichispaq.

¹⁴ Ajinaqa thuruta sayarikuychis, chiqan kaywan p'achallt'asqa jinataq Diospaq chiqan kayninwan waqaychasqa.

¹⁵ Wakichasqapuni sumaqpi kay willaykunata willaq lluqsinapaq kachkaychis.

¹⁶ Diospi sunqu churasqaykichistaq uj jark'aqakunajina kachun, mayqinwanchus Supaypaq warak'awan chhuqamusqan lawrachkaq rumikunamanta jark'aqakunapaq kachun.

¹⁷ Qhispichiytaq uj uma qhupqatakuna qhulu ch'utukujina qankuna jark'aq kachun, jinataq Diospaq rimayninqa mayqinchus Ch'uwa Ajayupaq kuchillun kachkan chayqa ajinallataq qankunaman jark'aq kachun.

¹⁸ Diosmanta mañakuytaqa qankuna ama saqiychischu: Ajayuwan pusasqapuni Diosmanta mañarikuychis. sumaqta qhawatatarikuspa jinataq mana iskayakuspapuni kachkaychis, jinaspataq tukuy ch'uwa llaqtarayku Diosmanta mañarikuychis.

¹⁹ Nuqaraykupas mañaripullawaychistaq, ajinamanta ima rimaykunatachus ninay kachkan chay rimarqunaypaq Diosqa rimaykunata qunawampaq, jinataq kallpawan rimarquspa imachus pakapi kachkan chay Diospaq yuwaynin sumaq willaykunapi kachkan chayta riqsichinaypaq.

²⁰ Diosqa kay willaykunapaq willaqnintajinam nuqaman kachamuwan, kunantaq chayraykum jap'isqa kachkani. Nuqapaq paymanta mana manchaspa willanaypaq mañaripuwaychis.

Tukuchay napaykuykuna

²¹ Apu Tatapaq llank'aynimpi tukuy sunquwan yanapakuq Tíquico munasqa wawqimasinchismi qankunaman nuqaniqmanta tukuy willaykunata jinataq imaynachus nuqa taripakuchkani chaykunamanta willamusunkichis.

²² Chayraykum nuqaykupaq imaynapichus taripakuyku chaymanta willanasunkichispaq jinataq qankunaman kallpacharinasunkichispaq kachamuchkani.

²³ Dios Tatanchis jinataq Tata Jesucristopiwan, wawqipanakunaman sumaqpi kayta jinataq iyawniywan munakuyta qunasunkichista munani;

²⁴ tukuy pikunachus Tatanchis Jesucristoman mana iskayakuy munakuywan munakuchkanku chaykunaman, pay khuyapayakuyninta quchun.